ZKIZ Archives


大跌一千點後再檢討投資組合 PARTIPRAL - ROAD TO FINANCIAL FREEDOM

http://partipral-hk.blogspot.com/2011/08/blog-post.html

今日恆指最多曾大跌1,241點, 以收市計亦要跌936點報20,946, 跌幅4.29%應該係自09年11月杜拜事件以黎最既大單日跌幅. 交易所內升1%都可以上十大升幅榜; 共412隻股票創52週新低, 當日不乏藍籌股國企股, 眼見恐慌情緒充斥整個市場, 今日想講下自己既多少睇法.

自金融海嘯後恆指一年內反彈逾倍, 姑勿論原因為何, 但牛市大勢已成後要扭轉其實非想像中容易. 今個星期港股大跌雖已可確認下破自去年10月延伸出黎之上落區間, 但往下仍然有19000-22500既橫行區作為重大支持區域, 此第一階段橫行區一日不破個人仍視恆指處於調整階段.

先確立一個較長線既睇法, 再決定如何參與股票市場. 若然認定熊市已臨, 咁依家仲揸股黎其實都冇乜意思, 反正過多幾個月一街都係平貨, 依家去下旅行先都得; 有信心確認牛市未死, 先可以再進一步思考如何構建投資組合.

個人投資組合今日下挫2%, 看似跑贏大市, 但其實手持一大堆市值較細既公司, 他日要追跌既話單日急挫十幾廿個%並非無可能. 趁市淡檢視投資組合, 其實唔係睇自己做得好唔好, 係睇自己有冇得做得更好.

個持倉比重最高之聯亞今日微跌1%收市, 但整體黎講全日都係主動沽盤較多, 唯一可以慶幸既係今日市場兩度出面一面倒恐慌之時 (早上開市頭半小時及下晝三點左右) 都無出現大舉拋售, 此現象我視之為利好. 始終要知道聯亞街貨甚乾, 差價闊過維港, 自上月發盈喜後連續兩日大成交急升, 強者收貨後如果要響市場大手沽出必然係不問價賤賣先沽到, 可以忍到手唔沽, 似乎係對業績頗有信心之舉動. 作為收風較遲鈍既老散, 仍然可以先等業績公佈後再決定.

另一隻重倉股大快活收市跌2.6%, 以其防守力而言其實已算跌多左. 其實我一向都認為一個健全既投資組合必定要加入防守股, 自己資本唔夠選擇不多, 但其實我一直都係幾鍾意中電(2), 港燈(6), 長建(1038), TVB(511)呢類股. 面對股市恐慌式急挫, 呢類股往往可以提供換馬資金. 即係如果我睇岩目標, 要開刀既都係搵大快活, 但因為目前未有更好既投資目標, 所以仍然會繼續持有.

至於新買入既亞倫, 原來係摸左個靚頂黎入貨, 正宗係擺都無咁準, 今日再跌3.5%, 收市後公司高層發表樂觀言論, 指"雖然歐美經濟前景不明朗,但公司生產並非高檔消費產品,目前未見訂單表現較過去差". 其實我自己公司正正係做歐洲生意, 又係D中低檔消費產品, 今年訂單的確比舊年多, 所以此講法個人都頗同意. 不過, 亞倫班高層一向都係大淡友黎, 近期幾次有機會出聲既場合都係一反常態唱好, 個人有多少不安既感覺. 買就肯定早左買, 但堅持唔亂加注, 風險仍然有限. 好記得舊年歐債危機果陣亞倫得番2蚊, 與之相較, 今日收報$2.78仍有好大段距離.

龍記今日跌3.6%, 出乎意料地跌得少. 近半年股價表現雖差, 但其實都只係同大市相若, 以中小型股而言原來已經算唔錯, 都係可以等業績; 至於新昌管理今日微跌, 個人覺得除左管理層可能有問題之外, 單以公司業務同派息政策黎講股價好大機會已經見底, 但仍想等待中期業績確認睇法.

震雄今日跌4.2%, 乃倉內表現最差之成員. 相比起震雄, 其實我更加關注行業龍頭海天既股價走勢. 海天有好多大行跟進, 近日跌勢加劇已非一句受大市拖累就能解釋到. 加上震雄剛公佈既全年業績其實比自己想像中相差頗多, 市況未急劇轉壞前仍不介意死守, 反正注碼不大; 但目前市況欠佳, 止蝕套回現金其實未必會係一個差既選擇.

今日開市時未有時間搞清楚應該點樣優化組合, 趁收市冷靜後再作檢討, 情形就會清晰得多. 面對突如其來既急跌, 一顆冷靜既心先係最緊要, 始終兵慌馬亂之時其實頗容易做錯決定. 當局者迷, 若然對住股價跳跳下會茫然失措, 其實可以試下先抽離, 等收市後先再諗. 縱然錯失先機, 但起碼經過深思熟慮, 效果未必會太差.

