ZKIZ Archives


【add】皇室招牌:英女皇衣帽間

1 : GS(14)@2016-04-15 16:30:17

英國在位最長的君主、英女皇伊利沙伯二世,下周四就90歲大壽。這位年近百歲的銀髮彩虹女皇,長年都以招牌的明亮色彩,優雅示人,一世紀時尚背後,收藏不少秘密,例如她其實最愛藍色,擁有5,000頂帽,但又專一鍾情黑色小手袋。撰文:《add》team


■洋紅色在90歲的英女皇身上是艷色。

彩虹之皇室藍

英女皇伊利沙伯二世90歲、在位逾60年,每次出場均以同一色調服裝示人,外間稱她為「彩虹女皇」。女皇愛穿大衣配同色A字裙,時尚雜誌《Vogue》在2012年就曾經統計過她一年內所穿服飾的顏色,發現紅、橙、黃、綠、藍、紫多種顏色都穿過,而她穿上象徵皇室的Royal Blue次數就佔最多。



加冕之5,000頂帽

戴帽是英國重要文化,英女皇愛帽的程度十分狂熱,歷年她戴過的帽子逾5,000頂,更舉辦過私人帽子收藏展。女皇之帽當然都是人手製作,更有幾個共通點,就是色彩明亮、精緻配色和細帽邊!女皇御用的皇家製帽師Rachel Trevor-Morgan,透露因為女皇體形小,很容易被人群掩沒,必須露出臉孔,所以帽邊一定要細。



■英女皇也愛試不同款式,如羽毛或花飾垂在髮邊的帽子設計。



手做之黑手袋

手袋選擇女皇非常專一,多年來對Launer London出品情有獨鍾。這個品牌創立於1941年,自1968年開始成為英國皇室御用的手袋製造商,到了81年更贏得女皇徽章。手袋飾有18K包金的繩結logo,袋形與法牌Hermès Kelly Bag有點類似,而且百分百由英國人手製造,與Hermès一樣,每個手袋都是由同一位皮革師完成,以確保品質。女皇收藏超過200個Launer London的小手袋,幾乎每次外訪都拿着,是女皇的must-haves。Launer手袋基本款式由1,550英鎊(約17,000港元)起跳,以女皇擁200個計算,保守估計半世紀就花了超過300萬元於這個品牌之上。



■英女皇擁有逾200個Launer手袋。

Traviata款 1,550英鎊(約17,000港元)

Lisa款 930英鎊(約10,200港元)



年輕之乜都得

晚年rainbow color套裝成為標記,年輕時英女皇的衣着一樣令人印象深刻。個子嬌小的英女皇當年身材極弗,擁有黃蜂腰。曾為她設計過多套禮服的設計師Norman Hartnell,深受英女皇倚重,當年無論婚紗,還是加冕禮服均由他一手包辦。英女皇的婚紗,當時由超過一萬顆超小珍珠與水晶組成,加冕禮服則飾以刺繡,極盡華麗。



■英女皇的婚紗由設計師Norman Hartnell打造。黑白圖片

■英女皇登基時穿的禮服刺有大不列顛聯合王國及大英國協的徽章。黑白圖片



皇冠與珠寶當然也極具話題性,一條在1930年代打造的Cartier鑽石頸鏈,由38顆鑽石串連,中間配上由13粒祖母綠切割鑽石鑲嵌的吊墜,前年女皇曾借出給孫媳婦凱蒂(Kate Middleton)佩戴出席慈善晚會。



■英女皇(圖)這條頸鏈由38顆鑽石組成,曾借給凱蒂出席晚會時佩戴。

凱蒂



來源: http://hk.apple.nextmedia.com/entertainment/art/20160415/19571382
PermaLink: https://articles.zkiz.com/?id=299392

