📖 ZKIZ Archives

這是一個悲傷的故事。一三年，香港電視（1137）主席王維基成為當年《壹週刊》的風雲人物，題目 是：「無限復活」。幾經風雨後，《壹週刊》告別雙書版，今期以合併版重新上路。而原以為靠網絡電視復活的王維基，最終打敗仗，變身網購平台 HKTVmall再出發。可惜，這個走位王、香港仔精神的代表，卻交出一份令人大跌眼鏡的劇本。拿着最後一張牌，王維基怯了，既不敢向各大超市宣戰，亦沒 有「新招」，由經營模式到網站設計，由供應商到客戶，批評聲音不絕。這場仗，即使未定輸贏，但可以肯定的是，「魔童」已死。

「每一次都盡地一煲」，是王維基做生意的格言，更何況，今次可能是最後一戰。一口氣包下全香港五十一個港鐵站的月台賣廣告，他是第一人，氣勢依然。做不成 影視大亨，向來自視甚高、作風強硬的王維基，不惜放下身段，先於facebook親自跟單，上星期六再「連戲」，落區跟車送貨，更「碰巧」給傳媒拍下照 片。不過，做show容易，要做全港最大的網購平台，卻言之尚早。記者嘗試在HKTVmall訂貨，發現甩漏甚多，令人氣結。

測試肥佬 客戶硬食

週日下午，記者在家中登入HKTVmall購物，網頁聲稱「最快二十四小時送貨」，要留意「最快」二字，因為原來絕大部分貨品，包括隨街買到的日用品，由 港視送貨，最快要本週三才到貨，前後需時達四天。唯獨幾間賣急凍海產的商店，指可以於翌日中午十二時至下午六時送貨，但寫明是該商店自己安排宅急便，而非 港視。記者最後買了松葉蟹腳刺身及帆立貝刺身，合共七百多元。但到星期一下午，仍未收到送貨電話，遂向港視及該商戶查詢。商戶推搪要就截單時間，星期二才 送貨，港視客服則承認：「產品訊息有少少誤導。」指可安排退貨，但不能退現金，而是港視的Mall Dollar。至星期二中午，送遞員竟然沒有通知記者，就將刺身食品放在本刊傳遞處便離去，十分離譜。

另一張購買了零食及日用品的訂單，原寫明是星期三送貨，但其中一件二十九元忌廉泡芙，突然於星期二提早送到，令人啼笑皆非。而HKTVmall 的facebook，也有不少一張單分幾次送貨的投訴，不但得失客人，計及運輸成本，港視分分鐘倒蝕。王維基曾透露，在宣傳攻勢下，網購生意上升近六倍， 一日約有五百張單。區區五百張單，已令港視疲於奔命，一出閘便甩轆。

甩轆一：不責貨 玩殘物流

王維基曾指港視網購經營模式類似亞馬遜（Amazon），或者如同一個商場，客人在不同商店訂貨後，港視再派員工去取貨及送貨。目前約七萬種貨品中，港視 僅坐貨約一成。如此一來，物流成為關鍵，運輸成本亦不菲。在港視上架的嬰兒用品商王小姐透露：「試過有港島嘅客只係同我買一條口水肩，港視都老遠入來新界 同我拎貨，然後再送出去，佢咁做都花好多人力物力。」阿信屋老闆林偉駿指在與王維基見面時，已提出物流負荷的問題，「佢話未來會有三百架貨車在香港行駛， 實搞得掂，但我心諗，唔係咁簡單囉。」林偉駿說。

甩轆二：食水深 出貨慢

有在港視上架的商店透露，雖然沒有上架費，但每賣一件貨，港視的拆賬高達三成五，較同樣不收上架費的一田超市，高出百分之五。該商戶直言港視「食水深」： 「一田人流多佢咁多，又有銷量保證，都只係收三成咋，港視去貨慢，上咗架半年，依家都只係佔我生意額嘅百分之三到五，反而一田佔咗兩成。」有行家表示，過 去半年港視網購缺乏宣傳，銷情麻麻，「聽講佢哋年頭同P&G訂咗批貨，之後都冇再加單。可能生意唔好，佢哋原本有八個採購員，炒咗六個。」

