ZKIZ Archives


「休兵一天好嗎?」漢堡王奇招整到麥當勞

2015-09-07  TCW

接受對手的合作提議,讓自己從領頭老大降格為聽話老二;或是斷然拒絕對手,卻招來惡評,哪一種做法划算?速食龍頭麥當勞選擇後者,網路鄉民因而表態:「來去漢堡王!」

八 月底,漢堡王買下《紐約時報》等報章全版廣告,衝著麥當勞喊話:「漢堡大戰打個沒完,咱們休兵一天如何?」指定九月二十一日世界和平日,雙方化敵為友,並 選好一日快閃餐廳義賣結合兩家招牌產品的麥華堡(McWhopper),更做主將所得全數捐贈公益組織Peace One Day。

漢堡王的奇襲行銷攻勢完全是有備而來,因為它同步推出網站,詳述企畫內容,從麥華堡配方、快閃餐廳選址,到當天店員的特製制服等,製造出一種心甘情願忙進忙出、打點前置作業,而老大麥當勞只需點頭就好的誠意感。

網友酸麥當勞:臉丟光

麥當勞執行長伊斯布克(Steve Easterbrook)很快就在臉書上讚許「了不起的構想」,但重申雙方只是「競爭關係」,擺明不願隨之起舞;還附上一句調侃「注:下次打通電話就好了」。

他當著全天下看官的面,輕易丟掉善意的橄欖枝,看在媒體、粉絲眼裡,成了扣分行為。《金融時報》(Financial Times)說,這是充滿算計的提案,但只有沒心肝的企業會拒絕;在美國最大的鄉民論壇Reddit上,「一整年沒進過漢堡王」的網友馬上衝去嗑華堡。

臉書用戶的反應更激烈,有人看到貼文後說:「麥當勞把自己的臉丟光了。」也有人說:「大失算,公眾意識才能創造可長可久的影響力。」最重磅的批評則是粉絲心痛:「大家都覺得這正是麥當勞改進顧客體驗的好機會。我們年輕人只能看著它老化、過時……。」

《華盛頓郵報》(Washington Post)美食專欄作家卡門(Tim Carman)分析,麥當勞無意中美化對手形象,代價卻是大哥風範盡失;漢堡王則像乳臭未乾的小毛頭,極盡挑釁能事,但「這場小戰役不會改變各自的困境,還不如快去解決兒童肥胖的問題。」

 


休兵 一天 天好 好嗎 漢堡 王奇 奇招 招整 整到 麥當勞
PermaLink: https://articles.zkiz.com/?id=159191

電視風雲 - 王奇雲 一幅丟空嘅地皮 (2013年01月23日)

1 : GS(14)@2013-01-24 00:54:17

http://www.am730.com.hk/article.php?article=139764&d=1949
【am730專欄】每日響將軍澳返工,都會經過嗰塊批俾新電視台嘅地皮,每一次我都幻想再同女朋友Carol一齊返工嘅日子,佢辭職過檔嗰陣,我哋返工一東一西,相隔十幾廿個地鐵站,日日感覺好似分開好遠,如果新電視台嘅製作中心起好,公司搬返入工業邨,咁我哋又可以一齊返工,一齊放工。以上係我對Carol專一嘅想法,事實嘅真相係,我唔係好想嗰個新電視台製作中心起咁快,點解?傻嘅都聽得出,我係為咗依家有時可以同Jackie返工放工一齊坐城巴,如果Carol回歸,試問我又點可以咁放肆吖?
話時話,塊地皮又真係空置咗好鬼耐,仲停晒工添,搞到好多小道消息周圍傳,話個製作中心唔會響有牌前動工,我問Carol,佢都唔清唔楚,聽聞話公司平整緊地皮,又好似話招緊標喎,總之響公司都無人提無人講啦。但我又收到外面另外一啲未經證實嘅料,話有工程公司連標書都懶得入,皆因發牌單嘢仲未有聲氣,費事浪費工夫咁話,單料係朋友嘅朋友傳番嚟,無從稽考,但又話因為收到內部料至咁做,係唔係真呢?咁就自己決定嘞,我唔敢下定論。
Carol唔知係咪做得辛苦,壓力又大,呢輪成日病,死頂都仲要寫稿,做男朋友真係睇見都心痛,早知係咁,就叫佢唔好跳槽。弊!我專一嘅本性又出番嚟添!明明我恨得Carol唔喺電視城,我至有機會多啲同Jackie「打邊爐」,日日增進感情,點解我又心軟?呢啲係咪良心發現?個天會唔會懲罰我呢個三心兩意嘅男人? (逢周一至五刊載)
電視 風雲 王奇 奇雲 一幅 幅丟 丟空 空嘅 地皮 2013 01 23
PermaLink: https://articles.zkiz.com/?id=282175

