ZKIZ Archives


製衣不製布 左丁山


2011-4-20  AD




 

左丁山最近收到 不少讀者電郵,多數係贊成本欄近日所言,當然亦有鬧嘅,綜合之下,有一個主題,就係中產階級幾怕泛民變成政治民主派、經濟共產派,尤其是李卓人最為惹火, 如果佢地態度不變,可能流失不少中產選票。本港中產人士多數係政治上支持直選,經濟上支持自由市場,如兩者選一,香港人一定顧住荷包先,對經濟共產怕到 極。

讀吓電郵,忽然搵到一封埋在一堆舊剪報底下嘅讀者來函,好耐咯,已經唔記得咗。呢位讀者要求左丁山解釋:「你好耐以前講過肥佬黎因賣成 衣而不造布,我嘅老友最近為類似問題感到煩惱,請你講明白肥佬黎嘅理由。」哦,以前我引述過肥佬黎呢項經營之道嘅,記得佢仍在佐丹奴之時,賣T恤發到唔清 唔楚,有人問佢:「肥水不流別人田,你年中用咁多布,不如開埋布廠吖。」肥佬黎好似係咁回答:「你估我癲嘅咩,我開布廠,啲製布商就唔會賣靚布畀我啦,我 嘅製衣廠一定要向我嘅布廠買布啦,其他製衣廠為免明益我,又唔會向我買布啦。結果就係我嘅布廠只有一個客,就係我嘅製衣廠,我嘅製衣廠只得一個布料供應 商,就係我嘅布廠,如此一來,大家攬住死,笨到極。我唔會咁笨,製衣廠一聲話買布啫,各大布商就行埋嚟,又平又靚,任揀,反而自己投資造布,可能成本又 貴,質料仲曳。」

一言以蔽之,肥佬黎不贊同舊式「垂直綜合」(vertical integration)嘅理論,否則延伸落去,成功嘅下游成衣零售商會開製衣廠,製衣廠開布廠,布廠開紡織廠,紡織廠種埋棉花。美國首先發明供應鏈,例 如Nike只管與品牌管理及市場推廣,所有其他零售點、製造廠等等全部外判(outsource),依家「蘋果」電腦亦係走呢條路,絕不一手包辦 iPhone、iPod、iPad嘅供應鏈。肥佬黎係聰明到極嘅商人,二十年前就明白呢個道理。


PermaLink: https://articles.zkiz.com/?id=24289

Next Page

ZKIZ Archives @ 2019