玩Cosplay大騷好身材EXID新歌MV意淫 捱轟
1 :
GS(14)@2016-06-06 02:54:42■宅男女神Hani所屬的EXID近日推出新歌，不過被批MV意識不良。
韓國宅男女神Hani所屬的五人女團EXID近日以新碟《Street》回歸樂壇，前日又現身首爾清潭洞舉行Showcase為新碟造勢，而主打歌《L.I.E》的MV在大前日公開後，不到24小時已錄得逾百萬點擊率，成績理想。不過就有網民炮轟EXID的MV有意淫成份，抨擊EXID教壞細路。一向行性感路線的EXID，每次出新歌都例必穿上貼身衫及熱褲，大騷弗爆身材。今次推出新歌《L.I.E》，成員就在MV中化身為酒店職員及女僕，穿上貼身制服騷好身材。雖然EXID是次造型未算暴露，不過就有網民質疑MV中有多個性暗示的場面，包括Hani手持胡椒粉樽、正花躺在地上等畫面。另外，Hani把玩的一對粉紅色按鈴、率智背向鏡頭時出現的桃，都被網民猜測有特別暗示。
■率智背向鏡頭時出現的桃，被指代表女性臀部。
■網民認為Hani把玩的一對粉紅色按鈴，有特別意思。
■正花跟一男性身影重叠的鏡頭，同樣被批意識大膽。
■EXID專攻性感路線，成員亦愛大方騷身材。
被批意識大膽
除了被批意淫外，成員在MV中亦有不少自摸跳舞的鏡頭，而LE更大玩泡泡浴，場面惹火。MV公開後，網民即抨擊EXID行為過火，留言「骯髒」、「中學生都明白這些鏡頭的意思」、「停止用色情主題炒新聞」等，批評其事務所未有顧及未成年歌迷，竟以色情主題為新歌造勢。雖然新歌MV惹上是非，不過EXID昨日就如常現身電台節目《兩點出逃Cultwo Show》谷碟，公開成名前的辛酸事，成員慧潾表示：「我們在三成洞發生過難過的事，未紅前，我們想去COEX宣傳《Up&Down》，卻因為沒有事先獲得許可而被趕走。」另外，Hani於2月時曾因過勞而停工休養，不過早前已復出當節目主持，似是已狀態回勇。撰文：梁雯迪
來源:
http://hk.apple.nextmedia.com/entertainment/art/20160603/19638529
【專題籽】Cosplay英雄賣人情味 超人義工團專冧細路
1 :
GS(14)@2017-05-18 01:11:35【專題籽：胚芽故事】早前有位消防英雄馬路救貓，這些好人好事越多人知便越多人被感染，人人都可做義工、做英雄。這個「Rider Maker假面製造」團隊，四出為來自基層家庭或有需要幫助的小朋友帶來歡樂，他們不只外表Cosplay成日本「特撮超人」（特撮指用真人拍攝的變身英雄），由內到外再到番內都係香港人的真英雄。不過，五年前他們初有做義工這念頭時，要不停Cold Call不同組織提議免費演出。「不過反應都幾冷淡。」創辦人阿花說。
你日日返工，老闆都想你提高工作效率，其實做義工一樣，當然想用最有效率的方法做。小朋友愛看英雄戲劇，每個星期日都可以在電視看到《幪面超人》出場儆惡懲奸（如果不用學英文珠算彈琴非洲鼓的話），英雄講話佢要聽，更易接觸溝通，要宣揚正確訊息應該更容易。「我哋早年喺facebook群組認識，大家都係特撮英雄愛好者，之後喺啲動漫活動約出嚟一齊玩，玩玩吓，不如利用我哋Cosplay英雄嘅身份做啲有意義嘅嘢啦？於是喺五年前就開始有呢個念頭。不過我哋都冇渠道，所以只係慢慢Cold Call唔同組織，唔同社區中心。」阿花說完，輪到另一資深「假面」傑少：「我哋仲寫埋計劃書，不過可能唔多人知，而呢樣嘢又冇乜人做過，所以反應都幾冷淡，好多人嘅回覆都話：『呢啲嘢我哋唔啱。』到底邊啲嘢呢？」傑少本身也是一名老師，他完全不明白「超人」錯在那裏。又原來，阿花的媽媽也是教師，「唔使講其他人，我阿媽聽到都同我講：『咪又係打打殺殺。』」幸好終於找到一個朋友的朋友是社區中心社工，「佢開放啲，覺得我哋只要有主題去宣揚正確訊息，小朋友見到英雄會仲投入仲開心，更吸收到我哋所講嘅嘢。」就是這樣，他們開始了義工生涯，亦越來越多人明白他們演的超人話劇及動作場面不等於打打殺殺，「而且都唔一定要做話劇，好似早排我哋去威爾斯親王醫院同啲康復、康復中癌病兒童玩，我哋就同佢玩吓遊戲，多啲互動，令佢哋多啲正能量。」
（左起）阿花、Eugene、Ivan、傑少、Quenti、Peter，除了Quenti只有19歲，其餘多數也是20多歲。
「嘰嘰」雖然本身係奸角，但發揮空間大，而且很多時最後也會改邪歸正，給小朋友看嘛。
他們Cosplay的都是平成年間的幪面超人，沒有昭和幪面超人，「我們的對象未看過昭和年代的幪面超人吧！」
收到小fans的圖畫或糖果，令團隊很感動，很有動力做得更好。
「想小朋友搵番啲童真」