電視風雲 - 王奇雲 我係秘撈人 (2013年01月30日)

1 : GS(14)@2013-01-30 22:58:45

http://www.am730.com.hk/article.php?article=140787
【am730專欄】噚日講開秘撈呢瓣,真係講極都唔完,撈得我哋呢行,無秘撈過就叫失敗,唔係你清高,以前啲前輩教落,千祈咪推job,最多接番嚟寫唔晒分俾兄弟姊妹做,如果唔係人哋以後都唔鬼揾你。我咁多年都死記響心度,到今時今日我秘撈都無停止過,我嘅理論係,人家搵我唔係我特別寫得好,又唔係價錢平,只係我服務周到,一叫即到,趕起上嚟肯同人捱通宵趕稿,唔會失去聯絡兼夾永無甩拖,於是乎咪多人關照囉。
我女朋友Carol就好唔同,佢唔係唔秘撈,之但係揀嚟撈,仲好嫌尖腥悶,佢嘅原則係價錢平唔接、趕時間又唔做、無上期收更加無得傾,所以一年到尾都無幾多人搵佢寫,而佢又樂得清閒,尤其係過咗檔之後,新公司講到明嚴禁秘撈,佢份人咁怕死,更加唔會接,我問佢係真唔係全世界都守規矩,Carol話人哋嘅事無謂講,亦唔多想知,我好明嘅,呢行好細,又難守秘密,費事口疏疏影響到人就唔好啦,於是我都無追問落去。反而響無記咁多年,好多人都陽奉陰違,靠秘撈養妻活兒,而公司又無乜點理,有人可能良心發現啩,編劇一直人工已經唔叫高,仲唔俾人響外面幫補下,想趕絕人咩?
你哋自然會問,咁秘撈法會唔會影響日頭嗰份job?哈哈,有人打機,有人打通宵蔴雀,有人上深圳揼骨,都可能會影響日頭份工㗎,秘撈又有咩嘢分別呢?大家千祈咪歧視「秘撈人」,刀要磨至利,度多啲不同戲種都有好處嘅,做人眼光都會廣闊啲。

王奇雲  (逢周一至五刊載)
電視 風雲 王奇 奇雲 我係 係秘 秘撈 撈人 2013 01 30
PermaLink: https://articles.zkiz.com/?id=282230

電視風雲 - 王奇雲 秘撈有無公價? (2013年01月29日)

