樂香園：嘉里真係睇中雨潤？
1 :
GS(14)@2012-08-07 17:27:44http://hk.apple.nextmedia.com/financeestate/art/20120807/16581244
近日殘股大翻身，海迪認為大部份係技術反彈居多， short咗咁耐有啲平倉盤實屬平常，絕唔代表公司前景有轉好咗。豬肉股雨潤（1068）近日獲嘉里集團增持至5.01%，表面上睇，好似係有人睇好雨潤而吸貨。但真係咁簡單？
首先雨潤搵錢嘅模式好複雜，聞說佢哋先向地方政府攞地發展，開工後地方政府又會用「回贈」方式畀番部份錢你，長期高於市場嘅補貼，到底包括咩嘢項目？唯一可以肯定嘅是，一、呢種唔透明嘅模式，可以畀人搵油水嘅漏洞好多；二、雨潤呢間公司要 run落去，人事關係必不可少。如果有投資者想策略性入股，買起雨潤，點樣去衡量佢嘅合理價值？唔會天真到單睇本 book就睇得明囉！唔同祝義材傾，自己喺街掃？點諗都唔合理。
嘉里3次增持雨潤，每次都巧合是32萬股左右，唔多唔少，亦被標示為「行使某項權利或期權」，仲有3500萬股持倉係屬於衍生工具。似係有人有投機性的合約居多。野村仲搞笑，佢哋分析嘉里持有雨潤股價的子公司名稱，叫「 macro」、「 alpha」，聽落都唔似係搞策略性入股喎！
海迪