ZKIZ Archives


湯文亮蕭若元「契」親家

2016-03-31  NM
呢輪日日見報嘅湯文亮,有位千金湯振玲Jacqueline,有傳好事近。湯文亮係城中億萬富豪,邊位咁有幸做佢未來女婿?小宗打聽到,正係蕭若元視為契仔嘅周世豪Charles。周世豪係中國3D數碼娛樂(8078)執董,跟開蕭若元搵食。上年八月湯文亮喺福臨門筵開九席,請了一批股評人及分析員,才子蕭若元都係座上客。

兩人大纜都扯唔埋,小宗問過湯文亮,佢話同才子係兩種人、玩唔埋,「我鍾意行山、打波,同李宗偉(羽毛球好手)打都夠膽死,但佢(蕭若元)隻腳唔方便。我睇過佢寫嘅書,文學水準高,但有啲曲高和寡,講慈禧某日同邊個妃嬪鬧交,趙匡胤係唔係被細佬殺死之類,我講得出妃嬪個名已經好好!」同才子無乜兩句,但湯文亮對未來女婿Charles就讚不絕口,全因Charles非常識做,不時噓寒問暖,份人又老實唔會口花花,「佢叻仔嚟,做IT搞網絡。」有蕭若元調教,湯文亮可以放心咯!

前《新報》社長再轟誠哥

上期「中環人語」講到前《新報》社長馮兆榮,因雍澄軒事件唔再「愛」誠哥。報導出街後,馮老有補充。佢反覆思量「誠哥我唔愛你」呢句話,認為語帶輕佻,會令人誤以為他與誠哥都是「斷背」,實屬罪過!不過要佢再炮轟誠哥,仍然句句有力。佢話買樓如賭博,有贏有輸,不能打茅波。仲回憶起十幾年前,買入紅磡海逸豪園被殺訂二百幾萬,「但而家雍澄軒,只退訂無賠訂,係咩道理?誠哥貴為首富,唔會破壞地產界撻訂賠訂嘅『遊戲規則』啩!」佢仲話買賣經長實律師樓收訂確認,要打官司理應係長實與證監交鋒,與買家無關,「長江實業是金漆招牌,能打爛這個招牌的,亦只有李嘉誠自己!」咁誠哥你收到未?

中環寸嘴:車厘哥夫後人溫哥華響朵

溫哥華老友Lucas個女,開咗間人氣cafe——Beaucoup,真係要去見識吓。朝早十點鐘成間鋪逼滿客,有鬼又有唐人,啲友跟東岸時間開工,啱啱係coffee break。已預先叫Lucas order定半打cross bun,去到賣剩四個,遲一步都賣埋,真係老豆都冇面俾;呢間cafe開咗成三年,依然排長龍,位置差唔多等於香港灣仔區,梗係啦,平平哋食到好嘢,啲餅限量出爐,售完即止。Lucas個女Jackie原本做廣告,早幾年去法國學整餅,仲搞埋tour周圍搵靚食材,呢度用啲牛油係喺Saskatchewan農場特別訂嘅。最出名係牛角包,溫哥華Magazine評為全城最正喎!其實Lucas姓解山東佬個家族喺香港都有「朵」o架;以前龍記飯店、車厘哥夫、雄雞呢啲俄羅斯餐廳都係佢家族搞,家陣灣仔仲有間ABC餅屋;Lucas喺加拿大讀完書留喺當地發展,做建築,幫我啲物業做維修保養,同佢識咗成三十年,溫哥華係退休埠,冇人做嘢,求其做啲嘢就誇啦啦,佢喺唐人圈無人不識,家陣都退休咯,得閒幫個女打點吓鋪頭過吓日辰。

強國人搶葡萄園

人仔貶值,強國人除了搬錢到海外掃物業、酒店、買保險之外,最近殺到去美國加州買vineyard葡萄園,高盛仲有支特別團隊為有興趣買葡萄園嘅強國客充當財務顧問。

香港藝人廖碧兒都算早着先機,○八年已到加州Napa Valley和法國波爾多買下小小葡萄園,釀製自家品牌,名下品牌Bellavizio近排密密做推廣,原來代理呢支酒嘅公司柏萄匯,老闆係上海總會創辦人王劍偉個女王緒玲,同埋佢契女曹嘉芝,雖然「王會長」早已仙遊,但地位超然,唔少上海幫的富二、三代依然俾面佢個女,加上食客都慕藝人之名,開番支酒淺嘗一下,呢支酒都幾女性化,以前做酒係男人嘅世界,而家女性進入男人世界囉。

PermaLink: https://articles.zkiz.com/?id=191291

Next Page

ZKIZ Archives @ 2019