PermaLink: https://articles.zkiz.com/?id=26718

業績簡評 - 龍記集團 (0255.HK) PARTIPRAL - ROAD TO FINANCIAL FREEDOM

http://partipral-hk.blogspot.com/2011/08/0255hk.html



































營業額同比下跌2.7%, 環比下跌4.9%, 主要係受日本地震同歐美經濟放緩所影響, 加上廠房搬遷, 訂單亦流失左唔少.

原材料成本飛升乃早已預計到既問題, 商品價格持續高企最終只會打擊企業盈利, 拖慢經濟增長. 有實力既公司往往可以將成本轉嫁俾客戶, 但龍記既情況係本身訂單已經少左, 為保生意議價能力自然更弱.

僱員數目增加, 但支出反減, 可能係同搬廠有關. 廣州市最低工資$1,100一個月; 河源$710一個月, 兩者比較差天共地. 搬廠對龍記長遠發展有一定幫助, 可視為利好.

固定資產大升3成但折舊數字不升反跌, 而稅率亦下降2個百分點, 加上為數3千幾萬既其他收入, 龍記先得以保持今期純利不致倒退. 若然以29%稅率計算, 核心盈利大概係1.38億左右, 實際同比輕微倒退2.7%.

短債增加4千萬而現金減少近1.8億, 原因係大部份去左浙江新廠房. 淨現金得番4億唔夠, 今期再無特別息派了. 應收賬應付賬規模下降, 佐證營業額下跌既講法, 存貨亦同時下跌, 說明實際現金流應不受太大影響.

前景展望, 管理層表明未來要依賴歐美推出新措施振興經濟及中國停止收緊銀根先有機會轉好. 但實際情況係歐美政府經已黔驢技窮; 而國內通漲明顯亦未受控, 要呀爺響現階段停止收水其實係頗不切實際.

現階段論前景其實仍然未明朗, 不過做生意唔係話見到風浪就可以摺埋收檔, 相信龍記管理層過往多年管治經驗, 要應付目前環境相信仍然係綽綽有餘. 新廠最快要2012年下半年先投產, 未來要催谷盈利唯有多從成本控制著手, 此乃最大考驗.

估值方面, 預期2011年全年核心盈利約2.75億, 每股約賺$0.44, 現價$4.60 P/E 10.5倍. 派息率保持60%, 現價股息率5.7%. 以工業股而言估值唔算平, 而且未來半年股價亦有頗大機會繼續向下修正, 個人會繼續持貨觀望, 但短期內催化劑欠奉, 要真金白銀加注目前仍未係最佳時機.

PermaLink: https://articles.zkiz.com/?id=27235

派得好投資組合月結 (Sep 2011) PARTIPRAL - ROAD TO FINANCIAL FREEDOM

http://partipral-hk.blogspot.com/2011/09/sep-2011.html

投放本金: $106,100.00
組合市值: $113,067.99
帳面賺蝕: +6.6% (上月月結: +21.3%)

投資組合單位面值: 67.35
(上月月結: 76.53 / 2010年7月1日起始值: 60.00)

股息總計: $5,520.00
股息率: 5.20%

今個月買賣:
23 SEP 買入大快活1,000股@$9.55

相 對於8月9號既滅絕式下跌, 9月份既恐慌情緒其實比之前漫延得更快, 受影響版塊幅蓋得更廣. 大跌市既初期, 我地會好明顯留意到REITS算係守得幾穩, 始終有高息支撐, 跌幅唔算大之餘反彈力度亦相當強. 但去到今個月, REITS亦終於要倒下. 個人覺得相對上質素較佳既越秀(405)同領匯(823), 已開始慢慢失去避險功能, 究竟現時吹得熱烘烘既內地資金鏈斷裂最終影響會有幾深遠呢?

從來投資路上要進步只有透過不斷反省, 檢討及修正. 堅持每個月做月結, 其實係方便自己更容易了解究竟係做岩定做錯. 仲好記得上個月低位沽出3,000股大快活後先知原來係幾近摸底沽貨, 心入面其實係暗啞底DUM春. 事後回望, "沽貨"既動作應該無做錯, 只係時機可能掌握得唔好. 提升現金比重後, 今個月組合雖然大跌12%, 但相對來講個人已算頗滿意.

