ZKIZ Archives


中佬賣麵錯誤中轉型

2011-9-15  NM




北角熱店壹碗麵老闆盧祖炎 (Michael,三十六歲),在兩年多前拿着四十萬積蓄開麵店,搞飲食經驗不足,誤中多個創業地雷,使多錢、失預算,加上食物差,日日拍烏蠅,仲要黑過 墨斗,斷電纜、留案底,崎嶇創業路行了兩年,四十萬積蓄早已清袋。

幸得各界高人指點,虛心將餐牌一改再改,成功捧紅兩厘米闊麵,現日賣二百碗,每月淨賺四萬多。

我叫Michael,是北角和富道小店壹碗麵的老闆,做廣告製作十六年,眼見市場萎縮,兩年前決定「唔撈」,休息兼諗下新搞作,一抖近十個月。有日經過和 富道見有鋪出租,我鍾意食,打算靠朋友十多年前創作的闊麵突圍,而車仔麵則容易做,車仔闊麵,雙重保障!只是做飲食並非想像中簡單。

出牌裝修大安主義

當時見鋪租不過萬五,心想四十萬積蓄開鋪應該足夠,沒考慮太多便租下,誰知原來光裝修已花四十萬,唯有開始節流,例如棄用煤氣貴,便改用電。諗住自己無經 驗,大安主義依賴裝修師傅及出牌經紀,結果沒人提醒我廚房畫錯在門口,出牌經紀又收錢便「懶懶閒」,臨時牌照過期後都未有正式牌照,罰錢罰到我和食環署人 員都熟起來,現在才知道應該在合約寫明完工日期,未做好不找數等,唯有當交學費吸取教訓。有老友十多年前曾製作一種特闊麵但「唔賣得」,更轉了行做髮型 師,我卻覺得有「gimmick」,應該有得做,便用他的設計,揭黃頁逐間麵廠問,間間都拒絕,其實他們也對,我每天不過拿兩三斤,又要換刀又要改材料比 例,幸好我遇上了八十年老字號佛記麵廠第三代,回流不久的Nelson。我們從麵的厚度和材料比例都不斷試,又增加鴨蛋及雞蛋比例,由每斤兩隻增至三隻, 鴨蛋加強煙韌口感,雞蛋則提升香味,一個麵的重量比正常多一半,直至開業前一天才定下配方。現在我和Nelson成了朋友,亦由每天拿兩、三斤麵變成二、 三十斤,Nelson還常說我現在生意好不好,他比我更清楚呢!

請黑工留案底

我廣告出身,深明包裝重要,粗麵要慢慢被市場接受,所以我特意到九龍城買懷舊公雞碗碟,就算食物不夠好都可以轉移視線,誰料頭三、四個月個個客都都話難 食,數字反映一切,每月蝕二萬,要老婆津貼才能過活。又黑過墨斗,鋪頭突然斷電纜,雖然業主出錢維修,但足足停電五日,不能開鋪賺錢,雪櫃內的墨魚丸魚蛋 全部變壞,便把心一橫,專心做撈粗,不做車仔麵。當時洗碗阿姐見我經濟拮据,自動辭職,並介紹一個人工較低的阿姐給我,她說可以出支票,我不虞有詐請了 人,以為收得支票有戶口才可過數,誰料她上班第二天就有警察找上門,說我聘請了黑工,借朋友錢打官司又多花十多萬,最後要朋友及熟客合共寫了三十多封求情 信,我才獲得輕判一百二十小時服務令,但也留了案底。為了省開支,半年來員工下班後,自己做完服務令再回去鋪頭洗碗,你問我有沒有找家人幫忙?找老婆使銀 紙就威風,我現在「洗大餅」,點好意思開口?最記得一次年三十晚做服務令,天寒地凍,去老人院做完「義工」,才回家食團年飯,當時真的很想放棄盤生意,但 還未試過補救我又不甘心。翻看網上食評,有人客指在我們初開業時,遇到叫乜無乜的《麥兜故事》情景,要不食材未準備好,要不就賣光,但其實我的運氣算不 錯,蔡瀾曾三次到訪,第一次未開門,第二次維修,第三次才食到。可是他一樣打開餐牌叫邊樣無邊樣,就當面跟我說:「你個menu都唔係大啦,仲叫乜無 乜。」幸好蔡生愛惜小店,沒有公開在食評中批評我們,但這次有如當頭棒喝,叫我每天都要準備好每款食物。

轉型成功全靠問

為省煤氣錢,不能做要有鑊氣的菜式,便打正住家旗號,賣炆燉小菜,大部分由岳母傳授。不過一本通書也不能讀到老,例如岳母教做的炆豬肉,聽落太普通,幸好 我媽媽不時在家釀酒,我便想到加入含紅穀米的酒糟,一來較香,二來較特別,我找做飲食業的朋友試食,他又建議多加甘草、八角,令豬肉更香。有一次一個老伯 走到我的店內,一邊食一邊叫「嘩!乜你個辣椒醬咁難食!」我立刻請教他怎樣做醬,他教我用油爆香蝦米、瑤柱、大葱、蒜頭,再加辣椒,現在這款醬很受歡迎, 令客人不自覺多吃了麵。雖然不懂飲食業令我碰了不少釘,但我慶幸因此吸取到不同人客的意見,集各家之大成。現在餐牌上的食物都是不同人的傑作,齋菜、炆豬 肉和滷麵由負責廚房的岳母傳授,豬手嫩滑秘訣由蔡師傅教授,試驗中的牛chin是朋友Sam的得意之作,而深受歡迎的浸酒蛋是我自創的,但也很高難度,不能煮太熟,剝殼亦要十分小心,用酒方面,試過玉冰燒、清酒、白酒,最後才 試出現在的紹興花雕最夾,足足經過六個月,我們食蛋也食了幾百隻。每道菜都要試驗一段時間才能放上主餐牌,鮑魚腩兩個月前才正式推出,現在我有空便會約飲 食界的朋友出來試食,KC就是常客之一,今日便讓他試食牛chin,看看適合搭配米線還是上海麵。記者說我不能當訪問是上台拿金像獎,但我真的要感謝很多人。首先是蔡師傅願意來幫忙,我們都是福建人,他有份創辦杏 花樓,但在生意轉差前退了股,一天在屋企附近閒逛,見我這家小店生意淡泊,主動問我要不要請廚師,他根本是「賺錢買花戴」,更可能是「自我挑戰」吧。我給 他試我煮的東西後,他食到耍手擰頭,現在有他幫忙,食物質素好多了,幸好有他在我生意最差的時候扶我一把。食物改好了,也要有機會。隔籬兩間鋪的阿鴻小吃 去年得了米芝蓮一星,晚晚大排長龍,不少人客等得不耐煩便轉去幫襯我們鋪頭,漸漸得到食客認同。前排吸引到小儀、金剛主持的飲食節目介紹,之後開鋪排晒長 龍,我仲以為是阿鴻小吃的客人。得到欣賞當然開心,更重要是,生意漸上軌道,終於有面見老婆。下星期我會把麵餅拿到青衣城擺攤,希望吸引到其他客源,多開 一條新財路!