甩轆三：貼市價 網民呻笨

講起網購，香港人幫襯得最多的一定是淘寶，貪其價格便宜，貨品種類多又過癮。而港視網購的大部分貨品，均是大路品牌，基本上與超市或百貨公司無異，部分貨 品標價驚人，包括萬幾二萬元的衣服，以及近三、四萬元的周大福鑽戒。不過，最令網友失望是，曾靠殺價打倒巨人而成名的王維基，今次為怕得罪地產商及超市， 竟乖乖跟從供應商的建議零售價，更委派六名員工到超市抄價，以做到「貼價」。記者將港視部分產品和百佳相同貨品格價，發現未計港視今次配合大型宣傳而做的 一成Mall Dollar回贈，貨品價格居然和百佳相同，部分更貴過百佳，例如維他檸檬茶六包裝，港視標價近十六元，較百佳貴近百分之七，固力果番茄百力滋等港人至愛 零食，標價近十九元，貴百佳足足約六成。其他如皇冠牌紙巾、喜力啤酒、部分浴室產品及食米等價錢相同，完全看不出價格優勢。

甩轆四：網頁設計差

網頁設計是網購能否吸引客人落單的重要因素之一。港視開放平台予商店自行上載貨品，嬰兒用品商王小姐指網頁設計不能幫助賣貨，「我upload十條紗巾， 就排在最前十格，而唔係將熱賣產品擺前面。」而曾獲王維基親自上門邀請加盟的一個本地網購平台負責人亦表示，港視網頁設計過時，「佢哋仲係一格格咁 show貨品，但依家網購嘅產品都要拍片，有晒細節位。我最後拒絕咗，因為佢竟然想做主導，控制我盤生意，唔通我要俾埋啲會員資訊你？呢啲係我財產嚟！」

倒四億半落海

是次急攻網購，皆因王維基要為公司找一個新故事。今年六月，港視發出盈警，預期截至六月底止中期虧損將會大增，主要歸咎於網絡電視業務不斷燒錢。公司股價 由去年十一月高位累跌五成四。轉捩點要追溯至一二年，王維基以五十億元將香港寬頻賣給私募基金CVC，其中約二十億元以特別息派發，餘下彈藥用來進軍電視 業，可惜不獲政府發牌。但旗下多部熱門劇集，如《警界線》及《選戰》等，在網上播放時，獲網民激讚。不過，讚還讚，雙眼卻很誠實，港視收視由每日最高峰的 二十萬人次，跌到約二萬人。王維基被迫公開承認「電視無得做」。

根據年報，過去兩年多，公司燒錢超過四點五億元，亦玩殘員工，有舊員工在網上批評王維基只懂得做show：「扮埋送貨員，但又叫記者影相，製作部啲員工先 俾佢玩得慘，裁員後又叫員工返嚟幫手，之後再裁過！有冇搞錯！」電視大亨之後，到網購大亨，王維基的故事，你還相信嗎？

而我不知道林偉駿是誰？

去年四月，王維基和阿信屋老闆各自於facebook上載了一張合照，暗示雙方有意合作搞網購。林偉駿表示，當日王維基親自上門傾談合作，邀請他加入成為 其網購平台旗下商店，「佢帶咗一班員工上嚟傾，但佢啲同事個個都唔敢出聲，好驚個老闆咁。」他指當時感覺王維基作風甚為強勢。

最終合作告吹，林偉駿指可能因為港視標榜不賣水貨，「佢要賣本地供應商嘅貨，咁肯定唔受我玩啦，因為我賣日本水貨，而且得罪晒本地超市同埋供應商，王維基 邊夠膽再同我合作喎。」對於王維基曾暗踩阿信屋定價太低、「做爛市」，林偉駿指對其言論感到意外，並反擊：「大家都知阿信屋賣得平，我覺得佢唔太了解香港 零售市場，嗰次佢同我傾生意，話以前搞寬頻都係用自己車隊，網購物流一定搞得掂，我聽完都費事再出聲，邊有咁簡單喎。」至於王維基，則索性玩失憶，不但否 認曾與阿信屋傾合作，更反問記者：「林偉駿係邊個？」

撰文：陳新政

插圖：祝健中

[email protected]