1 : GS(14)@2013-01-30 22:59:08

http://www.am730.com.hk/article.php?article=140608
【am730專欄】做我哋電視呢行,發達唔使旨意,餐揾餐食,如果知慳識儉都可以過到日子嘅,以前成日有外快揾,寫下「台灣戲」、「馬拉劇」,雖然錢少,但係密食當三番嘛,山大斬埋有柴都唔錯㗎,有兄弟做做下仲響吉隆坡嗰邊識埋女朋友,落地生根添!呢啲好日子依家無㗎啦,剩低嘅只有大陸劇撈,之不過呢啲人民幣都唔係咁容易賺,通常收劇本費係一件好麻煩嘅事,大部分人都試過收唔足嘅情況,咁可以點?你哋試過返大陸追數未?試過就會明白編劇嗰種辛酸,俾人拖數同走數,基本就係尋常事,咪以為有名有姓嘅老闆唔呃人,根據出嚟撈嘅江湖經驗,愈有頭有面嘅人,走你數嘅機會愈高,反而無乜知名度嘅製作人,就一手交錢,一手交稿,中伏機會細好多。
好多行外人問我哋,一集劇本收幾多錢,嘩!呢方面真係海鮮價喎,新人俾五千你咪當俾機會,阿姐收七、八萬都唔嫌多,有名氣嘅老師級十萬都有,所以你叫我點答好?仲有行裡面個個都要面,就算收三萬都唱到五萬,邊度可信?不如我就俾個保守些少嘅答案大家啦,一般收萬五到二萬,好似唔多,但係你要諗下,監製要食你價,劇審又分部分,中間人又收少少,到你手係咁上下,如果你收到多過呢個價,唔代表你叻仔叻女,只係人哋食價食得少,對你有良心,又如果收到少過呢個價好多,咁介紹你嗰位,就未必夠朋友啦!你手緊咪當唔知,算囉!做人有來有往,無謂踢爆人嘛!

王奇雲  (逢周一至五刊載)
電視 風雲 王奇 奇雲 秘撈 有無 公價 2013 01 29
PermaLink: https://articles.zkiz.com/?id=282231

電視風雲 - 王奇雲 竟然怕對方執笠? (2013年01月28日)

1 : GS(14)@2013-01-30 22:59:35

http://www.am730.com.hk/article.php?article=140406
【am730專欄】Carol前幾日見到佢老闆又上電視爭取發牌,呢次仲係響立法會添,佢嗰組幾個同事即刻放低工作,響電視前面睇直播打氣支持,反而我哋呢邊就乜都唔知,如果唔係Carol WhatsApp俾我,叫我睇電視,我都唔知單嘢,但係我哋呢邊反應就好唔同,一於懶理,仲無睇,你哋唔好以為大家唔關心,只係編劇開會房唔係每間房都有電視機,做電視竟然無電視睇,有陣時都覺得幾諷刺。
我睇到自己公司有人發言,扯晒火咁嘅樣,話政府唔理市場容納到幾多個電視台,就立亂話發牌,好似好有道理,但我又依稀記得,呢條友上個禮拜響個論壇又話,競爭之下要執笠一定唔係大台,而係新加入嘅投資者,咦?咁就離奇嘞!佢竟然擔心埋人哋嗰份,怕對方執笠?乜做生意會有咁好嘅人咩?好心佢後面啲智囊幫手度條好少少嘅橋至上立法會啦,我身為低佢十幾級嘅員工都有少少滴汗呀。果然對家投資嗰個一句:「你由得我蝕啦!」有人就駁唔到上去,咁又係,唔通佢話:「哎喲!我入咗十幾廿球貴公司嘅股票吖嘛,你蝕咪等於我蝕!」
問心嗰句,公司上上下下除咗大老闆級數,邊一個唔想快啲有新牌?我可以坦白話俾大家知,家陣啲手足表面上有工夫照做,心裡面就另一套,邊一套?講到白就唔係幾好啦,係咪?如果你哋有睇《一代宗師》,裡面有一句:「刀最厲害是鞘,因為在於藏」,你就會明,一日未有好消息,大家照樣三呼萬歲,繼續寫師奶戲娛樂大家,橫掂無記又唔介意抄,你哋又照睇,我劇本又可以出少啲力寫,幾好!

