ZKIZ Archives


律政司建議DQ四議員提問689:不至於拒答 財爺無回應

1 : GS(14)@2016-12-07 07:49:45

特首梁振英。夏家朗攝



【特首跑馬仔】【本報訊】特首跑馬仔賽事引發的梁曾鬥白熱化!財政司長曾俊華前日指按律政司意見,拒回應4名被政府入稟的議員提問後,特首梁振英昨不單稱事先對曾俊華拒答不知情、更指認為法律意見「不至於拒答問題」。曾俊華昨晚出席活動時未有回應傳媒提問,但與隨行人士交談時一度將雙手向外攤開,似表達無奈之意。有議員指跑馬仔權鬥白熱化,政府管治淪為一盤散沙。記者:林俊謙梁振英昨早出席行會前回應有關曾俊華拒答議員提問時指接連出招,先指曾事前稱取得法律意見,「但我認為喺具體處理上,係不至到要不回答呢4位立法會議員嘅提問」,同時稱對曾拒答「我事先係唔知道」,「呢件事如果事先知道嘅話,我哋會喺政府內部商量」。他繼而自爆領功,稱前日中午知道此事後即與林鄭通電話,知道林鄭已安排其後與內會正、副主席見面,決定通知立法會,「雖然有咁嘅法律意見、有咁嘅法律前提,我哋係願意接受立法會議員,包括4位立法會議員嘅提問」。



財政司長曾俊華。黎樹雄攝

胡志偉:港府一盤散沙

問及他是否指曾俊華錯誤解讀律政司意見時,梁只稱「我唔想喺度談嗰個責任問題」,反覆重申不至要拒答,諷刺卻是其所指的原因是:「因為我哋好重視行政立法關係。」非不得已亦不會有任何舉措影響政府與立法會關係。曾俊華昨晚出席公開活動時未有回應記者提問,但全程保持笑容。多名民主派議員質疑梁振英是否真的不知情,被覆核議席的社民連梁國雄指梁振英是三司的上司,指梁稱不知情「如果唔係無恥就係無能」。同樣面臨覆核的劉小麗指大家已看清梁振英的政治鬥爭手腕,「市民都知689講嘅說話有幾可信」。民主黨主席胡志偉則指梁振英自稱重視行政立法關係是一個笑話,相信無人會相信,指梁振英早前稱想與不同黨派建立關係,實際做法卻是司法覆核多名議員資格,「呢啲明顯係佢講一套、做一套的表現」。他更特別指出,梁振英說法反映政府內部矛盾白熱化,「鬥到出面」,指政府管治已「一盤散沙」,官員不會互相合作,一有機會便「落井下石」。建制派則全面拒絕評論事件是否涉及官員因特首選舉出現「內鬥」。民建聯主席李慧琼指,「我唔評論呢啲嘢喇」,但她透露周一以內會主席身份與林鄭會面前,已致電特首辦要求跟進,對方回覆指會盡快處理,強調官員拒答議員提問會有一定反響,故政府的政治判斷應更審慎。工聯會麥美娟前日主持房屋事務委員會會議期間,官員有回應被覆核議員的提問;麥昨指不知道官員之間有何討論,只希望官員團結為香港市民服務,「現時潮流興好似《宮心計》、《溏心風暴》諗法,咁比較令人有多啲興趣,不過我哋唔向呢方面做揣測」。


網民笑CY

Willis Luk:有功就領,有鑊就御(卸)!仲要整鑊比財司長,68醜真係人渣之極。
Jacky Law:事前獲取法律意見?!一衰咗,就要律政司袁國強一個人孭,梁振英真係好有擔當呢!
Eric Lau:行李、五千萬、廉記人事、屋企僭建,單單都話唔關你事㗎啦!你估有無人信啊!


網民撐財爺

Jackie Lau:成班整場大龍鳳玩曾俊華有人性嘅人都睇得出,今日竟然話唔知情,真係有承擔你呢個阿頭。
Fai Wingfai:曾俊華借力打力。
Choice Lod:曾俊華被眾高官擺上檯!梁振英同佢劃清界線,目的為何,大家心知肚明!……卑鄙!資料來源:《蘋果》網頁




來源: http://hk.apple.nextmedia.com/news/art/20161207/19857494
PermaLink: https://articles.zkiz.com/?id=318552

Next Page

ZKIZ Archives @ 2019