謎面：哪一間公司愈做愈細，卻愈搞愈大，仲成功在主板上市？謎底：良斯集團（1683）。這個名 字，聽起來陌生，但只要你入過示範單位，都應該看過良斯老闆梁興隆（Rudolf）的作品。當中有新地（16）的天璽、瓏璽到瓏門，信和（83）的御龍山 及天賦海灣等等。買唔起、無睇過？近日九建（34）百幾呎、十五萬首期就可上車的新盤環海•東岸細單位，也是出自他手筆。Rudolf人生第一單生意是種 植道56號、逾四千呎獨立屋；最新的生意，是無數的劏房。「愈做愈細」是指他設計的單位呎數，這個gag雖然「爛」，但在這充滿荒誕的社會，卻是事實。 Rudolf在行內，出名：「快！」試過最快二十八日起貨，正好合乎發展商賣樓步伐，結果做到主板上市。從他的工作，正可看到現今樓市的光怪陸離。

要設計「劏房」單位，在Rudolf眼中並不太難：「都係睇比例，大單位設計豐富啲囉，細單位嘅，傢俬細件啲薄啲。」他帶記者參觀嘉華新盤嘉悅，實用面積 八百多呎，客廳中的裝飾燈在美國訂製，屬一九二八年的設計、牆上藝術掛飾找來法國畫家繪畫。他不時去米蘭尋找特色傢具，「我哋負責令人有個dream，感 覺你第日屋間都可以咁靚。」走入小主人房間，牆上掛了Ferrari跑車模型，Rudolf加多句：「係Limited Edition嚟o架。」的確好夢幻，但只要看真一點，就會發現傢俬尺寸大玩「視覺效果」。當買家夢醒時，會發覺房間連放個衣櫃都要度過，別說裝飾品。

16、83大客

記者說書枱根本唔夠大，Rudolf說：「其實依家啲細路都係用laptop computer，咁大張枱你都係擺一排書，但新一代係好少書。」去到小公主房間……衣櫃太細了吧？他反對說：「小朋友日日都大，每年都換晒啲衫o架。」 他的最新傑作是九建Upper East，實用面積只有二百呎，「其實可以話係酒店房，放完裝飾，都仲住得到喎﹗我自己第一個單位都係百六呎，喺摩羅廟街。係人都鍾意住大單位，但你都要 上咗車先。」間屋有幾大，並不到Rudolf話事；但要設計劏房單位，發揮空間有幾多？Rudolf 小心回答：「其實對我嚟講有新鮮感就開心o架喇。」愈做愈「細」，收入又少咗幾多？「我唔會每單計住，熟客叫你做，你就要做。」良斯剛在港交所上市，市值 五億；翻開上市文件，收入根據設計成本及所需時間計算。當一二年大單位當道，來自香港區平均每單收入約一千萬，一五年流行細單位，平均每單收入當堂少一 半，只有五、六百萬，去年集團純利二千多萬元。如Rudolf所言，接咩job他無得揀，「係o架，我哋呢行好被動。唔通我哋同發展商講：『你搵我啦，你 搵我啦！』你做得好，人哋賣得好，第日就會搵番你。」他的大客包括新地（16）和信和（83），其上市編號1683，正代表兩者，「港交所俾我揀，咁啱o 架咋，不過我哋無1號（長和）同683（嘉里建設）囉。」他的客還有嘉華及九建，「下一間上市會用佢哋number，哈哈。」

28日搞掂

他說，市場上做到設計及裝修一條龍的建築公司不算多，而發展商找他全因他起貨快，「其他設計公司設計完先去搵材料，我哋倒轉。負責訂布嗰班伙記，會 keep住睇定有無貨，幾時嚟？我哋裝修判頭亦會喺內地搵定有幾多石、有乜顏色？」每次設計前，Rudolf已具體掌握該樓盤主題，加快進度：「好似天璽 呢個project，新地同我哋講主題係關於石，我就搵定一千呎石頭、四百呎黃石，二百呎灰石、六百呎白石，買落嚟立即界石，然後我才仔細設計。如果等 我畫完晒設計才訂貨，已做唔切。」他知道現時的發展商，賣樓步伐可以突然好急，「平時好多生意，由畫完加裝修，要三個月起貨，仲試過二十八日就要起貨，好 有time constraints。個客搵晒廣告公司，賣晒電視，tight schedule。唔可以做錯任何一樣嘢，訂嘅嘢、工程唔可以遲到，訂意大利燈返嚟，日日都要搵人打電話催。無咗，又唔可以搵啲唔同級數嘅嘢代替。」太太 Christina都是設計師，和他一同創辦這間公司，他屬於什麼類型的設計師，Christina最清楚，她說：「佢係比較商業。他設計時會諗work 唔work呢，實唔實用呢，或者個客人想要乜呢，呢啲我設計時唔會諗。」Rudolf笑言：「你想用一件傢俬，但件嘢要七個月先訂到返嚟，無得等時，你都 無可能用o架。」Rudolf是實際派，記者走上這位設計師位於寶珊道的家，充滿期待，但打開門沒有「嘩」一聲的感覺，裝修感覺舒服整齊，「我呢度住咗十 幾年無裝修過，最緊要襟睇。設計住家樓，你玩cyber感覺，半年就唔興。」他指着有森林feel的牆紙說：「同外面好多樹個景好襯，悶咗換牆紙就得。」