王奇雲  (逢周一至五刊載)
電視 風雲 王奇 奇雲 竟然 對方 執笠 2013 01 28
PermaLink: https://articles.zkiz.com/?id=282232

電視風雲 - 王奇雲 我急人唔急 (2013年02月18日)

1 : GS(14)@2013-02-18 23:34:45

http://www.am730.com.hk/article.php?article=142661
【am730專欄】新年流流,應該開開心心,本來都唔想同大家呻太多苦水,始終今年公司識做,封咗幾百蚊一封大利是,破晒紀錄。但係的確近來有啲事令我心煩,話說同屋企人喺年廿九食團年飯嗰晚,姨媽姑姐好似習慣咁,當住我女朋友Carol面,問我哋幾時結婚,新年可以派利是俾佢哋啲仔女,老實講,以往自己知自己事,我都係吊兒郎當,笑吓拖吓就算,不過自從Carol轉咗新公司,再唔係日日可以對住佢一齊食lunch,大家少見咗,先至發覺自己生活上有啲唔習慣,好似依家食晏時,無人會喺我差唔多食完碟飯,就遞定張紙巾俾我抹咀,呢樣嘢,係我嗰次彈咗幾滴腩汁落件新tee度,先察覺到Carol喺身邊同埋嗰包紙巾嘅重要,加上公司加咗我人工,個人多咗安全感,令我開始去諗吓開拓人生另一階段嘅大事。
我試過同Carol傾,我只係講咗intro,都未tag入正題,向來眉精眼企嘅女朋友大人,已經好似知道我想開咩topic咁,好快就二、三吓功夫打發咗我,呢次簡直係劍未出鞘已陣亡,之後佢就同我講,呢排佢公司又有新劇開,佢要忙住賣橋,依家劇本要玩淘汰,壓力好大,叫我俾啲時間佢,最後嗰句說話,令我聽者有意,好似係勸我唔好諗結婚住,其實同佢開口之前,你估我無計過度過咩,我都知佢依家喺新公司係當紮期,身為同行又點會唔理解吖,但身為負責任嘅男友,大家拍咗拖咁耐,歲月不留人呀,計劃定都啱啦,依家嘅港女真係愈來愈巴閉,有個傻佬話想娶你,竟然話要事業為重,我開始覺得同Carol嘅距離愈來愈遠,到有日真係發咗牌嘅話,佢會唔會改變主意呢?(逢周一至五刊載)
電視 風雲 王奇 奇雲 我急 急人 人唔 唔急 2013 02 18
PermaLink: https://articles.zkiz.com/?id=282335

電視風雲 - 王奇雲 阿Sir派利是 (2013年02月15日)

1 : GS(14)@2013-02-18 23:35:08

http://www.am730.com.hk/article.php?article=142479
【am730專欄】電視台向來係好著重大節日嘅地方,以前喺清水灣,行過道具部附近,嗰啲大型節日道具更加係放到成條路都係,好似有半架車咁大嘅聖誕波、又有成層樓咁高、寫住「恭賀新禧」嘅牌坊,呢啲都係為綜藝組節目準備嘅道具,而且你哋咪以為撈電視呢行飯嘅人好潮,其實不知鬼咁傳統,有唔少部門阿頭私下搵高人睇風水擺陣,亦有位監製試過,過年時一擲千金,搵人托咗盆五呎高嘅桔樹返嚟寫字樓,佢話要攞個意頭賀佢套新劇喎!呢啲大家見怪不怪,咪當係傳統習俗囉。
講開電視台傳統習俗,一定唔少得大年初一,阿Sir喺新春團拜節目內,大派利是嘅環節,呢個畫面我細細個就喺電視機度睇,嗰時真係好有新年氣氛,覺得呢個阿Sir好豪氣,總之人人有份,大家開心,心諗如果自己都有份喺現場佢封利是就好囉,又幻想第時自己個老闆有無咁大方豪爽呢,點知,讀完書之後,呢個阿Sir真係做咗我老闆,不過,講出嚟你哋未必會信,呢封利是,我喺呢間公司做咁耐都未去過,原因好簡單,無喺現場咪無囉;初入行嗰年,老媽子大年初一,一早就拍我起身,我通完頂個人都未回魂,佢竟然問我做咩唔返公司開工利是,嗰刻係有諗過起身返公司湊吓熱鬧,之但係肉體同靈魂配合唔到,再加上諗吓返到公司又唔係有工作在身,大人大姐,點樣身為戲劇組嘅人,特登走去綜藝組嘅現場節目度出現呀,唔通掛住個職員證,同個FM講,我係嚟排隊阿Sir封利是㗎,所以年年如是,估唔到呢封利是,同我係這麼近,那麼遠,依家連老細都轉埋,真係有啲可惜。
電視 風雲 王奇 奇雲 Sir 派利 2013 02 15
PermaLink: https://articles.zkiz.com/?id=282336

