📖 ZKIZ Archives

Selfie（自拍）是不少年輕人的指定動作，Photo booth（影相攤位）更是近年婚禮場地的重點布置。本身是攝影師的蕭國煒（Sam），早已知傳統攝影行業無出路，決心轉型，四年前見自拍熱盛行，自組公司PhotoGIFT，組裝第一部「自拍攝影機」，打造成公司的生招牌。不過坊間同類型公司，多達十數間。Sam為搏出位，除了上TVB的創業節目、幫機器申請專利，又以單鏡反光機取代web cam。Sam還看穿港女心理：「港女最緊要靚、要唔同、要瘦！所以我設計Photo booth時特意將鏡頭調高，造成高抄效果，咁就可以做到V面同白啲！好多人以為港女玩起上嚟最癲，其實四、五十歲的媽媽級先玩得最投入，因為佢哋連貼紙相都未試過！」

這個星期天是情人節，PhotoGIFT獲海景嘉福酒店邀請，放置Photo booth，供餐廳客人拍照。Sam設置機器時，員工不時「眼望望」，指第一次看見這部機器。完成設置後酒店率先安排員工試玩，幸運被抽中的員工，立即用假髮、眼鏡等道具裝扮一番。由於Photo booth設定四秒一張，員工在拍第二張時明顯手忙腳亂，笑着「投訴」：「咁快o架！」而其他員工在旁亦不斷央求經理，在落場時給她們試玩。到了正式供客人玩時，不少年輕情侶相當熟手，在排隊時先用自己的電話與Photo booth「自拍」。有內地遊客更誤以為是拍證件相的相機，向記者表示：「其實在內地都很多，但有道具裝扮都是第一次！」

參加比賽當宣傳

一部Photo booth，成本只是六萬元，平均租出幾次已經回本。由於成本低、錢易賺，近年市場加入了大量競爭者。為了突圍，Sam使出了三招。其一，Sam不斷參加創業比賽，搏可以免費宣傳：「呢行都好少人參加創業比賽，可能大家都怕麻煩，但係我覺得當聽意見都好。好似近期就參加滙豐青年創業大獎。講到最大影響力都係TVB《我要做老闆》，仲贏咗七萬蚊現金獎。」當時贏出比賽的原因，是Sam本身有做開婚紗攝影，開拓生意有人脈優勢；而Sam亦甚懂「生意」，Photo booth只是其他連帶生意的契機，Sam會與酒店或婚禮客傾拍攝硬照等。Sam坦言電視威力強勁，《我要做老闆》出街後營業額升近三成。雖然公司知名度明顯提升，但競爭者亦更多：「部機其實好易copy，節目出咗街吸引咗人哋去抄，甚至有其他公司拎我上電視條片去自己公司播。」參加比賽除了提升形象，亦讓Sam學會如何改善營運：「參加咁多比賽，當然都試過輸，但評判俾嘅意見，對於點run間公司都好有用。好似試過有評判問我每一個月增長有幾多，我之前只係每年去計，但咁就計唔到每一季嘅投資應該點分配。」

預先註冊免抄襲

Sam當初成立了公司不久，就註冊了自己組裝的攝影機外形，自抬身價：「呢部機上下都有燈箱，中間有mon同鏡頭，比起其他攝影機，呢個設計嘅好處係多咗一個燈箱，咁影大人下半身同小朋友時就夠光，唔會影到黑沉沉。」坊間試過有公司也是這樣設計，Sam接觸並了解後對方立即改回，結果照片效果就不及Sam。除了外觀，整個Photo booth的不少配套細節，都經歷了不少轉變。「一開始淨係白色，到婚禮時有啲老人家話唔鍾意，就開始由顏色着手，嚟緊下一代就會諗點縮細部攝影機嘅size。」現時Photo booth加入了如貼紙相機的light printing（光影塗鴉）服務，甚至加裝風扇，營造「風馳電掣」效果。而八、九十後興社交網絡，他亦緊貼潮流，直接將相片上傳到Instagram，以及可即時傳到客人的電郵。至於道具方面，已經由「愈買愈多」進展到為客人度身訂做：「好似月頭出席咗SK-II嘅Instagram宣傳活動，我就特別訂製幾個hashtag紙牌俾佢哋！」

反其道加價

現時Sam的客戶以商業客為主，由於跟酒店及婚禮專門店合作，將Photo booth包含在酒店或專門店的婚宴服務內，Sam已甚少接街客：「接公司客每單平均有一萬多元進賬，比起做婚禮攝影，由籌備到完成婚宴，最少要用一年時間。搞Photo booth準備時間只係一個星期，計起上嚟投放嘅資源少好多。」上年年尾，香港整體市況下滑，不少公司都要cut budget之際，Sam卻逆市加價一成：「我哋公司收七千幾，比街外高兩成左右。公司搞一個event要使成百萬，你加多個Photo booth都只係一萬幾千，好多公司都願意花多啲錢去用一間信得過嘅公司。」Sam指出加價後反而有「回頭客」：「啲客試過街外好平嘅公司，知道差異喺邊。」他解釋：「我哋部Photo booth，會用單鏡反光機，而每次都會有兩位同事跟住，其中一位仲要係專業攝影師。由於在場地預先度好距離，所以好多時一take過就得。」坊間有不少平價Photo booth都是用web cam，在場沒有職員協助，若質素差令人掃興。