開業成本 (04/09)

租 金$45,000*裝 修$400,000雜 費$40,000入 貨$10,000總投資$495,000*兩個月按金,一個月上期

營業資料(08/11)

營業額$210,000租 金$17,000入 貨$60,000人 工$80,000 #雜 費$10,000盈 利$43,000#連Michael在內,共四名全職,兩名兼職


PermaLink: https://articles.zkiz.com/?id=27748

《中佬手記》就以相親相愛娛樂大家 得個跑字

http://solelyrun.blogspot.hk/2014/08/blog-post_3.html
一個星期話咁快又過去,要數一單最「爆」嘅新聞,肯定係高雄發生氣體爆炸引致多人死傷。人命傷亡所換來嘅教訓,就係發現問題而延誤處理,係會死人嘅--而人類總係重複相同嘅錯誤。唔駛召喚阿寶喇,星期日畀佢抖下好。

講汲取教訓,其實同佔中商討日好相似。第一次咪興致勃勃或者慶烚烚咁,第二次已經開始跌 watt ,到第三四五六次,直情謝晒皮、頭都抬唔起咁滯。重複犯錯係會麻木嘅,唔係邊得嚟「習非成是」呢句成語?

以前社會人物出嚟亂 up 廿四,會畀人鬧係「指鹿為馬」。但隨住社會「習非成是」嘅風氣蔓延,係鹿係馬都開始變得唔重要。連最基本嘅客觀事實陳述錯都好多人唔介意,其他邏輯謬誤、搬龍門、模糊焦點,就更加少人察覺或者有感覺。 2012 年 7 月 1 日大家上街大嗌「梁振英、大話精」,然後佢喺西九文化區嘅利益衝突嫌疑、佢嘅山頂大宅僭建疑雲、佢嘅語言偽術……一笑已經風雲過,大家都司空見慣,佢再講「香港同大陸和諧嘅關係決定我哋食粥定食飯」,甚或「政府官員反佔中係應有態度」,喺民間莫講話風波,連一絲漣漪都冇。

一個政府之首嘅品德、操守以至政治敏感度、政治倫理水平都可以低處未算低,其他官員以至民間組織嘅代表自然可以有樣學樣而且大模施樣直行直過。最新一個代表係律師會主席林新強,佢太太打骰嘅公司喺中環中心出租場地賺大錢,背後其實係受梁粉組織「香港專業聯盟」任命,而組織只需要向中環中心業主市建局繳交一蚊雞年租。

早多十年八載,大家可能已經群起而攻之,「喂,擺明有利益輸送啦」。但今時唔同往日咯。如果程介南以權謀私嘅案件喺 2014 年被揭發,我都唔敢肯定佢會唔會被判罪成入獄。因為商交所涉嫌詐騙案而一身蟻嘅前行政會議成員張震遠,喺受到商業罪案調查科調查一年有多之後,亦遲遲都未見有下文。特首曾經掛喺口邊嘅「香港速度」,似乎只應用喺拘捕示威者嘅行動。

都講到厭、講到悶。悶咯,咪尋求娛樂。香港報紙最多人睇嘅如無意外係娛樂版。由我細細個開始搭巴士見到上班一族 C 疊不離手,到最近見到馬賽成香港風雲人物,傳媒從實體到虛擬,讀者習性其實冇大改變。 90 年代嘅年輕人同 2014 年嘅年輕人,骨子裡流嘅血、散發嘅氣質,其實好可能大同小異……咁嗰小小嘅差異係咩呢?

90 年代嘅政治就係政治,副刊專欄就係副刊專欄。嚟到而家,政治要有八卦花邊,副刊冇返個化名性格巨星亦唔似樣。兩者嘅性質都係娛樂大家,由李八方嘅《隔牆有耳》到紀曉風嘅獨眼新聞》都以捕捉政治人物小動作或者奇聞為主,《主場新聞》製圖加一句點睛嘅慣技更加令大眾著眼於蔣麗芸或者鍾樹根嘅言論多於相對複雜嘅政府施政策略與佈局。冇計啦,容易入口同易消化丫嘛,讀緊 BB 班就梗係食糊仔,唔通食雞背脊吮骨頭?

政治有政治娛樂版,副刊有王迪詩帶起潮流。雖然已故的丘世文曾在《號外》雜誌以顧西蒙為筆名書寫《周日床上》 (而且好好睇) ,但論知名度、論爭議性,真係拍馬都追唔到王迪詩。一個單身貴族住喺蘭開夏道,以高姿態高角度寫盡金融中心眾生 (外加類似《 Sex and the City》嘅情節) ,謎一般嘅身份令人遐想王小姐到底真有其人定係集體創作。當然,及至王迪詩 come out (!!) 公開真人為楊潔深之後,謎底已經解開,原先嘅可塑性自然歸零。

不過一雞未死,一雞又鳴。喺《蘋果日報》嘅《金融中心》專頁彈出一個自稱「 IFC 張智霖」嘅葉朗程,走男版 Daisy Wong 路線,人哋有個 Philip ,佢有個 Danielle 。王迪詩喺財經報章嘅副刊出沒,葉朗程直情喺財經版同大家見面,再走入《主場新聞》。如此一來,食住新媒體興起嘅升浪,葉朗程論盡 A 餐 B 餐嘅文章喺網上瘋傳,連其中一個當事人嘅老公張繼聰賣廣告都攞嚟自嘲一番。

香港人就係咁可愛。有娛樂圈姐仔爭風呷醋嘅新聞都嫌唔夠,仲要透過以第一身寫作嘅專欄作家筆下故事捕風捉影、尋找趣味。半年前我寫過一篇名為《大象出現時,我們還忙著挑選 AB 餐 》嘅文章,半年過去,大家依然為王迪詩典型嘅兜個圈踩低人抬高自己嘅文章而咬牙切齒,拗個面紅耳熱。至於「『主流民意』反佔中」、 「學民學聯八月佔中」……是但啦,算數啦,唔煩你喇……
PermaLink: https://articles.zkiz.com/?id=107954

《中佬手記》不甘心,人人不開心 得個跑字

http://solelyrun.blogspot.hk/2014/07/blog-post_77.html
不能回頭。

當行政長官梁振英,以及政務司司長林鄭月娥為首嘅問責官員都「以個人身份」支持「反佔中、保普選」簽名運動嘅時候,一切都返唔到轉頭。唔係話周融嗰 80 萬個簽名有呢班官員在內會更具份量,而係特區政府嘅「不偏不倚」招牌已經跌咗落街,所謂「有商有量」亦變成「有(黑)廂有梁(振英)」。公務員「政治中立」嘅原則,喺一班問責局長帶頭簽署之下,就好似新樓奇形怪則嘅圖則咁,只待爆破,如果唔係住唔到人。

難得你來通報才知道。

梁振英話畀全港市民聽,佢會簽名支持「反佔中」,強調香港有言論自由,簽名亦只係個人行為。從「包容」到「言論自由」,今屆政府都好成功咁活用呢啲「普世價值」去支持政府嘅政策以至官員嘅行為。當然,細細個老豆老母會教落唔好同粗鄙嘅人爭拗,如果唔係就「有失身份」。林慧思被指街頭粗口辱罵警察被狙擊到天涯海角,原因就係佢有失「教師」嘅身份,可能會「誤人子弟」。公民黨曾經被愛護香港力量指撐外傭居港權,源頭係成員李志喜代表外傭打官司。梁國雄喺立法會著短褲,被民建聯議員葛珮帆投訴衣著不符議事規則,同樣係有失「立法會議員」嘅身份。

如果梁振英可以用「個人身份」作政治表態,並自覺冇違反相關守規,咁上述三個例子嘅主角其實可以用同樣嘅理據為自己辯護。當然,《動物農莊》話畀大家知,眾生皆平等,但有啲動物係更加平等嘅。喺太平洋嘅另一邊,美國前總統克林頓應該感嘆,如果自己遲十幾年做總統,遲十幾年同萊溫斯基發生不道德關係,佢大可以引用返梁振英嘅邏輯,請下屬「食雪茄」純屬個人行為,道歉都慳返,莫講話面臨彈劾啦。

