魑魅魍魎：局長今鋪慘過做兵
1 :
GS(14)@2017-01-21 03:34:53「功就佢領，嘢就我做？」陳茂波當上財政司司長，全香港最谷氣的一位，應該是財經事務及庫務局局長陳家強。無他，陳家強至今仍要為2017年的財政預算案埋頭苦幹，無啦啦要加班，呢鋪做局長慘過做兵。公平是相對，不公平卻是絕對。陳茂波與陳家強年幼時同樣家境清寒，前者住石硤尾南山邨，後者住彩虹邨。童年時同樣過着貧困生活，但兩人多年來仰望獅子山、發奮圖強，活出一個典型香港故事，兩人最終雖也名成利就，但陳家強今日卻要被迫作嫁衣裳，就凸顯了打工仔跟錯老細的悲哀。去年12月曾俊華辭任財爺一職，陳家強成為署理財政司司長，當時接任的陳家強公開表示「與同事全力做好財政預算案，配合施政報告及經濟前景預測」，換轉係你，都唔會估到最終自己會升職失敗，而且不特止做唔到財爺，仲要幫民望低迷嘅陳茂波做財政預算案。香港人願賭服輸，但前題是要公平。士可殺不可辱，今次中央選擇陳茂波做財爺，又要迫陳家強做財政預算案，搞到佢日前仲要打圓場講句「甚麼情況下都會配合政府工作」，男人最痛算這種。客觀地分析兩人背景及能力，陳家強本來凌駕陳茂波，更適合做財爺。因他是經濟學者，做財庫局局長逾九年，對公共財政、國際金融十分熟悉；相反陳茂波只是個會計師，缺乏宏觀經濟視野及相關經驗，囤地、劏房風波連連。為官者，其身不正，雖令不從。《創世紀》陳錦鴻飾演的許文彪有一金句：「呢個世界公平咩？」陳茂波2012年執死雞取代麥齊光成為發展局局長，2017年又執死雞做財爺。這證明了甚麼？香港地，識人好過識字。十一少
http://www.fb.com/11mister本欄逢周五刊出
來源:
http://hk.apple.nextmedia.com/financeestate/art/20170120/19902481