【add】紅人主場:胡杏兒 一次生三個

1 : GS(14)@2016-05-08 01:56:26

Proenza Schouler露肩上衣、長褲Swarovski Epilogue髮飾Ease耳環Eden戒指


娛圈生B喜事浪接浪,最新有陳茵媺及陳豪三年抱三,成功追女,接着還有湯唯、李心潔等。去年底結婚的36歲胡杏兒都想趕上這股生B潮,正積極調理身體,期待組織圓滿大家庭:「一次生晒佢,我唔介意三胞胎。」兩夫妻才完成兩個半月的環球蜜月之旅,杏兒這位客家新抱,要兼顧拍片、婚紗店生意及兩家長輩,大呼「女人唔易做」,幸得老公照顧有加,連出埠工作都愛相隨,看來愛得纏綿的他們距離造人目標不遠。統籌:林妙萍造型、撰文:林嘉慈攝影:周樂恒攝錄:郭賢興化妝:Miko Wong of Cyrus Lee Team髮型:Lorraine Lam of hair culture胡杏兒與才俊李乘德(Philip)由相識至結婚,於一年內極速完成,傳宗接代都要快,「我哋都唔想話等好耐,但會順其自然。」現階段,她一邊享受工作,一邊調理身體。問想生多少個B?她爽快地說:「最圓滿係一次生晒佢,我唔介意三胞胎,哈哈,但唔知呀,唔係咁容易啦!」組織五口之家,目標明確。



Dries Van Noten連身裙Christian Louboutin高踭鞋SwarovskiAttract耳環Edify綴珠頸鏈Alpha頸鏈Creativity手鐲

Marni背心、短裙SwarovskiEast多行頸鏈Distinct手鐲Ethic金、銀色手鐲

Lanvin恤衫、短裙Swarovski Edify耳環、頸鏈Curly玫瑰金色戒指Vittore戒指Every金色戒指


■杏兒日前去新加坡開工,有老公陪伴。

養肥老公

兩公婆婚後即展開環球蜜月之旅,遊遍日本北海道、美國紐約、希臘小島Santorini、新西蘭塔拉威拉湖、大溪地波拉波拉島、馬爾代夫等12個地方。在日夜相對兩個半月期間,杏兒覺得老公婚前婚後沒有改變,關愛、甜言蜜語如昔,笑說只有身形走樣:「我覺得我養肥咗佢少少。」至於杏兒自己的分別?她說:「好多人話結咗婚,好似開心咗。」的確,杏兒笑得更甜。心底裏,也有着微妙的變化,「有咗個身份,責任上係大咗,真係以前覺得好free,鍾意去邊就去邊,鍾意做乜就做乜,而家就真係需要諗多一層,諗多一步,企喺對方嘅立場去諗,多咗責任。」離港工作前必定知會老公,「喺香港做嘢,當然唔需要徵詢意見,譬如要離開幾日、幾個禮拜,甚至乎有啲好長時間,當然要講啦,係互相尊重。」杏兒這段關係的幸運,在於互相遷就,老公的工作夠彈性,「如果接電視劇就真係會長啲,佢都好好嘅,話:『如果有需要,我咪嚟探你囉。』」


■杏兒與好姊妹們自組胡說八道會。

女人難做

肩負人妻責任不久的杏兒,要兼顧拍攝戲劇、處於起步階段的婚紗店,復工短短一個多月,已有所慨嘆,「其實真係好忙,現代女性想有自己嘅career,又想有自己嘅家庭,又想有朋友,家庭方面,除咗自己個家庭,仲有爹哋媽咪嘅家庭,老公嘅屋企人,開始慢慢感覺到女人唔易做。」但她欣然接受挑戰,「人生都係咁,冇挑戰又會好悶。」面對夫家的客家大家族,她卻沒有壓力,「盡量做到嘅就做,好多嘢唔係你自己控制,OK嘅,冇乜壓力。」大後日是婚後首個母親節,杏兒早有準備,打算買首飾給媽媽及奶奶,「通常都揀啲戴住嘅,佢哋戴住又開心,見到人會話:『呢個係我新抱送㗎,呢啲係我個女送㗎』,咁咪好啦。」對兩位媽媽盡責,這個女兒及初歸新抱,絕對稱職。



兼任公關

工作成為杏兒的頭號挑戰,尤其是成立未滿一年的婚紗店,「做一啲之前未有機會嘗試嘅嘢,譬如品牌個brand building,點去marketing,點去擴展生意,希望去到唔同嘅地方,呢啲自己一手一腳,都會去搞。」不僅親自示範做生招牌,背後的公關工作,亦是親手負責,運用自己的人脈、網絡,發掘更多機會,「安排去新加坡,帶啲婚紗去影雜誌,都係我自己聯絡。我覺得幾好玩,但係都忙嘅。」演藝工作同步,她望角色不要不斷重複,恨飾演如殺人犯、有精神問題等富挑戰性的角色,亦想與未曾合作的對手及導演合作。最新拍攝的愛情電影《在澳門說我願意》,就夥拍前跳水王子田亮,新鮮感大增,「雖然佢以前係運動員,但都好專業。」


