ZKIZ Archives


逢3一驚 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130617/18300111

特區政府挑選緊公關公司為人口政策諮詢顧問,預料不久之後,政府會陸續推出不同款式嘅宣傳工作,喚起市民對人口政策嘅注意。係人都知香港人口有兩個大特點:(一)平均壽命長,世界上數一數二,(二)本地人口出生率低,潮流興遲婚,遲生育或不生育,家庭成員數目一路縮少。既有如此特質,未來三十年,香港人口平均年紀必然向上升,二十歲至三十歲就業人口必然減少,即係話,交稅之人日少,退休之人日多,用古語講就係食之者眾,生之者寡,香港長遠嚟講究竟如何是好?社會上必須來一場大辯論,譬如最高工時(或稱標準工時)如果設立,勞動力供應不足必然惡化,全民退休保障如果建立,未來特區政府既財力是否可以持續負擔?會否走上希臘之路?
講人口政策,政府既然請得公關公司,必然大鑼大鼓咁樣搞諮詢,但另一方面就靜悄悄咁成立一個「長遠政府財政計劃工作小組」,純從技術層面推算特區政府之未來二三十年嘅財政計劃,即係話係搞數據、數字、做吓預算預測啫,不作政策結論,呢個時候做projection有何作用?睇嚟目標好簡單,就係預備以數字數據嚟頂住工會派嘅福利派糖攻勢,財政司司長正在準備與全民退保派在立法會來一場決戰。
我地普通市民向來自己顧自己,沒向政府拿過一分錢,現在只望梁振英唔好搞壞經濟,令我地再度成為負資產人士啫。呢日在馬場刨馬之餘,亦要應酬,一位太太講到逢3一驚,令左丁山大感興趣問佢:「你已經上晒岸,仲有乜好驚?」太太話:「為下一代驚吖嗎,依家睇見啲新潮阿媽、阿爸成日驚子女入唔到好學校,講到逢3一驚,聽得多,連我都驚埋。佢地話喎:子女3歲驚入唔到著名幼稚園,13歲驚入唔到著名中學,23歲大學畢業驚搵唔到工作,33歲驚娶唔到老婆或者嫁唔出,43歲就驚仍然冇錢買樓,53歲驚俾公司認為係老餅,被逼提早退休,63歲驚退休後生活費不足,73歲就驚提早上天堂!」左丁山聽到嘻哈大笑,稱讚呢位太太夠晒幽默感,點解自己從來冇驚過呢?老婆話:「你自3歲起就知道自己乜都冇,一路篤卒過河,有進無退,眨吓眼捱到今日,如果你早啲知驚,怕一早投咗降咯!」

PermaLink: https://articles.zkiz.com/?id=59505

Next Page

ZKIZ Archives @ 2019