認同秋生批評中肯鄭嘉穎彈陳凱琳 演技小學雞
1 :
GS(14)@2015-10-07 01:51:12■無綫花旦走完一個又一個，備受力捧的港姐冠軍陳凱琳孭飛拍《張保仔》，結果被黃秋生批評演技差。
無綫花旦人才流失，走完一個又一個，現年24歲的港姐陳凱琳（Grace）被硬捧上女主角位置，在台慶劇《張保仔》擔大旗孭飛演出，可惜Grace的半桶水演技被網民狂插表情浮誇、無層次無深度、超高音尖叫，連前輩黃秋生都忍不住出口批評，昨鄭嘉穎眼見女友被踩到體無完膚，他承認秋生的意見中肯，笑女友的演技是「小學雞」起步階段：「讀完小學唔可以跳去大學！」
近年無綫人才凋零，小生花旦相繼大逃亡，花旦走完一個又一個，胡杏兒、陳茵媺、徐子珊、郭羨妮等均先後約滿離去，無綫惟有改捧港姐攝位。2013年出身豪門的港姐冠軍陳凱琳，因上圍只有30吋被笑為「貧乳」港姐，Grace當選後以旁聽生身份參加第27期無綫電視藝員訓練班，未卸任即獲安排參與拍攝《名門暗戰》，可惜處女作被網民狠批演技幼嫩。
被批浮誇無層次
近日無綫在黃金時間播出台慶劇《張保仔》，除特技被網民嘲雞過14年前《封神榜》，入行僅短短兩年的Grace，火速榮升擔任第一女主角「黃娣妹」，可惜其演技依然停留在半桶水階段，被網民狠批表情和動作都浮誇造作，擠眉弄眼似足迪士尼的動畫公主，演技無層次無深度，兩分鐘尖叫20次，耳膜都被她震穿！身為香港演藝學院表演系學士畢業、兩度獲封金像影帝的前輩黃秋生，都忍不住出口批評Grace演技：「我覺得好滋擾，陳凱琳太多小動作，『依牙鬆槓』唔自然，出現呢啲小動作20次就變成滋擾，導演可能見陳凱琳就魂飛魄散，但佢揸槍個樣好猙獰。」難怪秋生睇半集已熄機。
趕客四式
【扮驚唔驚】■不只秋生批評陳凱琳演技差，小動作多，連網友都嫌她滋擾。
【揸槍猙獰】
【瞪大對眼】
【成日大叫】
大前日Grace出席活動坦言為批評感到唔開心，原來身為男友的鄭嘉穎當日由橫店拍劇返港，晚上即急會女友送上愛的慰問，被網友影到兩人同車的相片貼微博。昨嘉穎出席銅鑼灣惜食堂活動，問有否睇劇集《張保仔》？他坦言：「有留意。」問覺得Grace演技如何？曾獲視帝的他力撐女友：「咁樣講，每樣嘢都有過程，對一個新人嚟講算唔錯。」嘉穎用讀書做例子，笑女友的演技是「小學雞」起步階段：「當讀書嚟講，讀完小學唔可以跳去大學而skip中學，佢而家只係起步階段，我都有聽到善意批評，秋生講得好中肯，係善意。而家係佢必經階段，我入行嗰時冇咁幸運，冇前輩提點，如果一嚟就話好，都唔係好事，秋生講得啱，而家啲新人缺乏character，但佢係有character，只要繼續畀心機，就不斷有進步。」
■鄭嘉穎昨日評陳凱琳的演技是「小學雞」：「讀完小學唔可以跳去大學！」
黃秋生
「每場戲都太用力」
問覺得Grace最大問題是甚麼？嘉穎坦言：「唔可以單場啲講，整體啲講佢係比較用力，如果每場戲都用力，就等於冇用力，要喺適當時候用力。」問他會否覺得女友因拍台慶劇所以緊張？嘉穎說：「唔關事，新人孭劇會緊張，我以前未做主角，幾日先拍十場戲，但做咗主角就一日拍十幾場戲，少咗時間分析角色、準備又少，但工作量大咗，主角同配角係有分別。」再問Grace有否不開心？他說：「佢係一個好有智慧嘅人，呢個係必經，我有信心佢短時間內有大躍進。」另對於女友被傳曾跟陳展鵬、洪永城搞三角戀，嘉穎笑笑口說：「呢啲吹水嘢大家唔好信。」至於Grace夢想有森林婚禮和生小朋友，他說：「呢啲嘢後話啦，我覺得到時先算，今日講呢啲嘢太離題。」採訪：黃曉妍攝影：陳俊強
來源:
http://hk.apple.nextmedia.com/entertainment/art/20151005/19320727