■杏兒愛玩針對手臂的運動。

戒加工食品

生B講求健康,女士太瘦、太肥都影響受孕。110多磅的杏兒屬標準身形,平日抽空跟私人教練學做運動,主要為保持體態穿靚衫,「我幾鍾意玩拂繩,基本上係全身運動,加收手臂,係咁做係咁做,做到擲都擲唔切,但知道辛苦就有result。」飲食均衡,最重要新鮮,「盡量食新鮮整出嚟嘅嘢食、生果等,唔食process出嚟嘅,好似罐頭、醃製食物。」更多精采時尚內容,盡在http://add.appledaily.com





來源: http://hk.apple.nextmedia.com/entertainment/art/20160505/19598040
PermaLink: https://articles.zkiz.com/?id=299890

【add】紅人主場:方健儀 非主播時代

1 : GS(14)@2016-05-21 17:49:48

Ports1961條紋上衣白褲、白鞋


傳媒寒冬越吹越寒,進入大洗牌轉型時代。記者轉行或被轉行?39歲的方健儀(Akina),由TVB新聞主播,轉做ICAC,打個圈四年後的今天,又坐上得啖笑的毛記主播之位。「我覺得香港其實係冇主播嘅!用主持或者報道員,比較中肯。」兼職做歌手、做演員拍片,轉行不是末路,正能量希望在明天。「希望選擇留低嘅朋友,繼續努力!」撰文:林妙萍造型:陳蔚渝攝影:周樂恒攝錄:郭賢興、陳志嵐髮型:Vincent Yeung of Salon Osmosis化妝:Herman Ng「多謝支持,後會有期,再見。」2012年2月24日報完最後一日TVB新聞,方健儀告別了第一回合的主播生涯,投考ICAC。「嗰時係唔捨得,因為我知自己係好鍾意做記者,但真係愉快地離開,嗰時諗法,係做咗十幾年記者,重投勞工市場,未必有人會吸納我㗎喎,結果證明到自己唔會被淘汰。」



Max Mara粉紅套裝Ports1961恤衫、白鞋

Giorgio Armani拼色外套、黑色長褲



我是真‧報道員

傳媒出現一體化汰弱留強新生態,方健儀寄語同行,「而家分界好模糊,係一個整合階段。大家都好辛苦,選擇留低嘅朋友,畀心機繼續努力,毋忘初衷,鬥快之餘,也要快而準。」在TVB年代、港台年代,以至毛記電視「永遠榮譽女主播」,方健儀和主播已經畫上等號,「好多時啲人仲會介紹我係前主播乜乜乜,我話,千祈唔好咁叫!我覺得香港係冇主播嘅!」她認為,主播之名被濫用,主播應有掌控及主宰新聞時段的權能,「我哋報新聞係逐字逐句去讀,冇咁嘅權限去改字、加分析,我覺得用主持比較貼切,所以你形容我係一個新聞報道員,比較中肯,或者形容我本業:記者。」



偽‧主持好厲害

顏值年代,主播或主持都要求靚女、年輕,跳得唱得,「毛記就係玩,冇乜後顧之憂,得啖笑,開心吓!佢哋主持個個好厲害,百般武藝,盤菜瑩子唱歌又得,真係飆高音!ViuTV嘅Angela,我認得個樣,幾有型。」當年做正規電視台,一字一句,用字嚴格,遺體不能用不尊重的「運送」,應用「移送」;交通意外後車撞前車,也只可報道「兩車相撞」,不能未審先判,方健儀職業病未改,「有時睇新聞聽到,會諗,嘩,咁都出街!」



■2012年2月主持最後一晚TVB新聞,當時仍是長髮及肩。

《導火新聞線》


■由無綫主播變毛記主播。

淡定姐‧撈過界

方健儀台前形像太正面,加上廉署打過工「身家清白」,後主播工作,全部正派正氣,客串電影《寒戰2》,就做女警。「我係做一個談判專家,一個小腳色,臨尾先出現,最初副導cold call搵我,話叫我報價,我仲以為電話騙案,到現場見到唐寧、黃德斌,再見到對手梁家輝,先知係真!」唱《中東與綜》騷歌喉後,今年有份做演唱會,主持旅遊節目、拍片,「總之,我每日都係一個新鮮人,有得試就試,唔識就要問,唔好充大頭鬼!」



宅女愛柴犬

「我係一個幾宅嘅宅女。」外表精明幹練,off duty最愛着花綠綠民族衫,跳跳鄭多燕、郊外踩單車、西貢飲咖啡睇狗仔,「我好鍾意狗,但我唔敢養。今日咁啱係我隻狗仔生忌,死咗十二年喇,由小學六年級開始,到我英國讀完書返嚟,送佢離開,養咗16年,就算而家過咗咁耐,我都過唔到嗰關。」特別鍾情柴犬,因為眼細細似笑,樣子更似足老公!