唐英年就更加唔抵啦,佢競選時被踢爆僭建同婚外情何嘗唔係佢個人行為呢?關參選特首咩事?唔通滿足個人性慾嘅時候都要「我而家以高官身份進入你嘅體內」咩。不過當年梁振英攞嚟講,話人返工望住張梳化嗰陣,好似唔係咁諗?咁究竟梁振英咩時候係個人,咩時候唔係人?我唔知。

往日共你追憶永遠是好。

仲有三日,本來就係《主場新聞》兩周年。不過蔡東豪話熄燈就熄燈,累積超過 23 萬個 Likes 就咁付諸東流。新媒體同傳統傳媒一樣,都係一盤生意。要摺埋,一係莫財、一係話事人唔想再玩、一係被封艇冚檔。蔡東豪話係社會嘅錯,話出於恐懼,所以關門大吉。但坊間更多傳聞話《主場》廣告收入不足以支撐高成本運作,係因為商業理由而收檔。當然,我哋可以再追究落去,話香港嘅政治環境令一啲傳媒畀廣告商封殺,但問題係呢樣嘢喺《主場》開辦之前已經係眾所周知嘅事實,要點樣經營先至可以持續落去,應該一早諗好。

無可否認,《主場新聞》成功令好多網民關心時政,善用 Facebook 嘅空間去傳播訊息,令大家輕輕鬆鬆 Like 完再 Share ,總算建立起 Critical Mass ,等閒一篇足球評論文章都可以過千個 Likes ,威力非同小可。大業未成而中途墮馬,最大損失嘅唔係本身好熱血或者好關心世界大事嘅年輕人,而係一班瞓醒冇耐,或者啱啱停止「扮瞓」嘅香港人。一時三刻,真係未必知道去邊度搵返替代品去吸收資訊,莫講話同朋友分享。

怎能預計似這般難同你同偕共老。

如果《主場》讀者肯行多一步,認識作者背景,跟進作者嘅社交網絡 (Blog / Facebook / Twitter) ,其唔駛擔心冇咗《主場》之後同自己睇好嘅作者失散。如果《主場》讀者冇滿足於 Like & Share ,如果大家貨比三家,進一步睇下其他新媒體,由左翼嘅《獨立媒體》到 (被指) 「右翼排外法西斯」嘅《輔仁》同《熱血時報》;由《信報》前副總編輯游清源創辦嘅《 852 郵報》到《明報》旗下的《評台 PenToy 》;其實唔難發現好多作者都跨平台出文。最重要嘅,係如果香港人有足夠閱讀理解能力,應該辨別到邊啲新媒體表面中立、實質維穩。不過從香港人揀選傳統傳媒嘅習慣睇嚟,「假中立」嘅新媒體肯定長做長有。

不甘心,人人不開心,尤其這新婚,失去我身份。

收筆之際, Facebook 有「江湖傳聞」指蔡東豪將會轉戰壹傳媒加盟《蘋果日報》,我只係想講,反建制嘅傳媒冇唔分裂嘅本錢。《蘋果日報》有其堅定支持者,亦有更多仇家打風打唔甩。《主場新聞》形象相對地中立,難得建立一班固定擁躉,而家一下子捨棄而期望佢哋直接轉賬到《蘋果日報》,就好似劉慧卿嫁入民主黨然後期望前綫支持者自動過戶咁不切實際。

慘淡是我知不能回頭。欺騙我難約定未來回頭,我是牛、我是牛。

一個星期六,見證高官「放下身段」與周融合流,簽名支持「反佔中」,以及全港第一個亦係規模最大嘅網上新聞網站結業,一班政治幼稚園畢業生升學無門,有待官校收錄。我哋見證住香港嘅統戰維穩行業蒸蒸日上,距離要放下「香港人」嘅身份「擁抱祖國」,又行近一步。

後記:

以下內容純屬私事,冇公共性,可以唔睇。

我嘅第一篇投稿,都係投畀《主場新聞》。當時以「讀者投稿」身份被刊出,都曾經開心過。之後同時投畀《主場》同《輔仁媒體》,大家都係投稿,《輔仁》會畀個作者名份你,而《主場》永遠都只係「讀者投稿」。我試過 email 問編輯點解我唔可以有個作者欄位,得到嘅回覆係「請繼續投稿,我們會繼續細讀來稿,
並在適當的機會邀請來稿作者成為博客。加油,再謝過。」結果我四個月內合共投咗十三篇,由此至終,都係「讀者投稿」。事後我睇返,有一啲有名氣嘅作者有自己欄位但可能由頭到尾都只係得一篇稿;亦有一啲作者有欄位但文章質素普通過普通。

Whatever ,每個傳媒有自己嘅取態,我得唔到自己期望嘅尊重,就冇再畀稿《主場》。

家下拎呢件事出嚟講,可能有人話我方丈。但我提出一點:信奉名牌呢種 old school 嘅策略,喺網上媒體戰其實未必行得通。你有幾可見過喺 Facebook 見到有人 share 梁振英同陳茂波嘅網誌?
PermaLink: https://articles.zkiz.com/?id=107955

《中佬手記》長路漫漫是如何走過? 得個跑字

http://solelyrun.blogspot.hk/2014/07/blog-post_26.html
今日有報道話陳奕迅宣布兩年之後要暫別樂壇,要抖抖。雖然佢經理人陳家瑛話都冇咁快就撲出嚟話冇咁嘅事,話 Eason 可能只係要休息充電、放慢一下,或者去外地吸收一下新嘅藝術元素。不過,陳奕迅持續多年企喺香港樂壇之巔 (雖然樂壇有沉降跡象……) ,又巡迴演唱到聲都爛埋,就連頒獎禮都心不在弦連,話佢身心俱疲都不為過。既然意興闌珊,見好就收其實冇咩唔妥。有咩緊要得過身體健康呢。

陳奕迅自 1996 年出道,同香港人一齊走過主權移交嘅關口,有過《時代曲》嘅焦躁、時日無多之下唯有《抱擁這分鐘》 (附送帶有隱喻嘅《那一夜有沒有雪?》) 。 1998 年展開《新生活》,到 2000 年佢轉投英皇唱片開始成為《 K 歌之王》,之後嘅都係歷史。當然, Eason 嘅事業亦唔係一帆風順,例如佢喺 2003 年同英皇續約不成, 2004 年基本上交白卷。不過失收嘅一年緊隨住《 U-87 》大碟喺 2005 年嘅成功,往後幾年唔係世界巡迴演唱會就每年都有兩三首膾炙人口嘅作品,直到今時今日。

喂,羅安尼唔講波唔講政治,齋講音樂?唔對路嘛?

