最近有讀者來郵問及，在澳紐攻讀太空工程Aerospace Engineering是否適合，呢樣唔敢答，若然讀畢回港，肯定冇適合工作啦，香港邊度有太空工程嘅職位箒，但不介意學非所用嘅話，咁就無所謂。經紀K嘅細仔就係喺牛津大學攻讀太空工程嘅，返到香港從事甚麼職業呀？咪係投資銀行囉。左丁山在馬場碰到四位世姪女跟父母入場睇馬，問佢地讀邊科，估唔到答案好一致，在澳洲（雪梨大學、墨爾本大學、新南威爾斯大學）主修機械工程、電機工程、電腦。現在做緊乜呀？哈，全部係銀行職員，讀邊科與做甚麼職業，無必然關係，如果兒子要讀Aerospace，俾佢讀便是。
各處鄉村各處例，每個地區嘅就業情況都唔同，Yahoo Finance網頁最近有一篇有趣報導：10College Majors You'll Regret（你會感到遺憾的十個主修科），據Payscale調查量度（薪水、工作滿足感、工作意義），美國有十項大學主修課程最不如意，呢十項就係：傳訊、新聞、英語、人類學、視覺傳訊、室內設計、藝術史、藝術、平面設計。呢十科嘅畢業生工作十年後，薪水中位數係69,800美元，認為自己行業可以向他人推薦嘅佔66%，認為工作可以令世界更美好嘅佔50%。
十個最好嘅主修科又如何呢？幾乎全與工程有關，就係化學工程（薪水最高）、太空工程、電機工程、機械工程、生物醫學工程、土木工程、建造管理、電機工程科技、地質學、訊息工程，呢十科嘅畢業生工作十年後嘅最低年薪係84,300美元，願意推薦自己行業嘅佔67%至87%，認為工作可令世界更好嘅有50%至78%。
近年美國不少調查顯示，工程系的畢業生最易搵工，薪水高過MBA，但偏偏有調查顯示美國中學生對STEM科目（即科學、科技、工程、數學）有懼怕感，討厭感，選修嘅學生數目有下跌趨勢，令美國企業公司好擔心。新移民呢？來自中國台灣印度俄羅斯嘅學生，尤其是男生，似乎人人係STEM尖子，讀化學工程博士學位嘅學生，更是中印天下。可以咁講，美國工業越來越倚賴移民留學生，去美國讀書而又想留低不走嘅，以工程學科最有想頭。 