■方健儀愛狗愛喝咖啡,假日節目四處搵柴犬玩。





更多精采時尚內容,盡在http://add.appledaily.com





來源: http://hk.apple.nextmedia.com/entertainment/art/20160519/19617529
PermaLink: https://articles.zkiz.com/?id=300749

【add】紅人主場:麥浚龍 亂世.愛

1 : GS(14)@2016-05-26 17:40:07

Giorgio Armani外套Too Good上衣及闊褲Kamonuj帽子Mykita太陽眼鏡(Juno's Own)


麥浚龍(Juno)近年專注創作,出道14年,歌曲風格越趨成熟,更造就了強烈的個人風格,由當年的《耿耿於懷》,到12年的《念念不忘》和謝安琪合唱的《羅生門》愛情三部曲,成績令人刮目相看,7月即將推出新專輯《Evil is a point of view》,題材觸及道德、性、大愛、人性的陰暗面等不同層次,繼續以歌說故事,這些年來專心創作,默默耕耘,蛻變成為今日的Juno2.0。撰文:顏英儀攝影:郭賢興攝錄:林德雄、陳志嵐化妝:Khaki Yan髮型:Sam Pan of La Mod麥浚龍18歲出道時染金毛形象似MK少年,到今天剃了光頭、留了一把長長的鬍鬚,闊袍大袖的穿衣風格,滲出點點禪味,散發出一股讓人平靜、沉穩、內斂的個人氣場,人大了,改變了。
Juno近年在音樂上創出一個自我風格,上年7月與人妻謝安琪合唱的一首《羅生門》被網民瘋狂洗版,點擊率累計過千萬,最近就忙於籌備新碟《Evil is a point of view》,繼續以歌說故事,「我唔單止係一個歌手,我想用音樂講故事,有一日我諗起『離經叛道』呢四個字,想寫一個有關和尚同比丘尼嘅愛情故事,而兩人嘅前半生係劊子手同雛妓。」



Wooyoungmi中褸Horisaki Design& Handel帽 Mykita太陽眼鏡(Juno's Own)

Ziggy Chen藍黑外套、闊腳褲(Lane Crawford)Too Good上衣(Juno's Own)


■Juno上年與謝安琪合唱的《羅生門》,引起極大迴響。

大膽露骨

專輯題材有關道德,觸及性敏感題材,大膽露骨,是一個極具爭議性話題的悲劇故事,由林夕和周耀輝兩大填詞人寫出一個個淒美的故事,歌曲有深度亦有張力,大碟共收錄11首歌,就像追看連續劇,結尾一首歌同薛凱琪合唱的《結》,「當然結局係悲慘嘅,最後和尚壯烈犧牲,而比丘尼就懷有和尚嘅骨肉,我想喺黑暗嘅悲劇中帶一個希望。」音樂以外,Juno12年拍電影《殭屍》做導演,向80年代港產殭屍電影致敬,事隔4年準備開拍新戲《風林火山》,Juno說:「殭屍片同警匪片都係香港根深柢固嘅文化,講故事唔係得一種模式,視乎你嘅切入點,想用我嘅角度拍警匪片,今次係合拍片,所以規模比《殭屍》大好多,我都係新導演,一邊做一邊學,等劇本審批完就會開拍,所以好多嘢做,都想做紅館演唱,不過時間分配係最大嘅問題。」



亂世創作

市道差,音樂同電影業亦同樣低迷,但Juno卻見到希望,「大家都可能覺得香港電影同音樂冇以前咁輝煌,但我覺得喺亂世先可以探索到更多題材,我哋唔應該保守地做前人做過嘅嘢,每個artist嘅創作空間同樣咁大,我都係盡力做好我嘅工作,過程辛苦但帶畀我無限快樂。」