電視風雲 - 王奇雲 師兄夢工場 (2013年02月25日)

1 : GS(14)@2013-02-26 00:49:14

http://www.am730.com.hk/article.php?article=143659&d=1979
【am730專欄】之前同大家講過,電視節目影響觀眾,即係日日影響緊社會大眾思想,好似我個肥表妹咁,追看三線劇,睇到又投入,又大反應,成日當正自己有份做咁,睇見有咁嘅觀眾,都唔知係讚套劇成功,定係話佢鍾意發白日夢,之不過無可厚非,電視台的而且確係一個實實在在嘅夢工場,如果你細時發明星夢,滿咗18歲,依家有條捷徑入行,只要你面皮夠厚,不論男女都可以參加選美,之後就有機會被簽做藝員,傳統啲嘅做法,不妨參加藝員訓練班,憑住耐性同埋毅力,再加埋運氣,我唔敢話假以時日,一定可以好似發哥咁成為國際大明星,但起碼可以滿足到做自己鍾意做嘅行業吖,淨係呢樣嘢都好唔簡單㗎。
其實,唔止幕前有機會去滿足表演慾爆棚嘅人,有平台俾你入行,好似我哋幕後工作,亦有唔少年輕人感到好奇,充滿憧憬,好希望喺呢度製作出自己想要嘅作品。有位師兄,佢自細就鍾意寫吓嘢,中學時期,同學們課本以外,當然玩樂至上,最多都係吹吓水講畢業後做咩工好,喺佢嗰個年代,除咗有能力嘅就繼續升學之外,工作選擇根本唔多,女仔通常離唔開話去做文職,男仔就話去搵門手藝或者當差,但呢位平時唔多出聲嘅師兄,會考都未放榜,大家仲係懵盛盛咁去玩時,佢竟然已經走咗去電視台面試編劇訓練班,就係咁搵啱自己嘅路,一做就做咗廿幾年,出自佢手嘅作品,仲有唔少係膾炙人口嘅經典電視劇,所以話電視台無論幕前定係幕後,絕對係一個令人夢想成真嘅夢工場,香港地方細,至會有咁嘅可能,換咗外國,機會就渺茫好多。

王奇雲  (逢周一至五刊載)
電視 風雲 王奇 奇雲 師兄 工場 2013 02 25
PermaLink: https://articles.zkiz.com/?id=282358

電視風雲 - 王奇雲 賣電烤鍋哥仔 (2013年02月28日)