又畀你識穿。

早兩日我寫《我有病還是你?》,講香港人從建制與泛民之間走出第三條路,叫「走投無路」。與此同時,我哋親愛嘅建制派,或者直接啲講,統戰維穩團,亦喺路上逐步進化、逐步將「有中國特色的普世價值」滲入香港人嘅血液入面。從前英國貴族講 Blue Blood ,香港英殖時代舊電池丟嘅丟、壞嘅壞、淡出嘅淡出,血液,亦層層漸進咁染紅。

1997 年前,香港人習慣叫民建聯、工聯會、港進聯等「根正苗紅」嘅政團做「土共」、「左仔」。葉國謙、楊耀忠、蔡素玉、王紹爾等人行出嚟一陣除,講觀眾緣隨時差過《真情》飾演 May May 嘅馬蹄露。不過 1998 年立法會選舉行比例代表制,又有屈機嘅選舉委員會同採用公司團體票嘅功能組別,即使泛民主派獲得三分二選票,喺 60 個議席入面都只係攞到 20 席 (剛好係三分一) 。

2003 年係一個分水嶺:沙士、 23 條同七一遊行嘅背景下,政府民望低迷,每每出嚟保駕護航嘅建制派首當其衝,喺區議會選舉輸到七個一皮,民建聯失去四分一議席,民主黨當選率高達 79% ,幾乎打住民主旗號嘅都贏咗九成。呢個係統戰維穩團喺 97 以後最大嘅挫敗,但窮則變、變則通--何況中央咁大支水喉喺後面射注,學曾蔭權話齋,「 (保皇黨) 想窮都幾難」。

2004 年同 2008 年嘅立法會選舉,中聯辦幕後協調加上土共催票調票策略得宜,將得票推上 60 萬以上,議席數目亦維持喺六成左右 (又要多謝功能組別) 。但更重要嘅係,建制派新血湧現,李慧琼、梁美芬、陳克勤同洗底回朝嘅葉劉淑儀等人形象多元化,由專業、中產、年輕到熟知政府運作嘅前官員都有。加上工聯會由抬轎變成坐轎,正式動員強大嘅工會網絡,戰鬥力節節上升。

 2012 年香港變天,同年立法會選舉泛民地區直選得票破 101 萬,但保皇陣營亦得到 77 萬票,雙方得票相差收窄至 24 萬左右,同 1998 年相差超過 50 萬票相比已經收窄咗一半。篇幅所限,我唔喺度深究香港人口結構嘅變化同呢個差距之關嘅關係,但事實擺在眼前:統戰維穩團嘅正規軍距離得到過半民意支持之日已經不遠。

講到明有正規軍,就梗係有啲雜牌僱傭兵。以前我天真以為,維園阿伯總有百年歸老嘅一日,到時香港就應該有希望。但而家嘅亂象已經全盤否定我不切實際嘅幻想。 2011 年,愛護香港力量開始狙擊公民黨,就外傭居港權案窮追猛打,程度之激烈比起維園阿伯有過之而無不及。

一年之後,愛港之聲唔知喺邊度爆出嚟,但家下有睇無線新聞嘅觀眾都一定知道邊個係高達斌。以前陳鑑林或者劉江華出嚟寸寸貢嘅打手工作,而家外判晒畀「愛字堆」,民建聯唯一要上身嘅係由蔣麗芸單挑長毛鬥攞 Sound-Bite 。其餘議員都「潔身自愛」,專業理性客觀實幹到不得之了。曾鈺成得閒單打兩句黨友蔣麗芸,大眾好感度又增加 5% ,認真得來全不費功夫。

統戰維穩除咗正規嘅協調、配票、蛇齋餅粽同一系列打手,策略上嘅抄襲、複製亦好重要。近來小米手機因為抄襲 Steve Jobs 招牌口訣 "One More Thing" 而紅上加紅,「愛字堆」執行 Copy & Paste 更加係青出於藍。以前泛民向老廉舉報官員利益輸送或者向選委會舉報候選人犯規,而家民建聯、工聯會就聯同愛字堆就齊齊舉報黎智英同被指收受捐款而冇申報嘅泛民議員,仲話要動用《權力及特權法》喺立法會調查添。梁美芬下線李偲嫣玩絕食要求警方嚴正執法,何嘗唔係膠化過往絕食反國教以至絕食爭普選等活動?以招化招,真正高招。

除咗呢啲雕蟲小技,泛民有「佔中三子」,維穩部隊就「舉一反三」,一個白頭佬周融就搞掂你哋。佔中嘅 N 個商討日同預演當然可以跳過唔做,只要接力搞公投,傳媒喺「唔介意獨家,只介意獨冇」嘅原則下例必日日追訪,周融做唔成廣播處長反而曝光率更勝從前,蝕頭賺尾啦。家下「佔中」 80 萬人公投嘅數字正正係「反佔中」公投嘅目標,無論手段有幾低裝、破綻如何百出,「佔中」打民意牌嘅如意算盤都係遲早被打爛。

一個統戰維穩體系,就喺香港「外部勢力」扶持、人材經多年栽培 (以及無數自命識時務嘅俊傑加入) ,以及「橋唔怕抄」嘅情況下,經歷十年以發育健全。陳奕迅話喺 2016 年約滿之後小休,無獨有偶,下一次立法會選舉喺 2016 年舉行。無論選舉方式有冇改變,我都有信心保皇黨可以攞到直選過半數嘅議席,以及超過全體三分二嘅議席。一眾喺港英時代受盡白眼嘅「愛國愛港人士」,到時應該可以「毫無代價唱最幸福的歌」,賺最多。
PermaLink: https://articles.zkiz.com/?id=107956

《中佬手記》我有病還是你? 得個跑字

http://solelyrun.blogspot.hk/2014/07/blog-post_24.html
新球季仲未開始,網民就喺度熱烈討論一場法國球會對葡萄牙球會嘅大戰,影片聽講有馬賽克版同無馬賽克版,但總之就係馬賽洗板。早幾年呼朋喚友、稱兄道弟嘅「尋朋記」再度上演。梗係啦,有圖有真相,堅過殘廁 Gathering 多多聲。一大單爆炸新聞,就算有個阿姐喺旺地恒當眾剝衫,引起嘅迴響都差天共地。

當然,唔上網、睇無線同睇報紙嘅普羅大眾,可能仍然關注緊肥佬黎捐助大拿拿四千萬畀多名泛民主派議員。「政治咁污穢,你班前朝餘孽反對派仲要勾結英美勢力……」至於周融、泛民、政改…… Oh Who fxxking Care?

香港嘅社會就好似一部仲用緊 Floppy Disc 而冇 Harddisk 、記憶體又唔夠多嘅電腦咁,一有新新事物,早兩日大家仲拗到火紅火綠嘅一些主流、早兩星期仲爭相恥笑緊冷血涼薄、早一個月仲實牙實齒話要捍衛守護嘅呢啲嗰啲,話咁快煙消雲散。要將舊事存檔?唔好意思,儲存空間不足。雖然總有史官每逢清明重陽出嚟提提大家當年今日發生過啲乜,但每年年尾嘅大事回顧,咪又係睇完就好似天氣先生咁:「吓?哦……」然後施施然 Life goes on 。再過啲日子,回南天潮濕,磁碟都發埋霉,讀都讀唔到咯。

「主流」民意支持善忘,「一小撮反中亂港政客」就辰時卯時都叫人「毋忘 X X 」。佢哋又唔係淨係得把口,仲身體力行表明自己一直活於過去。當中有啲停留喺九十年代中,立法局選舉直選界別打住反共旗號就選票滾滾來嘅 good old days ;又有啲徘徊喺零三、零四之間,以為五十萬人出嚟行,北京就會震過貓王,特首就會腳痛落台。最近兩位元老級人馬陳太同馬丁周遊列國申訴冤情,其志可嘉,但客觀事實係物是人非,陳奕迅歌都有得你唱,「即使再見面,成熟地表演,不如不見」。

泛民主派死守民主、自由嘅普世價值,提倡抵抗赤化、抵制貪污、反對專制……或者講白啲:「民主抗共」。但香港大眾喺社會一片「包容」嘅風氣之下,對於曾幾何時嘅過街老鼠都網開一面。曾經嘅掃把頭,而家係中產專業人士以至公僕心目中嘅最佳民意代表,民建聯唔係土共,而係講理性、做實事嘅政黨。中共,仲係咪大家恐懼嘅血腥政權?抑或,係帶領炎黃子孫富強起來嘅領導者?去到 21 世紀仲想靠「恐共心理」搵食,實聽乞食。