唔想做太多不負責任既預測, 只係想講現時股市明顯係相當危險, 熊市已來, 長倉組合唯一可以做既就係先打好防守, 為他日進攻作好準備, 個人覺得三成現金比重係最起碼既水平. 雖然自己上個禮拜最後都抵唔住頸要買回大快活(52), 事後看其實我都承認係心急左, 正路做法係立即沽出認錯, 但顧慮到熊市重來大部份企業盈利皆會倒退, 反而係大快活可能有機會力保不失, 所以暫時仍然決定保留, 等待業績後再決定如何善後.

再談持倉水平, 我自問HOLDING POWER甚強, 現階段就算100%滿倉然後拋低一句 "我就同你鬥長命" 其實我都有本事做得出. 亦能承受高風險, 萬一有日聯亞突告停牌清盤, 自覺仍然有力東山再起. 不過若然明知盈利會倒退, 派息會減少, 股價會下跌都依然盲目買貨, 就可能係近乎不理智既愚蠢行為.

未面對過熊市, 基本上難言識唔識打理一個投資組合. 有幸初涉股場就面對逆境, 其實係一個相當好既考驗. 個人建議現階段既心態應該係勇敢面對自己組合 (縱然蟹貨一大籮), 承認錯失, 然後改正. 我自己都一手蟹貨, 唯一可以做既就係繼續分享自己既處理方法, 唔敢講係皇道, 但或者有機會俾到大家靈感.

最後想講下小小近期觀察. 時間廊近期開舖似乎相當進取, 見最近兩個禮拜開左兩間轉角位舖, 人流肯定唔少, 但相信租金亦會幾拿利. 當然, 相對莎莎(178)來講時間廊呢D只係小巫. 我呢排就親身體驗到咩叫行十步見另一舖, 莎莎究竟搞邊科? 另外, 近月免費報紙混戰亦進入白熱化階段, 記得當日特步(1368), 361度(1361), 匹克(1968)輪流上市, 結果最後齊齊玩完. 餅就得咁大, 7仔4蚊已經買到份東方, 個人比較關心係晴報最後會否火燒經濟日報大本營. 基本上寶光(84)同經濟日報(423)暫時都係掂都唔可以掂. 壞消息充斥下, 見羅開揚淡市拎幾十萬出黎增持大快活, 心入面稍稍泛起一絲暖意.

======================================================
 
上月月結: 派得好投資組合月結 (AUG 2011)


PermaLink: https://articles.zkiz.com/?id=28195

派得好投資組合月結 (Oct 2011) PARTIPRAL - ROAD TO FINANCIAL FREEDOM

http://partipral-hk.blogspot.com/2011/10/oct-2011.html

以今日收市價計, 投資組合現時持股狀況:


PARTIPRAL STOCKS PROFOLIO (OCT 2011)

投放本金: $108,600.00
組合市值: $121,882.99
帳面賺蝕: +12.2% (上月月結: +6.6%)

投資組合單位面值: 71.12
(上月月結: 67.35 / 2010年7月1日起始值: 60.00)

股息總計: $7,215.00
股息率: 6.64%

今個月買賣: N/A

經過八九月既震撼式大瀉, 十月份港股竟然可以大拗腰急升近4千點埋單, 相信呢段時間好多人, 包括我自己, 體會得最深既一句說話應該係: "這是一個牛熊共舞既年代". 雖然指數短短一個月內已經重上二萬點, 但中間既過程, 今日再回望已有恍如隔世之感.

市場步速加快, 波動巨大, 固然會令好多人覺得難以適應. 但諗深一層, 若然唔係埋頭炒市, 其實又何必要適應? 急跌急彈, 可以有機會大勝, 但同時亦可以有機會大敗. 事後回望, 錯失絕世低位撈貨既機會固然可惜, 但若然一直都有保持一定持倉水平, 低位守得住無沽, 及後反彈, 組合其實已經不自覺地跟住回升唔少.

為自己組合操作, 其實最重要係打返自己步速同認清目標. 令狐沖一套獨孤九劍連敗江南四友, 關鍵只在於出招隨心所慾, 運轉如意. 自認無能力貼市炒賣, 倒不如平常心面對大起大跌. 相比之下, 最終效果其實亦未必會太差. 沉迷市場, 不能排除左一巴右一巴既情況會發生響自己身上. 奪命金入面凸眼龍呢個角色, 絕對係某部份投機者既最佳寫照. 個人覺得就算無機會好似何韻詩, 劉青雲咁神奇地一朝發達, 可以做得到黃日華日日賣紙皮收CASH, 其實都幾盞鬼.

剛剛轉左新工, 除左以後無花紅無雙糧之外, 其餘條件都算唔錯. 十一月份會陸續有公司公佈業績, 應該可以抽到時間出黎打理下呢個荒廢左一陣既BLOG. 另外個人極度推介奪命金, 有時間既話不妨一睇.