■早前Juno同女友在京都嵐山泛舟,好不浪漫。資料圖片

■Juno與中英混血女模戴庚玲拍拖多年,但未有結婚打算。資料圖片



不信婚姻

Juno與混血女友戴庚玲(Janine)拍拖多年,早前被讀者偷影到二人在京都嵐山泛舟,好不浪漫,不過結婚生仔大計就似乎不在他的人生計劃內,奉行不婚主義的Juno說:「我其實好相信愛,相信所謂天長地久嘅愛情,但我唔相信婚姻,因為我覺得世界上有好多段婚姻都有機會係唔牽涉到愛,所以由細到大我都不特別希望成家立室,我喺屋企排行最細,唔識得處理小朋友,要我揀,寧願選擇一個混亂、有300人嘅片場,多過想同一個小朋友相處3個鐘,我會唔知點算,所以我未必會係一個好好嘅爸爸。」


■Juno出道時留長髮,形象似MK少年。

我不是潮人

Juno經常被稱潮人,但他卻不認同自己是潮人,「其實我唔係站喺潮流最前,曾經我都有着過某啲服飾或者喜歡過某啲顏色,人大咗慢慢知道自己嘅喜好,我好怕窄身衫,會覺得有壓力,會被規限,我鍾意嘅衫係有一種形態,鍾意黑色、淡色,舒服最緊要,其實衫係你生活嘅一部份,例如我戴嘅手繩腳繩,我唔當佢係飾物,佢係一種記憶,代表了某年某月嘅我,因為我鍾意去唔同地方,遇到啱嘅會買,戴咗就唔除,沖涼瞓覺都戴住,做呢一行日夜顛倒,最容易忘記時間,有時會忘記自己去過邊,所以用呢個方式記低。」



更多精采時尚內容,盡在http://add.appledaily.com





來源: http://hk.apple.nextmedia.com/entertainment/art/20160526/19627250
PermaLink: https://articles.zkiz.com/?id=301507

【add】紅人主場:鄭希怡潮媽進化論

1 : GS(14)@2016-06-06 03:03:26

Ellery白色露膊top黑色裙


今年34歲的鄭希怡(Yumiko),2002年初以組合3T出道而為大家熟悉,轉眼已經十年人事,並於2014年結婚榮升人妻,去年Yumiko更誕下囡囡梁子柔(乳名:梁浸浸)變身人母。梁浸浸樣子精靈可愛,難怪Yumiko湊女亦不覺辛苦,更謂:「覺得每一日佢都畀到我好多快樂嘅片段」。統籌:林妙萍撰文及造型:陳蔚渝攝影:郭賢興化妝:Circle Cheung of ndnco.co髮型:Sing Tam of Pi4.com
Yumiko自從去年榮升為媽媽之後,除了家庭生活與心態上有轉變,也與另一半的關係有微妙變化。



怪獸家長No Way

梁浸浸出世後,Yumiko自言變得沒有以前般執着,相比以前更容易開心,面對各方面都更有耐性,「以前同小朋友溝通唔到,可能係因為我冇耐性,而家慢慢去學習,就算再同其他小朋友去相處,距離都近咗好多。」現今世代,不少父母都擔心子女會輸在起跑線,因而變成怪獸家長,問到Yumiko會否擔心自己變為一分子,「我唔擔心,亦唔可以咁,會叫朋友監視住我。」她更表示不期望梁浸浸讀書叻,只希望她在學校過得開心,「其實我好easygoing,我覺得要畀佢自己發展,而唔係幫佢plan好晒所有嘢,有時啲父母將小朋友睇得太過緊要,可能仲緊要過自己所有嘢,我好驚畀壓力小朋友,可能係因為自己都怕人哋畀壓力我。」



Ports1961條子恤衫條子長褲橙色外套



Ports1961立體花背心立體花長褲Burberry涼鞋Emporio Armani橙色手鐲粉紅色手鐲



與老公想法一致

由兩個人變成三個人的小家庭,Yumiko坦言與老公梁學儲的關係亦變得更加親密,「我哋而家有更加多共同話題,我哋各自出trip嘅時候,都會send好多小朋友嘅相或者片段畀對方,有咗小朋友之後又會經常一齊傾,將來畀一個點嘅環境佢,又或者遇到問題要點樣教佢,反而令我覺得大家嘅諗法都幾一致。」經常有人說女兒是爸爸上輩子的情人,Yumiko亦笑言梁浸浸對她與爸爸的分別很大,問到有否曾經因此呷醋,「我已經開始習慣,我原本都唔想再生小朋友,但我而家可能會因為呢樣嘢而再生一個仔,當我返屋企見到梁浸浸對我同爸爸嘅分別有幾大之後,我覺得應該要有一個細佬。佢望住爸爸嘅眼神係完全唔同,可能呢啲就係女同爸爸嘅化學作用,所以我成日都話可能幾年後先可以同佢做best friend,佢先會同我傾心事。」