唔係話市民唔驚政府出動防暴隊甚至求助解放軍鎮壓亂血濺街頭,而係市民唔覺得呢件事會喺自己身上發生。以前就話「行得正、企得正」,家下都係,只係「正」係指「正統」,唔好離經叛道,唔好脫離《基本法》框架討論政改,唔好同中央對抗,自己就唔會畀警察屈人拗手指,第時戒嚴好、宵禁好,留喺屋企睇電視就冇問題啦。

長毛鼓吹五區公投,畀市民用手上一票說明究竟大家要真民主,定係周融嘅「保普選、反佔中」先至係貨真價實嘅香港核心價值。換轉係十年前,我都相信呢一招可能有效。但係十年以來嘅統戰、滲透、收編,花嘅一分一毫都肯定物有所值。由 CCTVB 到《巴乜的報》;由似返個人嘅曾鈺成到扮作無知婦人嘅蔣麗芸,香港人從軟到硬、不論男女都喺不知不覺之下被灌輸一啲「正確」嘅思想。唔信?中西區嘅選民對於區議會一連串「人多打人少」嘅事件有咩反應?灣仔區同東區區議會通過支持「白皮書」,灣仔至柴灣一帶有冇示威抗議「區議會不代表我」?再講白啲, 2016 年立法會選舉地區界別直選,泛民主派根本冇把握保住過半數議席。

嗱嗱嗱,做人唔好非黑即白、玩二分法。背棄泛民,其實唔等如投共嘅。英國工黨喺九十年代走出「第三條路」,香港人同樣地行緊泛民同保皇以外嘅第三條路,叫「走投無路」 (或者你可以話「唔對路」甚或「唔撚係路」, but whatever) 情景好簡單,一個人一仆一碌畀人追打到天腳底,喺一條掘頭路嘅盡頭,插翼難飛,咪唯有企喺度任人宰割。 Okay 你鍾意坐喺度都得,可能仲舒服啲添。

香港自由、自主嘅空間「猶像熱帶雨林,逐分鐘消失四點八里」。泛民主派對住香港市民「像相對沒相對論」,日日問「我有病還是你?」而我只係諗到,相對無言,唯有淚千行。唯盼 19 才子開動抽濕機,免得水浸維園。
PermaLink: https://articles.zkiz.com/?id=107957

《中佬一周》老虎、蒼蠅、飛機 得個跑字

http://solelyrun.blogspot.hk/2014/07/blog-post_20.html
世界盃完咗,球季正式進入抖暑階段,之前成個月平均每日出一篇,家下可以放返慢,但唔等如慢工出細貨呀下。最多我啲 typo 會少返,因為唔駛趕住球證吹雞兩秒後出文。

過去呢個禮拜嘅新聞本來冇乜焦點。立法會放暑假,雙倍印花稅一如預期地獲得通過,細價樓繼續搶到癲價,證明上車用家真係超級 desperate ,而歷史話畀大家知,掹車邊頂硬上嘅人往往係水退時最大受害者。嗰啲坐擁十幾個單位收租、有人代為供樓嘅包租公、包租婆以至資深投資者,真係驚你有味。至於地產商趁音樂未完,將遠至大埔汀角路嘅墳景樓盤低價促銷,發展成本袋袋平安,又係冇嘢好驚。「地產霸權」打倒咗未?當初因為梁振英打著「反地產霸權」旗號而支持佢上台嘅「年青人」們,受惠咗未?唔知呢。

「反地產霸權」大業尚未成功,「反佔領中環」取而代之,成為中港兩地政府同政客嘅主菜。中學 DSE 放榜狀元會否參與佔領中環成為兩邊傳媒各自表述嘅工具,政府公布嘅政改諮詢報告又因為「主流民意」、「多數人認為」等虛到無倫嘅形容詞而失去焦點,反而周融發起嘅「全民簽名運動」,就因為動員規模大 (燒埋四叔同楊生嗰幾疊喇) ,但組織粗疏、冇規冇矩 (好有現屆政府施政特色) ,而成為關心政治嘅網民爭相恥笑嘅對象。可以與之匹敵嘅,恐怕只有自稱為「永久居民提名」嘅立法會議員蔣麗芸。

無論周融定「張融」,無論麗芸定「元秋」,大家嘅共通點都係唔怕你恥笑,唔怕你用數字話佢「柒」或者「玖」,最怕你唔將佢哋嘅一舉一動擺上諸同好。喂講真,佢哋唔係傻,亦唔係低能,佢哋好清楚咩叫 Click Rate 咩叫 Share 咩叫曝光率,更清楚普羅市民嗰種「唔好搞咁多嘢」、「唔好咁煩唔好咁亂」嘅心態。只要佢哋嘅行為,可以「膠化」 (英文係咪 Plasticize?) 「佔中三子」同「泛民」嘅行動,就已經達到目標。

「佔中公投」接近八十萬人次丫嘛,「反佔中簽名運動」就以呢個數為目標,反正「民意係可以製造架嘛。有錢使得鬼推磨,你明嘅。唔明,都明白要保住飯碗嘅重要性嘛。喂陳健民你話周融收集簽名冇機制防止重複投票?之前周融都講過「佔中公投」有漏洞架喎。至於漏洞係乜,妖我叉知咩,唔好煩我啦。周融唔介意自己跌落泥漿,最緊要拉埋你地「佔中三子」 (同埋鍾庭耀) 落嚟,大家打成一片,廣大市民離遠睇根本分唔清邊個係白頭佬,邊個係朱牧 (喂其實朱耀明都係一頭白頭髮) ,總之就知道大家都有漏洞、大家都係篤數、大家都冇公信力。大眾觀感嘅嘢,你返工聽同事喺 Pantry講幾句、落街喺茶餐廳聽下阿伯阿嬸吹水,就會明。仲未明嘅,諗下身邊有幾多位 CK 口中嘅「朋友A」。

社運界近年流傳一句名言:「 XXX 打蒼蠅不打老虎」,意思係大家對抗霸權嘅時候,應該將矛頭對準有權有勢嘅當權者同資本家呢啲「老虎」,唔應該「向弱者抽刃」,無論係外傭、新來港人士定係來自「內地」嘅旅客,都係「蒼蠅」。但有趣嘅係,當搞到群眾活動嘅時候,社運人士又會提倡要「喚醒沉睡 (或裝睡) 的群眾」--咁群眾既然係咁弱勢,做咩要搞住佢哋瞓覺先?做咩唔捍衛大家耳根清靜嘅權利?

好混亂?未算。當群眾好夢正甜,有其他人決定自己衝出去對抗霸權嘅時候,又有社運人跳出嚟阻止話「 XX 唔係咁諗」。先唔好講大家有冇權利代表其他人表達想法,如果大家覺得市民唔係咁諗,就唔去做某啲嘢嘅話,咁我哋係咪都應該尊重嗰班「討厭政治」、「希望香港保持繁榮穩定」嘅市民,唔好同中央對抗、唔好爭取「公民提名」?喺老虎同烏蠅之間,到底邊個抵打啲?搵唔到答案,不如唱住 K 先,打住飛機先?