港女最緊要瘦

Sam入了攝影界超過十年，見盡不少要求高的客人，應付他們早有心得：「港女最緊要靚、要唔同、要瘦，所以我設計Photo booth時特登將鏡頭調高，造成高抄效果，咁就可以做到V面同白啲！好多人都以為港女玩起上嚟最癲，其實四、五十歲的媽媽級先玩得最投入，因為佢哋連貼紙相都未試過玩！」他指反而澳門人接受能力較低：「雖然好似有晒賭場，好似好新潮，其實嗰邊嘅人思想明顯守舊啲，佢哋見到部機都覺得好新奇，要講多兩句先肯嚟玩。」Sam指出，未來會利用自拍的優勢去尋找更加多商機：「比賽嗰時好多評判都認為要多元化，依家Photo booth實際佔我哋收入四成左右，但係好多公司都係因為佢而用我哋其他攝影服務，好似影場地相、拍宣傳片等等，今年目標就係幫中小企拍宣傳片，幫到人又幫到自己！」

開業成本*（01/2012）租金（兩按一上）：$27,000器材：$20,000 雜項：$11,000 總投資：$58,000 *開業前期並未有第一部Photo booth

營業資料（12/2015）營業額：$500,000 租金：$28,000 人工：$250,000（連老闆在內，共十名全職）器材：$72,000 雜費：$50,000 盈利：$100,000

壹點意見

香港青年協會督導主任鄧良順（Gary），曾在《我要做老闆》中給予PhotoGIFT正面評價，並提供資金。他指出Sam獲勝後，一直有留意他的公司，並作出以下意見：

要慎重考慮加價

Gary指：「佢用加價嚟同做市場做分野無可厚非，但係市況環境唔算好，而佢提出一啲非必要服務，有時就會因價格嘅差異而轉去其他公司。我建議市況再差落去，就要同客戶傾吓提供優惠。」

老闆定位要轉變

Gary表示現時公司發展到一定規模，應考慮退出前線：「前線同管理層兩方面需要嘅技巧都唔同，好似請幾多人，要買咩器材，點去做推廣，都要有宏觀嘅睇法，我覺得係時候考慮係唔係由前線隱退。」

撰文：梁延宇攝影：鄭樹清攝錄：廖健昌、陳浩樂[email protected]

自由行不來香港，大商場的鐘錶、珠寶店首先頂唔順，時代廣場更驚現廿六間吉鋪，九倉發言人解畫只是轉商鋪組合。Selfie Caf今年五月於時代廣場開張，老闆陳錦棠爆出實情，指時代廣場是為救亡，減租力邀他進駐，「其實時代廣場無人行，要行街都去希慎、利舞臺啦。我計過八樓人流閒日得八十人！」老闆阿棠自稱投機者，於旺中開過八間鋪、開過五間貢茶店、兩間乳酪雪糕店，今次決定唔跟風要帶起潮流。Selfie Caf賣點是將靚相印上咖啡、馬卡龍，立即成為獨一無二的呃like神器，今年情人節於網上試業，在零宣傳下做了十多萬生意。他選擇在人流稀少的時代廣場開業，說寧願現時賺少啲，希望今個品牌可以長做長有。

在這個呃like搶hitrate大時代，擺pose自拍、配感性status，已成為很多人生活習慣。阿棠決定助大眾一臂之力，上年尾從日本引入食用墨水打印機，在各種甜品，棉花糖、馬卡龍、咖啡都能印上相片，要po相呃like就更簡單啦。客人只要將靚相以WhatsApp傳到指定號碼或上傳到Selfie Caf的手機app上，普通甜品十五分鐘即變呃like神器。