■Yumiko不時都在Ig share梁浸浸的可愛相片。

■Yumiko笑言梁浸浸愛黐住爸爸。


■梁浸浸非常精靈可愛,人氣爆燈。

恨再做一次打女

Yumiko直至去年才與英皇娛樂結束15年的賓主關係,現在回復自由身,「而家呢個階段我好享受自由嘅感覺,做自己選擇嘅工作,可能有時覺得呢段時間想陪多啲小朋友,咁就唔接咁多工作,呢段有彈性嘅時間,我覺得係最適合我。」雖然工作時會掛住梁浸浸,不過Yumiko最希望自己可以做到同時兼顧家庭與工作,已經學了4年打碟的她,早前亦因為女兒漸漸長大,抽空到上海擔任DJ打碟,「我原本諗住好細個就train佢自己一個瞓,但因為而家成日要做嘢,可能返到屋企佢已經瞓咗,所以就決定同佢一間房,佢張床喺隔籬,咁變咗夜晚都有時間相處,可以望住佢。」全面復工的Yumiko,早前獲ViuTV邀請參加真人騷《G-1格鬥會》,雖然已學半年泰拳,不過因為另有拍劇工作而未能參加。她希望可以再拍到一套代表作,再做一次打女,「雖然以前試過一次,需要付出嘅時間同體力係好多,但係嗰種滿足感我覺得可以試多次。」


■Yumiko不時為自家的網上時裝店擔任生招牌。

熱愛時裝變工作

因為熱愛fashion,所以Yumiko在2014年開設了網上時裝店whysocool,「自己好鍾意襯衫同留意靚嘅嘢,off season又或者vintage嘅嘢,將佢哋改少少,變成而家用都靚嘅嘢,自己着完大家覺得靚嘅時候,有好大滿足感,所以好想將佢變成工作一部份。」Yumiko今年打算再落足力在時裝生意上,「會推出新collection,又會將網站不足嘅地方改善,因為之前陀BB到小朋友出世都冇時間去打理,覺得而家係時候,所以想再做好佢。」



更多精采時尚內容,盡在http://add.appledaily.com





來源: http://hk.apple.nextmedia.com/entertainment/art/20160602/19637153
PermaLink: https://articles.zkiz.com/?id=301984

首富之子男女通殺?Add微信要睇樣咁揀擇?

1 : GS(14)@2016-06-20 05:45:10

中國首富王健林獨子王思聰,常在網上發表「偉論」,吸引不少網友追蹤,微博粉絲人數突破兩千萬。近日,他出席內地舉辦的「超級紅人節2016網紅盛典」,直言想要成為他通訊軟體上的好友,女生的唯一條件就是「長相」。王思聰接受《新浪娛樂》專訪毫不避忌,除了對近日強國鮮肉男星吳亦凡傳出約炮新聞,直說:「明星也好,有錢人也好,只要他沒有結婚的話,這都是無所謂的,我覺得每個人都是有自己支配自己身體的權利。」並表示若想在網上與他成為好友,「男的話,如果是大咖的話,大老闆甚麼的不大好不通過」,但若是女生則是「看長相,醜的通過率比較低」,同時大方承認「我這個人還是挺膚淺的」。網友看完專訪,有人嘲諷:「自己長成這種德行還好意思說」,酸他「有錢的人說出這些話就是金句」,還是「趕快閉嘴吧」。新浪網





來源: http://hk.apple.nextmedia.com/international/art/20160620/19661894
PermaLink: https://articles.zkiz.com/?id=302222