喂,飛機唔好亂打。你睇下烏克蘭嗰邊?一打,死傷枕藉,普京周身蟻,雖然都係好從容咁卸責畀烏克蘭政府,話「如果烏克蘭唔係攻打境內嘅親俄武裝份子,就唔會搞成咁」,「因此基輔政府要對慘劇負責」。喂學辯論嘅朋友真係要學下,如果片面理解普京嘅說話,唔理會親俄武裝份子係俄羅斯背後策劃去喺烏克蘭搞搞震,牽制住親西方嘅基輔政府嘅話,真係可能得出「烏克蘭要為馬航客機死難者負責」嘅結論。

雖然從表明證供 (包括親俄武裝份子被截聽「慶功」對話) 以至普京閃爍嘅言辭可見,親俄份子以至普京嫌疑最大,但依然有社運界人士,甚至我曾經好尊敬、走過烽火大地嘅資深記者張翠容,可以佢哋獨特嘅睇法,認為西方世界培育烏克蘭境內嘅「法西斯」勢力,以至呢單空難背後有可疑,各種陰謀論不脛而走。


(請留意留言部份)

或者西方資本主義喺左翼進步人士心目中係萬惡之首,但係喺基本嘅是非黑白面前都要指鹿為馬,讀幾多理論、走幾多里路、長幾多見聞都係枉然。抱歉講句,我書櫃入面有幾本張翠容早年著作,搵日我會燒咗佢,以慰死難者在天之靈。
PermaLink: https://articles.zkiz.com/?id=107958

《中佬手記》史詩大戰扣人心弦,德國封王團隊稱霸 得個跑字

http://solelyrun.blogspot.hk/2014/07/blog-post_7451.html
24 年。一個奇妙嘅數字,繼巴西與意大利喺相隔 24 年後第四度成為世界盃冠軍,德國喺 2014 年,成為第三支四屆世界盃盟主,亦成為首支喺美洲高舉世界盃嘅歐洲球隊。 36 歲嘅高路斯今屆打破朗拿度保持嘅世界盃最高入球紀錄,四度參賽而最終得到球壇最高榮譽,躋身球壇傳奇行列。但更重要嘅,係德國團隊眾志成城,後備上陣嘅舒爾尼同葛斯貢獻唯一一個入球,印證當代足球係團體運動,而唔係單憑個人技術取勝。

英文有句諺語:  "If it is not broken, don't fix it." 開波前一個鐘睇出場陣容同準決賽一模一樣,都知德國同阿根廷嘅兩位教練路維同沙比拿相當滿意球隊嘅表現,唔打算喺重要關頭作出調動。不過,人算不如天算,德國防中基迪拉熱身時受傷,要由克拉馬取代。即使話德國係踢整體都好,但冇咁個正選防中,始終會削弱咗防守能力同進攻嘅變化。尤其是,當對面有美斯嘅時候。
阿根廷有美斯,原先以為會用佢做 4-2-3-1 嘅進攻中場角色,但嚟到決賽,陣式更加傾向 4-4-2 ,美斯同希古恩聯手攻堅,角色更似 90 年代意大利名宿巴治奧嘅「 9 號半」。當然,阿根廷有兩位效率高嘅防守中場馬斯查蘭奴同碧利亞,防線絕對有足夠嘅屏障。

接戰之後,德國明顯佔有較多控球優勢,但阿根廷防守既深且密,時刻有八個球員包圍禁區,無論高路斯定湯馬士梅拿都難越雷池。由於美斯專門強攻德國左路,高大但轉身慢嘅賀維迪斯備受威脅,奧斯爾要頻頻回防助守,變相令德國左路攻勢薄弱,只能側重右邊嘅拿姆助攻。

更不幸嘅係,臨危受命嘅克拉馬喺一次爭波當中,畀從後殺到嘅加雷用膊頭撞頭,踢咗半個鐘左右就要退下火線。路維喺防中兵源將盡之下,起用攻擊火力更強嘅舒爾尼,一來壓制薩巴列達同拿維斯,唔畀佢哋從容助攻 ,二來將策劃能力較強嘅卻奧斯拉後拍返舒韋恩史迪加,等「小豬」可以專注防守。

講開卻奧斯,佢幾乎犯咗一個大衛雷斯喺季軍戰所犯嘅錯誤:頭槌將個波送去禁區頂,分別在於今次卻奧斯係中場回後迎頂去無人地帶,希古恩一聲唔該就單刀埋門,可惜面對紐亞個波射到離行離列,絕對大嘥。希古恩之後再有另一次機會,接應今場表現活躍嘅拿維斯右路傳中近門抽入,不過因為旁證示意越位而食詐糊。阿根廷之後再有另一次反擊機會,拿維斯走到門前接應但係畀謝路美保定解圍。

德國後防喺今屆賽事都未試過咁樣風聲鶴唳,前面亦尷尬地被迫重複地喺右路斬中,最有威脅嘅埋門,計有舒爾尼後上撞射被羅美路當出、奧斯爾靚轉身餵畀卻奧斯禁區頂施射但太正被接到實一實;以及右路角球,賀維迪斯飛身迎頂中近柱。半場雙方互無紀錄,表面上德國攻勢較多,但論入肉,其實阿根廷更似會入波嘅一隊。美斯掂波唔多,但質素取勝。唯一嘅疑問,係阿根廷上場同荷蘭血戰 120 分鐘,下半場會唔會體力下降。

阿根廷下半場換入阿古路,換出拿維斯,索性變陣踢 4-3-3 ,有少少令 R 頭。拿維斯上半場段段放段段有,搞到賀維迪斯甩轆咁滯。放阿古路入嚟喺中間竄擾,無錯係可以扯開多啲空間美斯做英雄,但佢哋兩個真係各自為政,連帶希古恩都靜埋--除咗下半場初段成隊波一齊壓上,趁德國未企穩陣腳搞到一陣混亂。美斯喺左邊射地波僅僅斜出,已經係下半場寥寥可數嘅埋門機會。

德國回一回魂之後又攞返主導權,但阿根廷防守的確專注而緊密,冇返咁上下心思,結局就只會係高路斯畀兩個後衛夾擊之下夾硬頂中目標但冇威脅。戰情喺中後段陷入膠著,阿根廷球員踢落有啲躁,薩巴列達同阿古路先後因為過火攔截而領黃牌。美斯下半場又開著慳電模式,連扭腳波都畀對手單對單封殺到,似乎佢老豆賽前話「美斯其實攰到謝曬皮」所言非虛。

阿根廷第二個換人名額畀咗柏拿斯奧,入替屢失戎機嘅希古恩。「敗家」似乎同希古恩嘅國家隊生涯緊緊相連。與此同時,阿根廷後防線喺 75 分鐘打後出現體力下降嘅現象,德國落底線同喺中間造入去嘅空間都逐漸多咗。如果唔係卻奧斯又一次浪費禁區頂遠射嘅機會,德國早已勝券在握。

臨完 90 分鐘前,雙方分別換入加高同葛斯,入替安素佩雷斯同高路斯。德國擺返湯馬士梅拿上最前踢 False-9 ,畀葛斯喺邊線衝鋒。不過換人都無阻世界盃連續三屆決賽要打加時嘅事實。一出返嚟,舒爾尼同葛斯喺左邊一次撞牆,舒爾尼近門逗射可惜角度畀羅美路封晒。阿根廷亦有一次機會,可惜柏拿斯奧未能把握侯姆斯失誤,心口控落嚟 ball out ,貪盡挑射嘅時候已經偏離目標,白白錯失先開紀錄嘅機會。

105 分鐘互無紀錄,馬斯查蘭奴每每喺關鍵時刻出現截斷德國傳送,絕對功不可沒。德國同樣有舒韋恩史迪加同謝路美保定演出穩定,確保球隊不致被阿根廷反擊得手。加時下半場馬斯查蘭奴同碧利亞雙人飛鏟舒韋恩史迪加,可見呢道喺中場嘅血肉長城幾咁堅固。就連前鋒出身嘅阿古路都返後波,用手爪損「小豬」塊面搞到血流披面。

