細女變Punk妹 翁靜晶嘆冇符幸儀Selfie晒腹肌 心心遮兩點
1 :
GS(14)@2016-01-23 19:27:02【對鏡自拍】■翁靜晶細女劉幸儀常在Ig騷肌肉相，翁靜晶認為從健身角度看冇猥瑣感覺。
翁靜晶與亡夫劉家良育有兩女兒，細女劉幸儀日前被媽媽爆料，將與拍拖兩年的意籍男友Roberto（蘿蔔）訂婚。幸儀雖然已在英國完成法律系學位，但興趣和職業都是健身，在她的Instagram內發現不少揭衫騷肌肉相，清晰見到苦練得來的腹肌和馬甲線，其中一張更大膽將衫掀高至胸上位置，僅用心心遮住兩點。
「梗係想佢包到實」
翁靜晶昨日在電話中似乎冇晒符，嘆謂：「佢係似男仔，所以結到婚我都好高興！」囡囡是否太性感？她說：「做阿媽梗係想佢包到實，好似女仔咁着住公主裙啦，但佢唔係呢種人，就係鍾意晒紋身、騷肌肉，佢哋睇身上嘅肉係冇猥瑣感覺，注重人體肌肉比例，佢係健身教練，自己係一個辦嚟。佢之前騷過手臂，仲粗過男仔大髀呀，搵到個同佢一樣鍾意健身，又肯娶佢咪好彩囉。」
【腰腳紋身】■幸儀展示健身成果，僅以心心圖案遮胸，最近又與男友在腳紋情侶梨形紋身。
【鏟青型女】■早前幸儀剪了一頭鏟青punk髮。
■幸儀遇上惜花男，與意籍男友Roberto將訂婚。
■大女萬儀（中）和細女幸儀（左），均遺傳父親劉家良的好動及媽媽翁靜晶的聰慧，文武雙全。
幸儀還將右邊秀髮鏟青勁punk，手臂、背脊、腹部均有紋身，而最新一個就是與未婚夫一齊紋的啤梨圖案，翁靜晶沒好氣說：「Pear即係pair喎，你話暈唔暈？」幸儀遺傳父親好動個性，還有媽媽的聰明才智，她早前打算升讀博士學位，可惜希望研究課題太偏門找不到合適學校，翁靜晶解釋：「佢篇碩士論文係研究比特幣點樣可以成為一種合法及流通貨幣，論文登晒上周刊，可惜英國嗰邊導師通常都係舊學者，冇人可以指導及同佢一齊研究。」是否希望女兒能成為律師？翁靜晶大講反話：「我希望佢做健身教練，練多啲肌肉出嚟，多啲紋身，繼續喺Ig騷多啲，因為知佢最鍾意倒轉嚟做㗎嘛！我諗有一日我都變成銅皮鐵骨，佢就會變番做一個真正嘅女仔，佢喺我心中係藍寶石公主。」採訪：嵐山
來源:
http://hk.apple.nextmedia.com/entertainment/art/20160123/19463408