======================================================
 
上月月結: 派得好投資組合月結 (SEP 2011)


PermaLink: https://articles.zkiz.com/?id=28954

731.HK - too good to be true? 收買佬

http://blog.yahoo.com/recycle1004/articles/594906
新聞說 731.HK 把山東紙廠 22.3% 股權賣予國際紙漿紙張商事株式會社,作價 US$38,050,975,即接近 HK$3 億

731.HK 在早年以 HK$3 億多設廠,可謂賺翻了

按售價估值,731.HK 持有山東紙廠及售後現金的價值為 HK$13.4 億左右

原淨資產 HK$20 億,理論值暴升至 HK$30 億多

原本 HK$1 資產,過往半年股價均價 HK$0.375,按此折讓計算理論值 HK$1.5,股價則為 HK$0.563

再按同業 1812.HK 晨嗚的 50% PB 折讓,就是 HK$0.75

消息在 2月 9日一出,真係想下都兩眼發光

細查下小弟卻對此甚有保留,逐一起底

紙廠名為遠通紙業 (山東),可惜不是著名的山東遠通汽車貿易

國際紙漿紙張商事株式會社,英文為 KPP,也可惜不是著名的 IKPP

首先以反向思維問,731.HK 多月來徘徊 HK$0.35 - HK$0.4 區間,那時市值 HK$4 億左右。買廠要花 HK$3 億,何不多給一點直接把 731.HK 買起?這樣就連殼也賺

OK,那就說大股東不願易手,人家買得間廠就雄心壯志嘛,那 KPP 能否找這生意伙伴配股呢?

731.HK 本有 11.4 億股左右,配 2.85 億股,按過往半年均價加上 10% 溢價,也只是 HK$1.2 億多,還是比現在方案便宜,而且還包括賺錢的貿易業務

莫非 KPP 嫌麻煩,連賺錢的貿易業務也不想要?

還是講回買廠這 deal 吧

通告說此廠由 2011年 4月 1日至 9月 30日的除稅後溢利為 HK$3420 萬,小弟最樂觀估全年 HK$8550 萬,即 PE 15.7 倍

紙廠的旺季一般都在 2月至 7月,這是傳統旺季,價格也水漲船高

若按週期調節,全年其實可能只達 HK$6 千萬左右 PE 22 倍

兩者都比小弟至愛 2314.HK 的 9 至 10 倍 PE 貴多了,當然後者 size 和商業模式不能同日而語,對方可是 PB 有溢價的工業股呀﹗


那就對比 1812.HK 晨嗚,其 PE 6 至 7 倍,更令人覺得 KPP 買貴貨。實不明 KPP 為何如此幫大股東


另外,日本人做生意慣性以自己話事見稱,特別係廠,付出 HK$3 億多,也足夠自己起一間,何用假手於人?

是否因為國內造廠難撈,KPP 要找 731.HK 做爛頭卒?但又何解不找山東晨嗚?更何況山東早已為日韓旅居之地,經商也十分開放

如此想來更令人望而卻步

看 Webb-site,Top 10 持股人開始減持,在各報反覆唱好下,此股能到何價,然後晾住黎派,天知道﹗


PermaLink: https://articles.zkiz.com/?id=33364

To Serve, To Strive and not To Yield! 朱泙漫屠龍記

http://johnchrysostom.blogspot.hk/2012/10/to-serve-to-strive-and-not-to-yield.html
「To Serve, To Strive and not To Yield!」是以前筆者參加外展訓練(Outward Bound)時學會的口號。其中高台跳水和游繩攀石(Abseiling)的項目是其中兩項令人印象深刻的活動。由於有些人畏高,因此往往不能完成這些項目。在懸崖游繩下坡之際,人必須往後仰才可以重心配合腳踏在懸崖邊而利用安全繩滑下。這些經歷令筆者明白安全繩固然非常重要,但人必須明感覺上的風險和實際的風險可能是兩回事。
期權(Option)的可愛在於令投資策略在單邊的升跌(Bullish or Bearish)外,尚有無方向性的策略(Directionless)。在不同的資產中進行分散投資(Diversification)固然是人盡皆知的投資智慧,其實投資策略亦可以應用不同的策略優化本身的投資組合回報。在2002年至2007年單邊中港牛市看升固然是必勝之道,但2008年至2010年的熊市和隨後的大反單,以及近月的牛皮市,皆證明要每月維持有穩定回報除靠單邊賭牛市外的內含期權的混合策略是非常值得考慮的做法!
拙文《期權長倉利疊利》曾以2007年的港股自由行一役的大單邊牛市來說明期權長倉(Long Option)的威力,不過現實中如此大單邊的機會十年不逢一潤。要選擇合適的期權或投資策略,必須先對投資對象有一個看法:即是其走勢是牛(Bullish)、熊(Bearish)、還是無方向性(Directionless)呢? 
今天且讓筆者以近十年的中移動(00941:HK)走勢嘗試分析如何建立合適的期權策略。簡單來說,中移動(00941:HK)自2000年許基本上呈現以下數個大走勢:

  • 自科網狂潮爆破後,中移動(00941:HK)一直跌至2003年4月28日的收市價港幣12.80元才見底。其後緩緩而有力地穩步上升,直至2007年8月上旬受美國次按風暴陰影下開始郤步並調整至2007年8月17日的低位港幣75.60元。豈料當天溫爺爺宣佈港股直通車,在這大奇蹟日中移動(00941:HK)在下午急彈並以港幣80.95元收市。在2003年4月28日至2007年8月17日這漫長的期間,中移動(00941:HK)升勢穩定而緩慢。
  • 自中國宣佈擬開通港股直通車後,中移動(00941:HK)由2007年8月17日收市價港幣80.95元一直夾上至2007年10月30日收市價港幣158.20元,這段正是十年不逢一潤單邊大升市。
  • 其後因港股直通車政策神秘地消失回次按風暴不段擴大,中移動(00941:HK)由2007年10月30日收市價港幣158.20元一直插水至2008年10月17日收市價港幣66.10元才見底回升。同樣地,這段亦是十年不逢一潤單邊大跌市。
  • 由2008年10月17日起,中移動(00941:HK)在大約港幣70.00元至港幣85.00元區域上下浮動,這是典型的無方向性(Directionless)走勢。
在2003年4月28日至2007年8月17日這漫長的牛市期間,單邊認購期權(Call Options)是不俗的操作(但筆者認為以股票或股票期貨可能效果更佳),但其波幅不利應用如拙文所述《期權長倉利疊利》的爆炸性推進。在2007年8月17日至2007年10月30日單邊大升市和2007年10月30日至2008年10月17日單邊大跌市,正是分別利用認購期權(Call Option)和認沽期權(Put Option)長倉大展身手的好時機。但由於市況波動而引伸波幅(Implied Volatility)偏高,令長倉策略的效用打上摺扣。
在2008年10月17日開始,中移動(00941:HK)進入長期在大約港幣70.00元至港幣85.00元區域上下浮動的無方向性(Directionless)走勢。因此無方向性的期權策略(Directionless)應該是上上之選,其中主要策略包括鐵兀鷹(Iron Condor)、馬鞍式短倉(Short Straddle)或純粹在高低位分別沽認購期權和認沽期權。
建立無方向性的期權策略必須留意資產格的上阻力位、下阻力位和中線位。正如上述所述,自2009年12月31日中移動(00941:HK)升穿港幣70.00元阻力位後,曾於2012年8月14日高見港幣92.55元,因此可以視港幣70.00元和90.00元為中移動(00941:HK)上、下阻力位,而中線位則大約在港幣80.00元。不過由近年中移動(00941:HK)上、下阻力位分別有一浪高於一浪的走勢,因此筆者若果擬建立中移動(00941:HK)無方向性的期權策略,則中線或區域則會定在港幣80.00元和85.00元之間。
確立上阻力位、下阻力位和中線位(或區域)後,每逢中移動(00941:HK)逼近上、下阻力位分別便應該分別沽空認購期權和認沽期權,這種方法操作簡單、靈活、成本低而勝算較高。倘若每逢中移動(00941:HK)進入中線區域後便建立馬鞍式短倉。至於鐵兀鷹近年亦非筆者特別喜好的策略,皆因其額外兩隻價外認購期權和認沽期權的腳令組合成本增加。在實際使用時,筆者可能只用一隻腳,或把上下兩隻價外認購期權和認沽期權的腳放在中移動(00941:HK)上、下阻力位處。

期權長倉嬴無限輸有限,短倉輸無限嬴有限,按道理長倉比短倉有絕對性優勢。但現實中兩種盤路皆有人賺錢,而一般認股證(Warrants)莊家更基本上以類似期權短倉盤路長期在眾股蟻身上賺得令人咋舌的暴利。對於一般人來說,股市長遠來說長升長有和一旦「黑天鵝」出現時其跌幅的駭人的觀念其實已在不少人心中打下烙印,誰還會醒悟到不少股票基本上只是長時間上上落落呢?