【add】紅人主場:惠英紅 魔女重生

1 : GS(14)@2016-07-09 06:36:10

Dolce& Gabbana連身裙、耳環


美魔女氾濫的年代,52歲的惠英紅早前表示,介意無人賦予她一個美女之名。看似硬橋硬馬,其實自信骨子裏也是嗲人的細心女人,「我真係覺得自己OK!我其實係一隻小貓,不過外形就係一隻老虎咁。」4歲搵食,封過影后、患過抑鬱病,高山低谷走過,今日找到人生目標,「我在工作上搵到自己價值,我嘅存在係有意義嘅。」前望,又是新一天。撰文:林妙萍攝影:郭賢興攝錄:林德雄、葉君海化妝:諺瞳小白髮型:James Lee@ Hair Salon訪問惠英紅,正正緣起自她早前半開玩笑的「美魔女」投訴,爽直剛烈、強勢的惠英紅,原來也有一顆這樣的女人心,「是但囉,你哋話我唔係咪唔係囉,但我又真係覺得自己OK嘅。」



Etro織錦背心Amen Couture釘石牛仔褲/Harvey Nichols

Lanvin紅色連身裙


■新片《幸運是我》飾演腦退化病人。

自信鋼條型

多年來,外號也是勁man的「僆仔紅」、「英雄有型」,「其實我唔鍾意囉,我覺得我都好細心,好識照顧人,所以呢,你哋叫我美女紅啦,唔該,多謝!」女性化也前衞敢作,1988年自資去巴黎拍全裸寫真,哄動一時。惠英紅今日年過五十,騷腰、露肚、晒背一律無問題,隱約還見到腹肌輪廓,並非曲線玲瓏的美魔女典型,身形、樣貌其實自我要求極高,「我都好刻意保持,食嘢好節制,亦做好多運動,我覺得靚係令我自己舒服,所以朝住呢個方向去做。我做人就係咁,冇中間路線,一係我放任,一係我拉到緊,如果唔係咁,而家可能我係師奶一名。」瑜伽、游水、做Gym、打羽毛球,講得出的運動都做,除了武術,「以前做戲受過太多傷,除咗拍戲,我唔會打功夫。」惠英紅自評「古裝樣、鬼鬼哋」,最愛之一是聖羅蘭式有型smoky jacket,「我鋼條型,可以踩界少少,中性啲。」心目中的美魔女,是曾經型爆的張曼玉、及性感在骨子裏的鍾楚紅。


■2014年憑《殭屍》封最佳女配角。

心魔別煩我

40歲時曾患上抑鬱症,惠英紅十年前終克服心魔,重新出發拍劇拍片。無獨有偶,2010年一套《心魔》,連得金像獎影后、金馬獎、等多個獎,2014年《殭屍》再拎最佳女配角,為她打下無比信心。這幾年,連環拍,去年拍足七部,工作上被需要感認同,令一向介意別人眼光的她,擁有無比存在感,「響工作上搵到自己嘅價值,生存嘅一個價值,嗰個價值唔係錢唔錢、名譽唔名譽,而是自己嘅存在是有意義,而係人哋覺得我有價值。」當年折磨她的抑鬱病,原今可以回看、分析,前塵往事娓娓道來,接受過去,也不時警惕自己,「有時一感覺自己唔開心,或者好似有啲嘢,我就會提自己:嗱,夠喇,唔好再搞我喇。」下月有三部新片一齊上,包括演腦退化病人的《幸運是我》,惠英紅坦言從同樣患此病的91歲媽咪取經。



人生另一半

美魔女也可以找到第二春,鍾麗緹、羅霖,甚至當年60歲以上的劉曉慶。惠英紅對下半場人生的伴侶?「有就有,冇就冇啦,越大年紀就越冇得強求。」不強求,條件還是要有,不接受姊弟戀、不接受花女人錢、動手動粗的,一律免問,「最緊要有志氣,唔需要有錢,唔需要靚仔。我自己讀書少,聰明同讀書多嘅,可以蓋過我嘅自卑。」



■鍾楚紅及張曼玉(右)是惠英紅眼中真正的美魔女。





買樓必勝法

惠英紅去年拍七部電影,講笑卻被當真,指她一年賺了七層樓!不過,翻查資料,惠英紅雖在雷曼事件中過伏,輸了上百萬,但的確逢買樓必賺,「磚頭裏面我都賺唔少,係真嘅,我冇賭命,買磚頭起碼第一時間自己有樓住;第二,無人搵我拍戲,我都可以收租,或者賣咗佢,咁樣安全啲。」八卦問,必勝方法和現時應否入市?惠英紅大笑:「我唔知,我都要問吓人先知。」



