自言重組最後機會E-kids踩新人質素
1 :
GS(14)@2016-09-10 13:54:45■02年出道的E-kids重組，還找來前經理人簡文滌幫手。
【《蘋果》專訪】男子組合E-kids於02年出道，由阮民安（Tommy）、林詠倫（Alan）和郁禮賢（Tim）組成，四年後因唱片公司Stareast倒閉而解散，今年正式重組，雖然沒有成為娛樂頭條，卻在網絡世界像都市傳說般被流傳着，像他們的《開始戀愛》歌詞「何事我會妒忌我會擔心魔鬼搶走你」擲地有聲，加上骨幹成員Tommy的負面新聞，E-kids令大家不能忘懷，他們日前受訪時成員Alan表示：「雖然好多人踩、好多人笑，但都有一半人係鍾意，仲有人留意到好多歌係Tommy作嘅，其實好開心。」
唱兒歌走錯路
作品被指幼稚，Tommy說：「我哋啲歌低B，所以當時電台會揀陳奕迅、周杰倫嘅歌播，於是我哋直情唱埋兒歌，都好用心㗎，但已經好難入返主流。我哋好唔甘心，但當時冇辦法堅持。」E-kids認為今次重組是最後機會：「都係而家樂壇啲新人質素太……，所以大家先會聽番舊歌，我哋好彩囉。」
阮民安Tommy■E-kids被指是MK-Pop鼻祖，如今捲土重來，計劃再出唱片。
林詠倫Alan
郁禮賢Tim
MK-Pop成風，組合如BOP及FAITH有不少負面新聞，Tommy說：「而家出個post就會紅，覺得公司幫唔到手，其實有少少身在福中不知福。好似我哋今次都係搵返文滌（前經理人簡文滌），因為佢先最了解我哋。最有潛質係BOP，都幾可惜，祝佢哋好運啦。」採訪：盧妹攝影：仇志德
來源:
http://hk.apple.nextmedia.com/entertainment/art/20160910/19765939
【真心話大考驗】E-kids 真係咁friend？
1 :
GS(14)@2016-09-10 13:54:46E-kids分拆多年，今日再重組，昔日默契還在嗎？《蘋果動搞作》團隊各自問了三人幾個相同的問題，看看他們的答案是否一致！
Q1邊個最大食？
Alan：一定係阿Tim！
Tim：我諗呀？阿Tim啦。
Tommy：咩大食先？都係阿Tim！
Q2邊個最有才華？
Alan：我覺得係Tommy，以前嘅作品都係佢作。
Tim：阿倫喺搞笑方面好有才華。Tommy就係作曲音樂方面。我就喺舞蹈上。
Tommy：咁一定係我。
Q3邊個最姿整？
Alan：姿整我覺得我自己。
Tim：我覺得係阿倫。
Tommy：姿整呀，應該都係阿Tim。
Q4邊個最多粉絲？
Alan：最多fans都係Tommy。
Tim：喺出道嘅時候，其實Tommy個樣係最可愛。
Tommy：話我似馬騮，好得意喎。依家就應該……都冇（fans）啦嘛！
Q5邊個最有錢？
Alan：最有錢我諗阿Tim，啱啱買咗樓，有自己嘅跳舞學校。
Tim：我覺得大家都冇錢。
Tommy：新聞就一定唔係我啦！
Q6邊個最多計？
Alan：點子係Tommy。
Tim：最多諗法Tommy。
Tommy：最蠱惑啦簡單啲嚟講。我同阿倫都係嘅！
Q7邊個最打不死?
Alan：係Tommy。好佩服佢，話佢曱甴，你試咁樣講我，我好唔開心。
Tim：最打不死打一定係小強啦。
Tommy：做咩一定係我啫？我覺得係阿倫！佢呢三五七年，日日喺度拍片唱歌0架！
Q8有咩想同另外拍檔講？
Alan：再有機會嘅時候要珍惜，唔好好似咁兒戲，可能最後一個機會。
Tim：如果同Tommy講的話，多啲陪屋企人。同阿倫講就係，少啲玩啦。
Tommy：希望大家好珍惜佢，無論係個騷可能得一次，可能做一場。場地：Solari Music Centre髮型：Reborn Hair化妝：Wasabi
來源:
http://hk.apple.nextmedia.com/entertainment/art/20160910/19766261
E-kids連環嚇走贊助商
1 :
GS(14)@2016-10-15 12:12:18■E-kids方面解釋因撞期而未能演出真人騷。資料圖片
E-kids本來日前參加ViuTV真人騷《ShowTime我主場》，跟新人進行PK賽，其中一場是街頭賽，不過灣仔利東街發展商之一信和集團聽見E-kids名字，拒借場地；ViuTV再安排E-kids到旺角行人路鬥唱，結果贊助商富衛保險指擔心品牌形象，拒絕E-kids在節目出鏡，由羅孝勇臨時頂上。
E-kids多次被拒，本報致電成員Tommy（中），他說：「得啖笑，真係唔知道發生乜事。」經理人公司解釋：「因為佢哋啲期同Viu夾唔到，Viu導演畀咗幾個期，點知撞正Tommy要去日本做嘢先接唔到做。」採訪：皓騫