PermaLink: https://articles.zkiz.com/?id=38448

派得好投資組合月結 (Dec 2012) / 半年結 PARTIPRAL - ROAD TO FINANCIAL FREEDOM

http://partipral-hk.blogspot.hk/2012/12/dec-2012.html
投資組合現時持股狀況:

49% 恆隆集團(0010.HK)
10% 英皇娛樂酒店 (0296.HK)
7% 中國國航 (0753.HK)
6% 京信通信 (2342.HK)
5% 大快活集團 (0052.HK)
5% 稻香控股 (0573.HK)

18% 現金

投資組合單位面值: 90.33 (1.2% / YTD: +30.3%)

(上月月結: 89.26 / 2010年7月1日起始值: 60.00)

派得好投資組合每日表現

今個月買賣:

5 DEC 買入英皇娛樂酒店10,000股@$1.76
6 DEC 買入稻香控股4,000股@$4.45
11 DEC 買入中國國航2,000股@$5.82
11 DEC 賣出永旺500股@$19.90
12 DEC 買入中國國航2,000股@$5.96
13 DEC 買入壹傳媒10,000股@$1.65
14 DEC 賣出永安國際1,000股@$20.95
17 DEC 買入中國國航2,000股@$6.24
20 DEC 賣出稻香控股4,000股@$4.50
20 DEC 買入京信通信7,000股@$2.98
24 DEC 賣出壹傳媒10,000股@$1.39
28 DEC 賣出中國國航2,000股@$6.45

回顧2012年, 開始時以為會好難捱, 點知年尾計數原來齋買盈富都可以輕鬆贏兩成幾, 金融市場永遠出乎意料之外. 個人組合回報3成, 跑贏恆指少少, 全年計屬中規中矩; 但如果以半年計, 其實並無寸進, 由七月至今自己完全白做, 當中一定有問題出現.

細看當中交易紀錄, 最大打擊當然係聯亞(458)7月底發盈警, 翌日大跌兩成. 加上當時重倉持有此股, 突如其來既意外的確令自己束手無策. 此役大敗, 就算事後回望都唔覺得下次有機會完全避過一劫, 唯一要改善既應該係臨場反應. 如此跳崖式急跌既情況並不罕見, 但當中能夠迅速收復失地既例子其實少之又少, 所以若然類似情況再次出現, 斬在第一日會係明智抉擇. 當市場出現恐慌, 真金白銀作出拋售, 過份堅持價值並非理想出路 - 聯亞至今仍未能收復大跌8月1日低位.

下半年另一個重要打擊係和電(215)買在最高位, 大摩9月4號一份報告係股價逆轉催化劑. 當然我至今仍然堅持本地流動電訊商增長空間仍在, 問題在於當市場開始RISK OFF, 4厘股息回報+盈利穩步增長相對而言已經並不吸引. 和電股價自9月開始不振, 市場情緒改變亦係關鍵之一. 回顧此場敗仗, 情況同聯亞類似, 對價值過份執著而漠視市場力量, 令自己錯失最佳逃生時機. 和電9月5號低位$3.51, 而今日收市價亦只係比僅僅當日高少少. 決心止蝕於微比甚麼價值判斷都來得重要, 永遠不能過份偏離市場意見, 係自己學到既教訓.

經歷過如此失望既半年, 2013年自己會改變打法. 不會放棄長線持股, 如大快活(52), 永安(289)呢類股票, 盈利透明度高而穩定性強, 個人認為仍然值得長期持有. 而長線投資既同時, 自己亦會開始學習捕捉短線機會, 把握短期催化劑例如個股新聞, 行業消息, 指數換馬等等, 提高個人觸覺. 長, 短持倉比例則視乎市況而定, 例如12月至今呢段時間, 其實係有必要加強進攻力, 以免不斷被大市放甩.

研讀股票價值其實並非難事, 如何把握股價反映價值既時機, 先係決定回報高低既關鍵. 無線劇集<<楚漢驕雄>>裡面, 於劉邦掙扎是否應該對項羽背信棄義, 擊其暮歸之際, 張良寄語: "公道不在人心, 是非只在時勢", 正正道出時機何等重要. 只懂分辨股票平貴, 並不代表可以發達. 單純呆坐等運到, 希望終有一日股價會反映心中價值, 所耗時間成本實在太高. 投資路上運氣係重要元素, 但並不是全部. 改變等運到手法, 為操作制訂EXIT STRATEGY, 交易成敗得失會變得較容易量化, 從而做到敗中求勝, 勝中求進.

自己開始加碼於個人組合, 規模比當初大, 開始實驗得到投資技巧是否能夠SCALABLE其實相當重要. 簡易D去講, 打理一個廿萬既組合, 一隻流通量相對較低既細價股揸兩成, 講緊都係4萬錢, 壓力不會太大; 但當組合規模去到五十萬, 甚至一百萬, 要走去揸兩成落一隻細價股, 心理壓力會大得多. 唔係話細價股唔買得, 只係想講如果組合規模細既話, 係可以有能力去把握到好多表面低風險而高回報既投資機會, 組合就算因此而有好表現並不算甚麼特別. 當日後組合壯大, 自然就會慢慢開始發覺以往所用果一套其實已經再用不著. 擴大自己能力圈, 係令自己投資技巧SCALABLE既唯一一途.