係，我認同，現在很多小朋友是老積鬼，有些學術成績高分，和別人溝通卻出現問題，識彈琴但講嘢唔望人。當老師的傑少最清楚，「?家好多學校都只着重學科成績，教德育、公民意識嘅德育課可能只得15分鐘一堂，所以有好多小朋友喺待人接物、處事嘅態度方面都好無知，希望我哋用呢個身份可以教佢哋多啲，補充番學校學唔到嘅嘢。」阿花直情親身體驗，「我太太阿哥個仔，佢讀書好叻，小學已經學中學嘅數學，但見人唔識嗌人，攞嘢唔識講唔該。最大鑊係同佢溝通覺得好怪，佢見你得意會走埋嚟望吓你，但同你冇眼神接觸，望完你唔講嘢就走開……我諗好多小朋友用晒個腦啲RAM去讀書補習同埋學唔同技能，但其實佢哋更加應該要識同人溝通，仲有，最重要係要快樂成長，搵番啲童真出嚟，唔好培育啲只係有名校、計數賺錢觀念嘅下一代，如果唔係，第時香港只會越嚟越多『領展』。」我絕對同意，保留童真是非常重要的，否則長大後，像我，在現實生活環境中，很難找到快樂。看超人片，小朋友齊齊送祝福傳能量給超人，原來真有其事。常幫忙做helper的Eugene說：「可能小朋友成日睇超人，所以見到超人都好開心，我見過望住一個小朋友本來冇表情好唔開心，但見到超人出場時就開始笑，越笑越開心，其實就算唔講宣揚乜嘢訊息，只係帶到開心嘅回憶畀佢哋都夠，呢啲都成為咗我哋嘅動力。」做一次演出，知道主題後要度故事度對白，還要找地方排練，都要花一個月時間，付出不少。又演超人又演奸角「嘰嘰」戰鬥員的Ivan說：「試過有小朋友唔捨得我哋走，喊住咁叫我哋唔好走，嗰吓感覺到佢好喜歡我哋，令我會覺得自己做嘅嘢係有意義。」不要說甚麼自我感覺良好，就算是做義工，也可以是雙向的，歡樂情緒不是誰帶給誰，分享才最有意義。「仲記得有小朋友送幅畫畀我，就係我扮演嘅『幪面超人古迦』，旁邊拖住嘅就係佢，有時我覺得佢哋已經當咗我哋係朋友。」
（左三起）「幪面超人月騎」、「幪面超人古迦」、「幪面超人龍騎」、「幪面超人Fourze」；其餘四人都是「嘰嘰」。
訂回來的Fourze頭罩太細，所以後來改裝了一點。
他們的幪面超人服有些在日本訂製回來，再加自己DIY裝備，一套要花過兩萬港元。
這些道具都是他們自製的，「嘰嘰」們也有自己的專用戲服。
「我第二日返工諗起都識笑」
說到超人被小朋友喜愛，一直演「嘰嘰」的Peter有話說：「本身我都鍾意超人嘅，因為細細個已經跟阿爸睇《幪面超人》1、2號，咁有次見到佢哋Cosplay出嚟，我就問我可唔可以加入呀？我都想做超人嘅，不過我都明，我咁嘅身形係有啲難度，咁做『嘰嘰』都好吖。最記得初初做『嘰嘰』出場時，個心都有啲痛嘅，因為聽到啲小朋友話：『嘩，好肥呀，呢個壞人好肥呀。』」另一位做過「嘰嘰」又演過「幪面超人帝騎」的Quenti搭話：「我唔只心痛，試過個身都痛，因為啲小朋友見到壞人，有時又拉又扯又追打……講笑箒，大家都係玩吓，唔係真係打。」不過當小朋友看完話劇，知道台上「嘰嘰」改邪歸正，最後都會找他們興奮合照，Peter說：「我今朝同我阿爸食早餐先講起，其實唔好話佢覺得，我開頭加入都真係玩玩吓嘅心態，不過一路做落，就會覺得好有意義，成為另一個人心入面嘅開心回憶喎。」阿花亦指這是雙向分享，「其實唔只佢哋開心，每次出活動，都係我哋嘅開心回憶，最開心係見到有家長同小朋友一齊嚟支持我哋，見到家長們對超人、Cosplay唔抗拒，仲會整嘢食請我哋食，第二日返工好辛苦嗰陣，諗起都識得笑。」每個放完兩日假星期一返工的打工仔都明白，這種快樂回憶就是苦悶工作中的重要動力，只是我們的動力可能來自贏波中馬打機睇戲，而他們的，則來自小朋友、家長們的笑容。阿花本身愛跳舞，又有跆拳道底子，所以可以演出更多動作場面，「要用娛樂帶出訊息，咁個娛樂都要豐富啲，所以都會設計一啲動作場面。」為了演出更加有特撮感，而去日本學藝：「日本當地好多地區英雄，即係唔同地區有唔同嘅特撮人物，佢哋都會拍劇集喺當地電視台播，亦都會出活動，製作好認真。於是我就上網搵有冇人係教呢啲動作演員動作呢？最後搵到有朋友介紹，去咗日本跟佢哋學嘢，已經去咗三次。希望可以帶多啲嘢返嚟同大家研究，一齊提升演出水準。」除了學動作，阿花說更想效法日本，設計一個地區英雄：「始終幪面超人、鹹蛋超人都係日本嘢，我哋都想有自己嘅英雄，?家都好努力咁設計緊造型，想加入多啲香港元素，可能會有少少似李小龍嘅打扮？亦可能會拍攝一啲短片。」值得支持呀！香港除了陳年的「皇妃超人」外，似乎真的沒有特撮英雄，TV Buddy唔算啦。
Facebook：ridermaker
記者：陳孝義攝影：黃子偉（部份圖片由受訪者提供）編輯：梁浩維美術：利英豪
來源:
http://hk.apple.nextmedia.com/su ... t/20170517/20023217