來源:
http://hk.apple.nextmedia.com/entertainment/art/20161015/19801305
林敏驄出手填詞 E-kids MK騷等加場
1 :
GS(14)@2016-11-29 07:55:27■MK-Pop始祖E-kids拆夥十年後翻生，將於明年1月殺入旺角開騷。
由阮民安（Tommy）、林詠倫和郁禮賢組成的MK-Pop始祖E-kids拆夥十年，今年宣佈重組兼開演唱會，原來三子開騷不是發白日夢，將於明年1月21日踩入旺角麥花臣場館舉行「E-KIDS3XL演唱會」，有「樂壇小強」之稱的成員Tommy前日在電話表示：「如果賣得晒飛又可以加場，證明香港樂壇仲有希望，連我哋三個都可以開騷，原來呢個世界只要堅持，唔放棄就有奇蹟發生。」
放棄九展檔期
身為MK-Pop當然想辦法在MK開騷，E-kids本來一早取得下月的九展檔期，最後都放棄，寧願押後一個月都要佔領旺角場館，Tommy說：「我哋E-kids係MK-Pop，梗係要喺番MK開騷啦，咁啱呢幾年MK有麥花臣咁好嘅場地，好似迷你版紅館。我哋本身12月3日有一個期喺九展，算喇，我哋唔要，一直等到1月21日麥花臣有期，咁MK組合梗係要喺MK開騷啦，係咪先？」
■E-kids重組開騷有新搞作，邀請了林敏驄（右）為新歌填詞。資料圖片
■E-kids緊張開騷，昨日到麥花臣場館視察。
親到場館視察
昨日E-kids到麥花臣場館視察，Tommy表示：「而家好擔心，因為明日開始優先訂飛，如果賣飛唔理想，個場就好似盂蘭勝會咁。而家舞台效果同製作費都未有，希望資金充裕啲，否則到時回歸大自然，只係得個台，我哋三個就咁上去唱，所有製作、舞台效果、咪全部冇，希望唔會出現呢個場面。」此外，E-kids早前更到日本錄了三首新歌，Tommy說：「三首歌都係我作曲，其中一首搵咗林敏驄填詞，林大師同我哋識咗好耐，我哋入行前喺餐廳表演已經識佢，我哋又一齊喺明星足球隊踢波，又幫佢做過演唱會嘉賓，今次我哋重組，膽粗粗問林生可唔可以幫我哋寫詞，佢一口答應咗，亦好快send咗歌詞畀我哋。」採訪：皓騫
來源:
http://hk.apple.nextmedia.com/entertainment/art/20161129/19848543
E-Kids復出MK開騷阮民安哽咽悼亡母
1 :
GS(14)@2017-01-24 03:00:15■E-Kids三位成員（左起）Tim、Tommy及Alan前晚在旺角舉辦一場復出騷。
由阮民安（Tommy）、林詠倫（Alan）、郁禮賢（Tim）組成的MK-Pop組合E-Kids拆夥逾十年，去年重組，前晚在旺角麥花臣場館舉行一場復出騷，入座率有9成半，譚詠麟拍片鼓勵他們：「E-Kids到今時今日竟然再開演唱會，做人要鍥而不捨先成功。」
Tim奉子成婚
三子在台上抽水笑同晚的BIGBANG騷混亂遲入場，Alan唱了幾句太陽的《eyes nose lips》，而早年抄G-DRAGON造型的Tommy就唱《Crayon》惡搞版《踩唔死我》。演唱會上，E-Kids亦有玩時事，Tommy獨唱《差一點我們會飛》時，更播出佔領運動片段。接近尾段，Tim宣佈與女友結婚，更將會做爸爸，實行同Tommy睇齊。Tommy又自彈自唱《錯愛》紀念去年因癌病過世的母親，他哽咽說：「我由98年加入娛樂圈，組成E-Kids，去到06年，人生出現咗好大嘅錯誤，令到好多喜歡我、唔認識我嘅人對我有呢個標籤。而呢個標籤，相信除咗我最難受，就係我爸爸媽媽，因為我媽媽一路唔贊成我入娛樂圈，18歲時送我去紐西蘭讀書，但當時我決定返嚟做歌手，媽咪好失望，試過食飯嘅時候，故意唔擺我個位。我知道佢離開時仲係好擔心我呢個衰仔，我今日好努力想做好自己，即使媽咪唔喺度，我相信佢都會好開心，我會乖㗎喇！」
■Tommy含淚向亡母承諾會乖，又90度鞠躬。
■Tim宣佈與女友結婚，並將會做爸爸。
三人零歌酬
完騷後，E-Kids在後台做訪問時透露今次是零歌酬：「自願將啲錢放落製作度，其實演唱會搞手話我哋咁窮，勸我哋收番啲錢，不過我哋最後都冇要，希望出嚟效果滿意。」採訪：曹家誠攝影：仇志德
■前晚演唱會入座率有9成（下圖），Tommy更跑上觀眾席唱歌。
來源:
http://hk.apple.nextmedia.com/entertainment/art/20170123/19905641
Next Page