德國喺體能上嘅些微優勢,最終為佢哋帶嚟入球。加時下半場七分鐘,舒爾尼左路個人突破到三閘線傳中,葛斯小禁區邊心口腔定,車身窩利射破羅美路嘅十指關,為球迷帶嚟期待以久嘅入球。阿根廷喺所餘無幾嘅時間傾力反撲,美斯連頭槌都出埋,但始終過唔到紐亞嘅十指關。
PermaLink: https://articles.zkiz.com/?id=107959

《中佬手記》世盃皇者之戰,半場未分高下 得個跑字

http://solelyrun.blogspot.hk/2014/07/blog-post_14.html
英文有句諺語:  "If it is not broken, don't fix it." 開波前一個鐘睇出場陣容同準決賽一模一樣,都知德國同阿根廷嘅兩位教練路維同沙比拿相當滿意球隊嘅表現,唔打算喺重要關頭作出調動。不過,人算不如天算,德國防中基迪拉熱身時受傷,要由克拉馬取代。即使話德國係踢整體都好,但冇咁個正選防中,始終會削弱咗防守能力同進攻嘅變化。尤其是,當對面有美斯嘅時候。
阿根廷有美斯,原先以為會用佢做 4-2-3-1 嘅進攻中場角色,但嚟到決賽,陣式更加傾向 4-4-2 ,美斯同希古恩聯手攻堅,角色更似 90 年代意大利名宿巴治奧嘅「 9 號半」。當然,阿根廷有兩位效率高嘅防守中場馬斯查蘭奴同碧利亞,防線絕對有足夠嘅屏障。

接戰之後,德國明顯佔有較多控球優勢,但阿根廷防守既深且密,時刻有八個球員包圍禁區,無論高路斯定湯馬士梅拿都難越雷池。由於美斯專門強攻德國左路,高大但轉身慢嘅賀維迪斯備受威脅,奧斯爾要頻頻回防助守,變相令德國左路攻勢薄弱,只能側重右邊嘅拿姆助攻。

更不幸嘅係,臨危受命嘅克拉馬喺一次爭波當中,畀從後殺到嘅加雷用膊頭撞頭,踢咗半個鐘左右就要退下火線。路維喺防中兵源將盡之下,起用攻擊火力更強嘅舒爾尼,一來壓制薩巴列達同拿維斯,唔畀佢哋從容助攻 ,二來將策劃能力較強嘅卻奧斯拉後拍返舒韋恩史迪加,等「小豬」可以專注防守。

講開卻奧斯,佢幾乎犯咗一個大衛雷斯喺季軍戰所犯嘅錯誤:頭槌將個波送去禁區頂,分別在於今次卻奧斯係中場回後迎頂去無人地帶,希古恩一聲唔該就單刀埋門,可惜面對紐亞個波射到離行離列,絕對大嘥。希古恩之後再有另一次機會,接應今場表現活躍嘅拿維斯右路傳中近門抽入,不過因為旁證示意越位而食詐糊。阿根廷之後再有另一次反擊機會,拿維斯走到門前接應但係畀謝路美保定解圍。

德國後防喺今屆賽事都未試過咁樣風聲鶴唳,前面亦尷尬地被迫重複地喺右路斬中,最有威脅嘅兩次埋門都只有奧斯爾靚轉身餵畀卻奧斯禁區頂施射,可惜射得太正中畀羅美路接到實一實;以及右路角球,賀維迪斯飛身迎頂中近柱。半場雙方互無紀錄,表面上德國攻勢較多,但論入肉,其實阿根廷更似會入波嘅一隊。美斯掂波唔多,但質素取勝。唯一嘅疑問,係阿根廷上場同荷蘭血戰 120 分鐘,下半場會唔會體力下降。
PermaLink: https://articles.zkiz.com/?id=107960

《中佬手記》球證判決惹爭議,巴西技遜實無疑 得個跑字

http://solelyrun.blogspot.hk/2014/07/blog-post_13.html

《中佬手記》球證判決惹爭議,巴西技遜實無疑

世界盃季軍戰,一向被視為雞肋戰,就連荷蘭教練雲高爾都話,根本就係令球員尷尬嘅一場波。歐洲國家盃就冇話爭第三名咧。但可能我先入為主 (睇世界盃先於歐洲國家盃),一個賽事有第一、第二,都應該有個第三丫。唔係啲銅牌要做雙份?

雲高爾教埋呢場就去曼聯報到,巴西教練史高拉利就話希望季軍戰之後先算。兩位老牌教練都一如所料擺出強陣,其中巴西都換咗好幾多人,包括用麥士維取代上場罪人之一嘅馬些路,用返保連奴棄用費蘭甸奴,用返車仔中場線拉美利斯、奧斯卡同韋利安,最前面用祖奧代替費特 (雖然效果應該差唔多) 。荷蘭方面,尼祖迪莊睇嚟都係未好返晒,出咗佐迪卡拉斯,史尼迪操練時受傷,由迪古斯文代替。

原本以為巴西有返隊長泰亞高施華坐鎮後防就冇事,點知第一個出事嘅就。開波分半鐘,可能好多人杯麵都未淥好,佢就響禁區邊落手拉單刀嘅洛賓。呢個時候,洛賓梗係搏老命都入多兩步先喺禁區跌啦。人同此心,唔好話我聽你唔會咁做呀。球證吹雞直指十二碼點,加送一張黃牌畀巴西隊長。其實都算幾畀面,如果跟足球例,直接領紅返更衣室沖涼啦。但開波未夠兩分鐘,球證酌情鬆手少少就少少係啦。

雲佩斯今場繼續正選,射十二碼嘅首選就梗係佢啦。 (雲高爾話準決賽有兩位佢覺得最好波嘅在場球員唔肯射頭輪,搞到佢要搵維拿 [又譯華亞] 去射,結果……) 呢位曼聯射手射龍門左上方死角,祖利奧施薩捉到路都飛唔到。射十二碼,識射一定係咁射。

巴西落筆打三更,喺鄉紳父老面前焗住進攻,荷蘭亦樂得縮後防線等你嚟,反正照舊三扒兩撥畀洛賓反擊就係。不過當你見到最前面嗰個係祖奧嘅時候,你都知「糟!噢!」係必然嘅結果。巴西攻唔入,到 16分鐘又失多球。當時荷蘭嘅迪古斯文喺有越位嫌疑之下右邊落底傳中,拼命三郎大衛雷斯上完前面助攻,又爭住返落嚟頭槌解圍……可惜佢唔係頂出底線而係頂向禁區頂 (大佬你漏畀馬爾干解圍都仲好啲) 。於是,白蘭特喺十二碼點附近控定、控定再睇定……忘記了世界這分鐘……咁滯,先較啱右腳射球掛網波,古斯達禾仲未撲埋到嚟,咁就兩粒咧。

主辦國啲球迷大概哀莫大於心死,情願玩人浪自娛下好過。跟住奧斯卡終於喺禁區邊有腳似樣嘅射門,但係射得太正畀基利臣救出。領先兩球嘅荷蘭下下都九個人返後防守,就算輸反擊都不惜出啲小動作嚟阻止攻勢,最多咪攞黃牌。巴西於是又多咗好多罰球攻勢,最近近磅嗰球喺右邊斬埋去,門前嘅保連奴同大衛雷斯漏晒。當然,你可以話大衛雷斯畀人拉衫嘅。但球證喺兵荒馬亂之間,其實好難睇到啲咁細微嘅動作。

半場巴西落後兩球,淨低半場波畀佢哋自我救贖。但好肯定嘅係,大衛雷斯喺後面做嘢打爛嘢,成日推個波上前場,唔係亂斬就係短傳畀隊友然後自己走入去塞埋個空位,搏晒老命想要將功補過,一腔熱血結果反而累事。都話足球係團體運動咯,下下英雄主義,你估八十年代咩。 (有請 Cookies 領唱……)