4000呎種植道

Rudolf口裡說只要有新鮮感的都喜歡做，但記者和他交談，發現他最侃侃而談的都是「那些年」的新盤，劏房欠奉，像信和○五年賣的將軍澳蔚藍灣畔，「信 和同我講，爭兩個細單位，咁我哋就幫佢設計咗一個his and her單位。」他會代入買家的身份來設計，「我心目中嘅his係攝影師住，her係一個fashion designer。」一邊翻開作品集，他一邊手舞足蹈說：「啲燈好似美國loft咁，呢度有啲相機，係我去深水埗搵啲舊機音響返嚟，好有味道。」可惜的 是，今時今日的攝影師又或者時裝設計師，要上車並不容易。單位售價高，他現在很多時都要代入內地人、富二代、有錢人的角色，「市場係變咗，以前將軍澳嘅 樓，真係賣俾up and coming嘅professional，唔一定係律師醫生，依家好多樓價貴，設計要走奢華路線，唔可以再砌一個rough嘅磚喺度。」他心目中更好的設 計，要「倒退」到一九九七年。當年他先後在本港著名則樓王董及P&T做則師，後來他和太太及另一拍檔出來創業，開了林周梁建築師樓，做畫則兼室內 設計。第一單job便是九巴雷氏持有的山頂種植五十六號六間獨立屋。「業主搞咗個比賽，搵咗六個則師參加，呢單job有啲複雜，地契要起兩幢樓，但個客就 想做獨立屋，於是要補地價。」他們設計了六間獨立屋，但只用兩個基座，兩個入口，這便不需要補地價，「慳咗兩、三億，對業主嚟講係好多錢。」贏得這單生 意，一做三、四年，賺了幾百萬；亦因此贏了業界一個大獎，後來新地看了他們的獲獎報導，就開始找他們合作，第一單是何文田山道、後來是倚巒、天璽。問他廿 年來最滿意的工作，二話不說，答：「種植道五十六號。有啲則樓可能做一世都無一個獎。」

$16萬上車

時來運到，後來他知九建始創中心的重建招標，即時入標，除了設計及裝修，還負責建築，可是在建築上，他還是新仔，不過當時有名的建築商，都不接小生意，去 了起新機場及其他基建工程，「可以話right time at the right place。始創舊時有戲院，要拆咗佢改做餐廳。改晒啲間隔，拆晒啲石屎，工程好大，無乜人肯做，同埋我哋出個價錢平人哋一半。」他把公司搬到始創內，日 做夜做，結果準時完工，後來九建要起示範單位，都找他合作。做過則師、建築師，但最喜歡的是做室內設計，「起樓風險太大；做則師畫四條線，設計係一個唔同 嘅行業嚟嘅，好多嘢要揀顏色呀，做到好有feel。」Rudolf八九年在澳洲西澳大學建築系畢業，後來在當地就業，遇上經濟轉差，做了幾個月就被裁員， 回港搵工，「我老豆同阿媽生活好OK，但佢哋思想好西化，唔會俾錢我。」他的上車首期都是靠自己，大家恨不得：「當時樓市好熱，興炒籌。我排隊拿到個籌買 樓，但其實我無錢買，就嚟到我揀樓，我心諗有無人搵我？有無人搵我？最終都有，個籌我賺咗十六萬。未見過十六萬現金，做咗摩羅廟街層樓筆首期。」後來換樓 買了六百呎堅尼地城慧華閣，遇上九七年金融風暴，當時慧華閣呎價一萬二千元，樓價唔見一半。但十多年過去，樓價已返家鄉，他亦把單位賣掉，「做咗廿年，年 年都話啲樓貴。我諗番，如果我每做一個樓盤都買一間，我依家就發達啦！」

撰文：梁佩均攝影：關永浩攝錄：陳浩樂[email protected]