時代廣場力邀

生意上年十二月於網上開始，阿棠以兩個月時間累積人氣，情人節一炮做十多萬生意，阿棠即刻四出搵鋪大搞。撞正時代廣場無生意，力邀阿棠進駐旺一旺個場，「自由行先嚟買奢侈品，無自由行咪想我帶後生仔過嚟。」阿棠當時攝高枕頭諗，「時代廣場八樓閒日人流，八十幾個，一定無做地鋪賺咁多，但品牌會高檔好多。」最後他決定先做靚品牌，之後先全力搵真銀。預了要捱，但未想過未見官先要打三十大板。三月頭簽約，拖到五月開張，阿棠話裝修搞成兩個月，累他白蝕了大半個月租金，「淨係條柱點黐個poster已經要傾兩次，試防水台，原本預計三日，最後試咗十二日。」他之前做貢茶、乳酪雪糕，只需幾星期便裝修好。另外時代廣場要求商場關門後才能裝修，裝修工人開夜工要三千元一晚。蝕租，裝修費又貴一截，硬食。終於開張，但試業期每日做得千幾二千蚊生意，賺埋唔夠俾租。他馬上炒人、推優惠，「嚟時代廣場嘅都係闊太，開頭嗰班員工做開快餐無服務質素，喺店面黑面、玩手機，啲客都唔想入嚟。」換過一班員工，他再推「加Tag有九折」優惠，生意立即幾級跳，「原本八樓真係無人行，加咗個優惠，啲客喺社交媒體貼相tag我哋，即刻睇到多咗人嚟，我哋依家每日做到近萬蚊生意。」採訪當日，兩位女士正係被朋友Facebook的相吸引，趁放假前來一試。見到靚相印出來，兩人心花怒放，立即拍照，還說要帶其他朋友來。捧場客自動自覺放上網打卡，幫阿棠慳了一筆宣傳費。短短兩個月，生意三級跳。

開caf唔請咖啡師

接多幾倍客，阿棠都唔肯請人，仍然得三個員工。他說不是壓搾員工，而是工序簡單，以咖啡機沖及用打印機印相，連咖啡師都不用，「請普通店員比咖啡師平八千蚊，嗰部咖啡機十三萬，貴普通機兩倍。但好處係全自動，㩒個掣就出到咖啡。」阿棠指那是由經營貢茶中學到的概念，珍珠奶茶在香港火速流行時，他加盟貢茶，插旗銅鑼灣世貿廣場，日賣二千杯奶茶。豬籠極速入水，兩個月後他已經決定開分店，「我係比較投機、進取。見生意咁好，九個月內開咗五間分店，最好賺係上環地鐵站附近，因為寫字樓多，單做外賣每日都有一萬蚊生意。」兜一大個圈是解釋為何買貴機，「貢茶點解開得咁易？因為有部機，全部跟程序做，唔使train到每個人沖到同一個味。」今次他亦是考慮將來會開分店，所以寧可買一部貴的咖啡機。

十三年創業路

阿棠做貢茶前試過在旺中開鋪，同樣搏命。「會考得兩分，唔想打工，所以同屋企人借幾萬蚊，同女朋友喺旺中開女裝牛仔褲店。」三年間他極速彈起，在香港開了十七間鋪，其中旺中佔八間，「我包起成間廠幫我做獨家款，衫領、顏色、袖口全部改，淨係供貨俾我，開頭量小就包大陸家庭式廠。嗰陣五個阿姐忙到淨係用腰包收錢，都唔得閒慢慢用收銀機。」因做服裝最重要來貨價平，所以分店愈開愈多，高峰時月做近百萬生意。不過旺中後來惡性競爭，商鋪間寧願不賺錢也要頂死對方，他便轉型做飲食業的生意。加盟貢茶兩年間勁賺二百多萬，後來另一熱潮乳酪雪糕興起，他食髓知味，轉做乳酪雪糕，但很快蝕讓，「乳酪雪糕半年開咗七十間，好快飽和。」之後他做過北角雞蛋仔、旺角摩豆，今次為要瞓身做Selfie Caf，把心一橫將那些小生意賣盤。阿棠經歷過幾次潮流更迭轉換，深知香港人很貪新鮮，他預計熱潮會持續九個月，所以早早已經定好將來的發展，「依家已經同一間叫BU嘅公司傾，佢哋有好多Marvel、迪士尼卡通license，有電影上映，就可以同佢哋合作，食埋嗰條水。」

鋪路走出香港

阿棠甚至已經鋪路發展海外市場，進入時代廣場建立品牌形象是其第一步，「同大公司合作，佢哋見你係時代廣場會有個信心。」他短短兩個月已經與7-ELEVEN、新世紀廣場、香港空運貨站合作過。香港空運貨站上星期四十周年，向他們訂購了一批馬卡龍及租用他們的印刷機。就製成品的質素、印刷機的安全性、操作等問題，雙方來來回回可能要商討近十次。阿棠爭取的不是幾萬元生意，他是為打入各地產商的一線商場作準備，「7-ELEVEN背後是牛奶公司，新世紀背後是新地，香港空運貨站背後是怡和、九倉、長實。佢哋啲商場唔係有錢就入到，今次合作得好，會有一個關係，將來人哋先會考慮我哋。」不過連誠哥都睇淡香港密密撤資，阿棠眼光亦不放在香港，香港只是他的踏腳石，讓他打好基礎進軍台灣、澳門以及內地市場。

營業資料（07/16）

營業額：$320,000 人工#：$42,000 租金：$60,000 雜費：$18,000 食材：$76,000 盈利：$124,000#三名員工

開業資料（05/16）

裝修：$580,000 租金#：$180,000 食材：$80,000 器材、儀器：$380,000 雜費：$30,000 總投資：$1,250,000#二按一上

撰文：孫樂祈攝影、攝錄：鄭樹清[email protected]