ZKIZ Archives


超蓮G.E.M.爭上契李蘊懷孕5個月預做星媽

1 : GS(14)@2016-01-22 16:15:48

■李蘊懷孕後昨日首度出席活動,已陀5個月BB的她明顯見肚。



李蘊與有米老公羅章冠結婚七個多月,火速造B成功,昨日李蘊首度肚凸凸出席活動,宣佈已懷孕五個多月,並笑言做了星媽,BB在肚內已要與她一起工作。兩個閨蜜超蓮與G.E.M.比準媽媽更興奮,已認頭要做契媽。


李蘊入行11年、24歲的她去年6月與內地才俊羅章冠秘密註冊,到今個月初,她的兩個閨蜜何超蓮與鄧紫棋(G.E.M.)到海南島出席其婚宴才揭破婚事,之後李蘊更暗示雙喜臨門有猴B。李蘊早年因與超蓮及G.E.M.同用一化妝師而建立親密友誼,故她前晚宣佈有B喜訊,也要拉埋好姊妹齊齊公佈,三人同步各自在Ig貼了一幅攬到實的相片表示有喜,超蓮及G.E.M.已認頭做契媽,李蘊昨日又貼了一張BB超聲波相,留言:「其實我細個好鍾意啜手指,BB咁快就學媽媽真係可愛!」



■李蘊、超蓮(左)及G.E.M.(右)好姊妹一條心,前晚同一時間在自己的Ig宣佈李蘊有喜。

■李蘊去年6月與羅章冠註冊,她現時要香港廣州兩邊走照顧老公。資料圖片


■李蘊晒BB「啜手指」超聲波相,不少網民留言臉形靚,估計她生B女。

影大肚寫真

準媽媽李蘊昨日身穿白色貼身裙,到將軍澳出席賀年活動,肚凸凸的她又攞揮春又整湯圓,出入都有工作人員扶住,相當謹慎小心。李蘊之後坐下接受訪問,問到老公是否很開心,她說:「有BB一定開心,我哋註冊時已經決定隨時生B,好好彩一、兩個月就有咗。目前陀B二十一周,預產期5月尾,已決定喺香港生B,不過就唔講今胎生仔定女,我唔止生一個,希望最少兩個,生三個都OK,因為想30歲前完成結婚生BB,目前24歲,就嚟25歲,睇吓可以完成幾多。」



對於身形有變,李蘊笑言是多了肚腩,已構思拍攝大肚寫真,問到火速做人太太及做媽媽,跟以前有甚麼大分別,童星出身的她笑言腹中BB比她更早上台做明星:「好特別,平時一個人上台,而家兩個人,我同佢講咁細個就出嚟做嘢。向來習慣早睡早起,而家仲會瞓晏覺,飲食就要少少戒口,清淡、唔辣、唔濃就OK,亦冇特別食補品。」問到前晚跟超蓮飯敍,啟山也在場,會否找他做契爺,李蘊說:「當然唔係喇,霍生係放咗工先嚟,佢食咗個沙律就走,我哋都想見佢,大家係朋友,佢都有恭喜我。」李蘊再為超蓮否認戀情:「好多男仔都追佢,講唔晒!」



■活動上,李蘊示範煮湯圓,又讓司儀摸肚。

■甄詠珊前晚出席首映時,表示大肚婆李蘊食量多,好好胃口。



超蓮想陪產

而一早知李蘊懷孕的超蓮與G.E.M.早已認定做契媽,超蓮昨日接受本報訪問,在電話中說:「我本身已有一個契仔同契女,佢生咗出嚟,我會錫到燶,佢而家食嘢好怪,鍾意食水餃,以前唔食,食嘅味覺唔同以前,我而家會填飽佢個肚,等我契B肥啲。佢拒絕我入產房,我想睇人生B嚇吓自己先。」此外,李蘊的紅娘甄詠珊前晚在銅鑼灣出席電影首映,她說:「近日同佢食咗餐飯,我哋食咗好多嘢,大家都好胃口,大家有開心事傾。」談到好友造人成功,她說:「等佢公佈,好筍盤梗係要介紹畀好姊妺,開花結果就開心,當然想佢開枝散葉,自己密密賺錢儲大利是畀佢,想同佢BB上契。」採訪:羅慧敏、卓寶花攝影:仇志德、沈健程





來源: http://hk.apple.nextmedia.com/entertainment/art/20160122/19461874
PermaLink: https://articles.zkiz.com/?id=294793

【掩護愛苗】坤哥嘉欣金飯碗上契

1 : GS(14)@2016-08-10 07:54:50

吳業坤、龔嘉欣


不少藝人都對戀情三緘其口,保持「單身」狀態,被揭發親密關係後,常常以弟兄姊妹欲蓋彌彰,當戀情變「親情」後,順理成章結伴外出。



龔嘉欣、吳業坤

坤哥與龔嘉欣因拍劇傳緋聞,二人今年1月互送金飯碗正式上契,坤哥即場稱呼嘉欣為「坤姐」,斬斷姊弟戀。



吳若希、十哥

向來緋聞多多的吳若希,曾被指與十哥林棣權關係密切,更獲對方贈送跑馬地千萬豪宅及80萬靚車,事後她解釋指十哥只是uncle。



唐詩詠、馬國明

唐詩詠自從被洪永城私有化後,常在微博貼與馬國明的合照及影片,以「兄妹」相稱。


謝霆鋒、張栢芝

張栢芝、謝霆鋒

霆鋒當年與王菲拍拖時,有指因栢芝介入而分手,當時霆鋒坦言待栢芝如妹妹,最後兩人於外地秘密結婚,惜2011年宣佈離婚。





來源: http://hk.apple.nextmedia.com/entertainment/art/20160810/19729636
PermaLink: https://articles.zkiz.com/?id=305272

Next Page

ZKIZ Archives @ 2019