ZKIZ Archives


西環集中營:京搬石頭掟自己腳

1 : GS(14)@2016-11-16 05:06:04

北京為剝奪青年新政梁頌恆、游蕙禎立法會議員資格,不惜以人大常委釋法達到目的,有民主派中人指,西環及左派似乎想將打擊面擴大至其他民主派議員,若有更多民主派議員因釋法被剝奪議員資格,「咁就唔係一個補選咁簡單,隨時變成一場反人大釋法嘅公投」。


隨時釀反釋法公投


該民主派中人說,雖然梁、游司法覆核官司未有結果,但內地一些中間人似對兩人失去議員資格「相當有信心」,不斷打探民主派陣營會有哪些人出戰補選,他笑言:「莫講話未正式傾,大家仲係估估吓,就算真係有人選,都唔會同上面講啦!」他猜測北京想評估建制是否可取得該兩席,以及想知一些本土、自決派會否參選,以便提早部署。另一民主派中人說,西環及左派人士將釋法打擊面擴大,早前有被指親西環人士,入稟覆核8名民主派議員的宣誓,這名民主派中人直言,若西環及左派人士真的想藉今次機會,剝奪更多民主派議員議席,只會令港人對人大釋法反彈更大,「而家除咗九龍東,其他4區都有議員俾人入稟司法覆核,如果法庭真係判佢哋宣誓無效要補選,隨時會成為一場反人大釋法嘅變相公投」。他笑言若補選真的變成一場反人大釋法公投,到時北京恐怕相當尷尬,「場補選係因為人大釋法、親建制人士提司法覆核搞出嚟,冇得怪民主派,但民主派又用嚟搞公投反人大釋法,到時北京要問責,係咪應該怪人大同西環?」而且剝奪議員人數越多,國際社會必定越關注,必定更加「唱衰」北京及一國兩制,「直情係自己搬石頭掟自己隻腳,民主派做花生友睇北京點搞」。季陶周一、三、五刊出




來源: http://hk.apple.nextmedia.com/news/art/20161114/19833208
PermaLink: https://articles.zkiz.com/?id=315592

Next Page

ZKIZ Archives @ 2019