展望2013年, 坊間睇得相當牛, 但過份偉大既預測準繩度往往極低. 講緊係一年後既事, 估黎其實都係哂氣. 總之股市一日未見明顯轉弱, 當然要繼續跟炒.

最後祝大家2013年健健康康, 投資順利!
PermaLink: https://articles.zkiz.com/?id=42293

上周更新 (6 JAN - 12 JAN) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/01/6-jan-12-jan.html
本周賣出全數中國國航(753)及京信通信(2342), 兩股其後曾破頂, 自己算係俾人震走左. 個人中線仍然看好兩股, 短線國航超買再超買, 已升越阻力位, 但目前距離突破點太遠, 就算今日走勢明顯偏強, 都唔敢再次追回; 京信破頂後今日急跌, 目前阻力$3.45-$3.6/支持$2.8-$2.9, 現價正處中間位置, 難以操作, 等候低位先再回補.

大市氣氛熾烈, 立心跟炒, 只要制定好撤退策略(EXIT STRATEGY), 就可以義無反顧飛身入場. 牛市勇者勝, 技術含量太低. 自己會短炒華晨(1114), 龍源(916), 但參考價值不大, 純粹作個紀錄. 比較有信念睇得好兼有得搏既, 會係理文化工(746)以及筆克遠東(752).

理文業績起伏大, 盈利高低主要視乎旗下化工產品價格走勢. 上半年國內經濟轉弱, 主要收入來源之一甲烷氯化物平均每噸售價大跌近5成, 以致2012半年業績出現大幅倒退. 個人估計理文2012全年業績都不會太好, 但目前公司正處行業低潮期, P/E講緊都係11倍左右, 憧憬今年國內經濟改善, 公司產品價格以至需求皆有機會反彈. 搏國內經濟見底, 業務週期性甚強之理文化工會係今年重點投資對象. 現價建倉看似高追, 但以估值計其實不算昂貴.

筆克遠東主力從事展覽及項目市場推廣等業務, 2012年上半年已經成功完成多個經常性展覽包括巴林動物產品展, 曼谷國際汽車展及汽車博覽會, 上海滙豐世界高爾夫球錦標賽及新加坡航空展等等. 公司業務穩定, 加上此類展覽, 以至博物館項目, 展覽管理等服務需求永遠只會有增無減, 只要公司確保知名度以及服務質素, 收入來源便可以有所保證, 甚至有能力持續增長. 筆克現價$2.2, 預期往績P/E不足10倍, 息率6%, 估值屬歷史中位數. 短期催化劑係公司1月25號會公佈全年業績, 過去公司業績表現往往可以超出市場預期, 若然最終業績確然理想, 現價買到時當然有信心繼續坐; 但若然有甚麼差池, 都係兩個禮拜內可以決定勝負既事. 隨著近兩日股價出現回吐, 的確提供左一個不錯既買入機會.

最垃圾既股票牛市會爆得最勁, 所以一定要放下身段, 留有資金短炒. 不過要知道股價最終只會向價值靠攏, 垃圾不會突然變成鑽石, 而永遠可以買得大注買得安心既亦只會係優質公司. 因此操作上除左一方面心要夠雄想搏發達, 同時另一方面亦要把握機會買入有基本因素支持既股票, 冀藉市場氣氛改善推高估值. 目前個人投資取態正是如此兩者並行, 日後根據市況再慢慢調節.
PermaLink: https://articles.zkiz.com/?id=42680

派得好投資組合月結 (Feb 2013) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/02/feb-2013.html
投資組合現時持股狀況:


10% 聯想集團 (0992.HK)
10% 海通証劵 (6837.HK)
8% 理文化工 (0746.HK)
4% 大快活集團 (0052.HK)
4% 稻香控股 (0573.HK)

64% 現金

投資組合單位面值: 92.81
月回報: +0.15% / YTD: +2.75%)
(上月月結: 92.67 / 2010年7月1日起始值: 60.00)

派得好投資組合每日表現


二月份指數開始走弱, 個人組合表現則持平, 全賴聯想最後兩日反攻. 話就話係2月月結, 但本文係寫於3月1號收市後, 主因係恆指成份股變動會於3月1號收市前完成, 而自己今個月組合表現亦基本上全繫於一隻聯想(992)之上.