下半場出返嚟,巴西換咗走保連奴,換入殺人王費蘭甸奴 (仲記得占士洛迪古斯點樣畀佢熱情款待) ,結果佢出到嚟不負所託,先後鏟低雲佩斯、箍頸阻止洛賓搶波……喺荷蘭繼續重視防守多過進攻嘅情況下,巴西可以話係狂砌荷蘭。不過,當你見到最扭得嘅當然係工兵拉美利斯同右閘老將馬爾干嘅時候,你會知道巴西出咗咩問題。

巴西本來有一個應得嘅十二碼。奧斯卡喺禁區入面畀白連特閘低,慢鏡顯示白連特完全掂唔到個波,但就截低咗奧斯卡。不過,唔知球證睇到啲乜,旁證又唔提場,最終決定係奧斯卡插水領黃牌。冤枉呢。不過事後亦有人話奧斯卡專登伸隻腳白連特踢跌,係插水。你問我呢,我就覺得後衛喺禁區入面出腳一定要好小心,截唔到波又勾到腳,唔輸十二碼算你大命。

另外,白連特喺呢個攔截之後,懷疑因為膝頭哥撞到而要擔架抬出場,由贊馬特入替,又調返古積特返左邊。講開古積特,呢位沙場萬能老倌真係唔話得,前鋒到翼鋒到翼衛都踢得,呢啲咪襟撈囉。

荷蘭本來去到後段都不為以甚,但巴西搏命爭入波又喺後面曝露出咁多空位,荷蘭補時階段一個反擊,贊馬特右路出波畀後中嘅韋拿杜姆攝近柱入。費蘭甸奴包到咁深托咩。三比零,令巴西創出一支球隊喺世界盃失球最多嘅紀錄: 14 球。雲高爾都好識做,最後一個換人名額留第三門將禾姆,同時畀正選門將基利臣功成身退。

巴西隊喺 2014 年嘅災難式結果,應該真係夠後世遺忘 1950 年舉辦世界盃而決賽飲恨嘅傷痛。至於荷蘭,繼上屆成為亞軍,今屆亦都保住季軍,雲佩斯、洛賓同史尼達一代勢將淡出,下屆世界盃要靠迪比、白連特等 90 後,同埋邊個教,有冇能力團結向來有性格嘅荷蘭球星,都係一大堆問題。雲高爾囉喎,我梗係期待佢喺曼聯執教會有咩新景象啦。
PermaLink: https://articles.zkiz.com/?id=107961

《中佬手記》如何能將工作當戀愛奮鬥下去? 得個跑字

http://solelyrun.blogspot.hk/2014/08/blog-post.html
原本呢篇文,應該係一篇《投資、投誠、投石》嘅文,講嘅應該係香港人有幾熱愛投資,由投資股馬波六合,到投資喺自己身上裝身讀乜班考物試;到喺大時代當下點樣棄暗投明,到最後大家都只可以投石問路,博一舖。

不過,因為一個 Facebook status ,我成篇文由標題到結尾都轉晒。




早兩日有人問我,咁鍾意寫嘢,對咁多嘢都有自己睇法,做乜唔做傳媒。曾幾何時,我都覺得一個人嘅性格,應該同佢做一份點嘅工有關係,但冇任何必然因果關係。即係,你個人吱吱喳喳講嘢冇時停,最好做啲要對客人嘅工作;如果你鍾意計數,就去做會計日日夜夜加加減減;如果你通山跑冇時停坐唔定,唔當差就嘥咗你。

係咪真係咁樣樣?係咪真係好似學友社每逢大學聯招放榜之前畀嘅指引, 50% 興趣、 30% 能力、 20% 現實需要?定係,當大家見到識於微時嘅朋友,再不堪都有自己嘅事業、自己嘅家庭嘅時候,先明白咩叫「百貨應百客」,一本天書點樣可以睇到老?揀科尚且唔可以倒模一號眼二號鼻三號嘴,搵份工,或者長遠啲講建立自己嘅事業,又何來金科玊律?

試下抽離啲咁講,返工其實係一種交易。放心,好符合道德、高主教唔會捉你嚟鞭屍嘅。交易,兩個字,一買一賣。 (喂用到爛喇) 賣嘅係時間同精力,買嘅係金錢及金錢可以換來嘅一切物質享受,以及金錢無法量化嘅經驗。咁好簡單啦,你一開始未必知道自己想要啲咩經驗,但肯定自己想要錢。咁,返工,唔為錢,為乜?

戴一戴頭盔先,以上嘅思路都係建基於萬惡嘅資本主義之上。如果有朝一日資本主義被推翻,勞動階級唔駛被資本家剝削,可以為著自由意志而選擇做愛做嘅事,世界變得真正平等大同,呢篇嘢就可以丟入垃圾桶。喂講真,係咁美好係咁理想嘅,區區一篇文投籃又算得啲乜。

如果返工為嘅係錢,放工為嘅就係駛錢。嗱,我唔係鼓吹腐敗嘅消費主義呀下。只不過,返工已經賣咗一日起碼三分一時間畀老闆,放工剩低嗰三分二時間又要撥啲去瞓覺,有啲浪費咗喺搭車,所餘無幾嗰啲時間唔喺物質上對自己好啲,同條鹹魚有咩分別?唔係叫你亂駛錢,只係應駛則駛。嗰啲「八十後青年人月入一萬儲一萬,五年後儲夠首期上車」嘅含風飲露神話故事,真係睇一篇都會壞腦。見朋友唔飲都要食,唔食都要搭車,唔搭車行路都要著鞋架?下嘛?

返工有糧出,係出賣時間同青春嘅回報。出咗半斤力,想話攞返足八襾,其實係合理期望。 《明報》總編輯劉進圖七年前撰文話「為理想不計較付出嘅年輕人」令人好感動,而事實正正係因為付出同收入唔成正比,年輕人先要以「理想」、「熱誠」、「使命感」去搭夠,去繼續推動自己為新聞行業捱生捱死,直到團火有朝一日熄滅,仲有人要、有能力嘅就轉行,冇得揀嘅、焗住做嘅,亦都學識「為現實不計較付出」,因為已經冇條件再計較。

港英政府時代高薪養廉,目的係令公務員團隊免於受到外界金錢利益所左右。傳媒貴為左右社會輿論嘅公器,縱使出唔到高薪養記者編輯,亦唔好賤賣報格或者台型丫大佬。偏偏便宜嘅政治花瓶名銜或者打開通往神州經商嘅大門嘅鎖匙,就足以收買話得事嗰班人,從而主導喺機器入面操作緊嘅螺絲。換著係你,作為基層新聞從業員,收入比最低工資高啲啲,而所屬機構又違心甚至嘔心,身心俱疲其實係必然結局。

「興趣唔可以當飯食」,老母教落嘅。食飯就食飯,唔好整色整水講興趣。搵到你嘅錢,喺工餘時間追求自己嘅興趣,先至真正盡興。將興趣同碗飯撈埋一齊,一年 365 日周而復始,好大鑊。因為興趣講嘅係興之所至,唔係講責任。

返工若是必然,寓工作於娛樂係令生活愉快少少嘅方法。但要留意嘅係,要喺工作入要搵到樂趣,而唔係將自己本身嘅樂趣擺落份工度。何況,「多好玩的東西,早晚會放低」,何必要透過工作消磨自己對興趣嘅興趣?
PermaLink: https://articles.zkiz.com/?id=107962

Next Page

ZKIZ Archives @ 2019