更多精采時尚內容,盡在http://add.appledaily.com





來源: http://hk.apple.nextmedia.com/entertainment/art/20160707/19684062
PermaLink: https://articles.zkiz.com/?id=302925

【add】名人時尚:Jessica完美女強人

1 : GS(14)@2016-07-13 05:15:49

■Jessica以時裝設計師的身份現身香港,展現女強人一面。


【獨家專訪】韓國女團少女時代前成員Jessica離隊後,早前推出個人專輯回歸樂壇,演藝事業上搏殺之外,她兩年前創立的時尚品牌亦做得有聲有色,在太陽眼鏡系列之外還發展出成衣系列。當日少女已蛻變成事業型女強人。撰文:趙潔恆 攝影:郭賢興
Jessica上星期專程到港,為自家品牌Blanc& Eclare的成衣系列宣傳,緊密行程中接受《add》的獨家專訪,全程以流利英語大談時尚經。
Jessica離隊後人氣不但未有下滑迹象,還不時現身內地真人騷如《全員加速中》,又與陳偉霆合演電影《那件瘋狂的小事叫愛情》,中韓兩邊飛,在百忙中同時兼顧品牌的設計工作殊不簡單,Jessica就表現得相當謙虛,「今時今日很多人都身兼多職,身為藝人都有歌手、演員、主持等不同的工作崗位,時裝設計是其中一部份,但好幸運我的品牌團隊一直幫助我,沒有他們我不會做得到的。每日做不同的工作,真的很有趣。」



■Jessica形容自家品牌是走摩登又有女人味的風格。

■妹妹Krystal是品牌的繆思。



獲妹妹啟發

Jessica的品牌風格固然有濃濃的韓系風,笑言是從妹妹Krystal身上得到啟發,「我的設計都幾受Krystal的影響,有時見她坐在梳化上,穿上牛仔褲與鬆身的T恤,就已經很chic很漂亮,所以我想設計完美的T恤給女生穿上。」她與妹妹感情要好,連時裝品味都十分相似,「我們都很喜歡穿基本服飾,還會交換牛仔褲來穿。」



■品牌在希慎道I.T設期間限定店至本月20日,服裝定價$570-$2,585。

太陽眼鏡$2,250



最講究剪裁

說起設計工作,身為新手的Jessica坦言遇上不少挑戰,「最大難題一定是布料與剪裁了,我對剪裁特別挑剔,尤其是牛仔褲,經過很多個樣品之後,才製成我要求的作品。參與過製作過程之後,知道設計有多難,每一件作品要放多少心力,真的欣賞時裝行業內的每一位。」



更多精采時尚內容,盡在http://add.appledaily.com





來源: http://hk.apple.nextmedia.com/entertainment/art/20160713/19692167
PermaLink: https://articles.zkiz.com/?id=303561

【add】機場Look必備

1 : GS(14)@2016-07-13 05:15:49

韓星出入機場的打扮絕不留力,帶起了機場時尚,Jessica經常周圍飛,卻笑說自己在機場一點都不華麗,「我次次都是穿最舒服隨意的T恤與波鞋啊!」但她的機場look裝備一定要有太陽眼鏡,「如果沒有太陽眼鏡的話,因為有很多人會拍照,而我的眼睛會周圍望,拍出來的樣子一定不好看。」





來源: http://hk.apple.nextmedia.com/entertainment/art/20160713/19692173
PermaLink: https://articles.zkiz.com/?id=303562

【add】時尚Tips:顯瘦秘訣

1 : GS(14)@2016-07-13 05:15:49

一直都是時尚icon的Jessica,今次更提供了時尚貼士給各位女士!



記:記者 J:Jessica記:如何穿出個人風格?
J:你要清楚了解自己,應該要穿甚麼剪裁好看,我覺得越穿得簡單自然會越有時尚感。記:2016秋冬潮流?
J:秋冬要注意一些卡其色的服飾,tailor jacket與大褸會帶出女性silhouette,都會是流行的款式。記:如何可以穿得顯瘦一點?
J:通常我會穿鬆身的上衣,不太貼身的,再襯一條skinny jeans,看來就會更顯瘦。又可以選鬆身的summer dress,短裙可以露腿,看起來都會苗條。





來源: http://hk.apple.nextmedia.com/entertainment/art/20160713/19692169
PermaLink: https://articles.zkiz.com/?id=303563

Next Page

ZKIZ Archives @ 2019