打劫恆指新貴概念自己一路都係信心十足, 所以就算聯想二月中後段曾經跟隨指數調整, 自己亦夠膽低位加注. 好難有一隻股票可以買得咁大, 11月份既恆隆(10), 2月份既聯想(992)就係屬於呢一類. 當然以個股升幅計其實唔算特別, 但因為持倉比重甚高 (聯想曾一度接近5成), 所以兩者對組合回報貢獻皆甚大.

除左恆指新貴外, 三隻MSCI新成員新華保險(1336), 綠城中國(3900)及人保集團(1339)股價表現亦算理想. 如果計公佈日(13/2)後追買, 成績兩勝一和. 自己當時只搏前兩者原因係以為市值較細, 基金買盤對股價推動力應會較大. 事後睇情況當然並非如此, 所以下次應該三隻買齊. 指數換馬呢類故事將來一定會繼續出現, 根據今次經驗, 日後要留意既係指數走弱亦會拖累相關股份表現, 所以初期不應買得太大, 寧願等調整或接近換馬日先再落重注, 心理壓力會較細.

展望三月份會有大量公司公佈業績, 所以自己亦會先提升現金比重留以作短線炒作. 中長線持倉方面, 仍然會繼續搏中國復甦概念, 理文(746), 海通(6837)呢類高BETA股會繼續持有, 低吸可以, 高追則免; 另外亦要開始注視防守股表現, 尤其係當政府再次出招打壓樓市, REITS吸引力應該會相應有所提升.
PermaLink: https://articles.zkiz.com/?id=53261

上周更新 (3 MAR - 9 MAR) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/03/3-mar-9-mar.html
上周初投資組合加入置富(778)及永安(289)兩隻實物資產型收租股票, 前者賣點係希望政府再度出招打擊樓市後會對REITS帶來正面影響, 現價$6.77來年有起碼5厘息打底雖然唔算非常吸引, 但亦係相當穩陣, 算係愈低愈值得買既股票, 萬一急需資金換馬, 股票流通性亦夠高, 算係比揸現金好; 至於永安(289)亦係收租類股票, 半年前已經開始睇好, 早前曾因換馬恆隆(10)而沽出, 長線穩陣到爆之餘, 短期催化劑係月內會公佈業績, 雖然股價已在高位, 但派息可以有驚喜, 要買就趁早買定.

周中趁低吸納時代集團(1023), 正如早前留言所講, 公司中期業績比想像中失望, 但現價$3.6相當於P/E不足10倍又不算貴. 已經還清所有債務, 預期資本開支不足1億, 2013年其實有相當條件提升派息率至60-70%, 即全年每股派$0.22-$0.26或2.2-2.6億. 中期業績已經將市場預期完全扭曲, 股價未來半年表現應該不會太好, 所以操作上係先買基本注坐住先, 下一站等IPO價先再接. 周中亦有趁恆隆(10)急跌接貨, 後來先知應該係股東Davis Advisors沽貨套現, 出貨位$47可能係短期阻力, 所以暫時唔會再加注.

另外亦賣出海通證劵(6837)換馬敏華(1999), A股走勢太難捉摸, 相對於美股節節破頂實在太大對比. 美國進一步確認經濟復甦勢頭, 出口股點都要有. 早前創科(669)被震走, 又唔想現價高追, 敏華(1999)估值相對地仍算可以接受, 所以轉買呢隻; 周四加注理文化工(746), 主因比較奇怪下半年好似少左個盈警, 公司業績有權大幅進步. 加上早前指數急跌理文亦無進一步破底, 現價應該有得搏, 反正18號會出業績, 個多星期就會決勝負, 而有關呢轉上市公司中期業績前有出盈警而全年無出既情況我稍後會再於另文討論.

星期五下午建滔系公佈業績, 子公司建滔積層板(1888)下半年毛利率進一步轉差, 但生意則明顯好轉, 出奇地增派息之餘, 業績報告之中亦可以睇中管理層對來年公司表現甚具信心. 若然業績確然已於2012年上半年見底, 現價$3.9講緊往績10倍P/E左右絕不算貴, 所以當日下午開市後自己已經不問價小注追入. 短期內應該會有數間大行調升目標價, 暫時會繼續持有, 有機會再加注.

預期建滔呢類"業績比預期好"既情況於三月份會陸續出現, 所以呢轉業績期一定要打醒十二分精神留意. 自己亦多得CITIBANK取消最低佣金收費, 至年底買賣股票佣金一律0.2%, 所以可以將注碼打得好散, 分段買或買多幾隻都唔駛太擔心手續費問題, CITIBANK今次值得一讚.
PermaLink: https://articles.zkiz.com/?id=53493

Next Page

ZKIZ Archives @ 2019