李業廣推動學習中國文化，十四年前與方心讓、饒宗頤、胡從經等人成立中國文化研究所，2000年創辦「燦爛的中國文明」網站(http://www.chiculture.net)
，早為本港中學生及教育界人士熟悉，起初只有繁體版；2005年推出簡體字版，今年年底陸續推出英文版。英文翻譯中國文化，甚為艱難，首先係搵錢找翻譯人員，李業廣係籌款高手，三年前動英文版腦筋時，已搵到有心有錢人李兆基贊助二千萬元，有了預算，就着手搵人，卒之搵到中國國家外交局做翻譯單位，第一階段涉及150個專題，約500萬字，已率先完成咗「萬里長城」及「佛教傳入中國的歷史」兩個專題。
中譯英比英譯中困難得多，李業廣本人留學英國讀法律，本身係英文高手，佢為咗慎重其事，禮聘以英文為母語，並且熟悉佛教史嘅外國專家，審閱英文譯稿，必要時改正之，譬如將The first buddhist temple of China修訂為The first buddhist temple in China呢類。
點解要花錢花時間將中國文化內容譯做英文？李業廣話，外國友人知道網站存在之後，就陸續向佢申請使用權，佢話來者不拒，無申請上限，但外國人學習中文之餘，好多都想閱讀英文版。泰國、法國官員就曾向佢表達過，李業廣本着為人為到底嘅宗旨，更有鑑於到目前為止，「燦爛的中國文明」網站嘅點擊率已超過4億次，瀏覽人次突破五千四百萬，一於拍板推出英文版本，希望更有助向全世界宣揚中國文化。錢，不是問題！
講到中國文化，中大新亞書院素來熱心（可惜錢是新亞的一個問題），十一月四日至二十二日新亞舉行「信而好古」——香港書家邀請展（新亞許氏文化館），19位香港書法家參展，十一月十五日至十九日有第一屆新亞儒學講座，請鼎鼎大名嘅杜維明教授講新亞精神、儒家人文精神及主持校內研究會。跟住到十一月二十八日有余英時歷史講座，請來普林斯頓大學歷史博士，中國現代史、文化史、中美關係史權威，北京大學教授羅志田主講，都值得大家一聽。 