1 : GS(14)@2013-03-01 01:24:38

http://www.am730.com.hk/article.php?article=144257&d=1983
【am730專欄】講開「賣橋」呢個過程,對於做我哋編劇嚟講,係非常之重要,成功與否,是喜是悲,都係因「賣橋」而起。有啲行家,「賣」得掂,但寫唔叻,一樣可以撈得唔錯;相反,「賣」都賣唔掂嘅,就要辛苦啲嘞,賣多幾次,咪講到老細滿意收貨囉,不過個人認為「賣橋」時,我哋編劇就如同Sales一樣,響大小百貨公司俾人推銷電烤鍋無咩分別,不同之處只係技巧問題,無heart嘅咪硬銷囉,係師奶都叫你過主啦,高手嘅咪用說話迷魂你囉,早幾日我喺某商場就遇過一位靚仔promoter,莫講話佢氹到班先生太太,排住隊拎幾千蚊出嚟同佢買隻鑊,連我呢個麻甩仔都俾佢嘅話述吸引到停低腳步,睇佢show off同做presentation,心諗,呢個果然係人才!如果佢都寫到吓嘢,又有興趣入行,我做佢介紹人又點話。
做我哋呢行要賣橋成功,唔單止要將個故事包裝得好,要有條理,要有吸引精彩之處,自己本身嘅outlook都唔可以掉以輕心,好似上述嗰位promoter,行出嚟乾乾淨淨,精神飽滿,起碼唔乞人憎先啦,一take過當然係意料之事,所以成功非偶然,事前功夫準備得好,好過你扭盡六壬去度啲細橋。老實講,我都好耐無喺無記見過好似位哥仔咁落力去賣橋,包括我自己,可能大家喺呢度撈咁多年,都習慣嗰種懶有系統嘅模式,同埋懶散型嘅工作態度,賣橋都變得好似家常便飯,公司又唔會唔開廠,心態最多斬多隻雞加料,等賣相好睇啲咁,有時我都心癢,想有人同我過吓招,始終刀唔用,就會生女  嘛。
電視 風雲 王奇 奇雲 賣電 電烤 烤鍋 鍋哥 哥仔 2013 02 28
PermaLink: https://articles.zkiz.com/?id=282369

電視風雲 - 王奇雲 一身職業病 (2013年03月04日)

1 : GS(14)@2013-03-04 23:24:18

http://www.am730.com.hk/article.php?article=144689&d=1986
【am730專欄】Carol公司上星期出咗意外,響外景拍攝時有攝影師跌親,好在最後無生命危險,大步檻過,我呢邊睇到新聞都嚇一跳,因為我本人係識得「大灰熊」嘅,係喺嗰間老細跳「騎馬舞」電視台合作過,唔係喺無記,佢個人做嘢好鬼盡責投入,又好好人,所以大家一講起單嘢,都好擔心,好彩吉人天相,咁都算安心少少。
拍攝外景,本身就係一件危險工作,即使唔係拍飛車、爆破同槍戰,現場都往往危機四伏,例如嗰啲好似蟒蛇嘅大小線材,隨時隨地會勾到;又好似啲釘同螺絲,如果執景時遺漏咗,就係危險;仲有,為咗攞好角度拍攝或者做戲,手足要擒高擒低,都會係陷阱,當年Beyond家駒響日本就係咁樣出事,大家應該仲記得,所以開工冇安全工作意識,唔打醒十二分精神,真係好容易出事。
對於我哋班寫稿嘅,表面上無呢亭顯著危險,但係唔代表無事,我環顧周圍班兄弟姊妹,雖則唔算天殘地缺、五勞七傷,但係都有周身病痛,病例包括有:坐骨神經痛、手部關節炎、偏頭痛、頸椎炎、中央肥胖、老花等等。眾所周知,呢啲症狀都同長期對著電腦打字的後果,可以話係慢性病,日積月累開夜寫稿咁形成。Carol身受其苦,但係我唔方便講上面咁多瓣佢中咗邊幾瓣,佢去咗新公司之後,壓力大咗,要求高咗,頭痛都多咗,我心裡面都好唔舒服,我認為,推廣工業安全,除咗製作,創作都要有份,第一步首先要關心下佢哋嘅心理健康,同壓力問題,至講其他漂亮說話!(逢周一至五刊載)
電視 風雲 王奇 奇雲 一身 職業病 職業 2013 03 04
PermaLink: https://articles.zkiz.com/?id=282379

電視風雲 - 王奇雲 天生儲紙狂 (2013年03月12日)

1 : GS(14)@2013-03-12 23:27:36

http://www.am730.com.hk/article.php?article=145942&d=1994
【am730專欄】老媽子最近喺儲物櫃,摷咗我儲咗十幾年嗰三個紙皮箱出嚟,因為佢投訴個箱開始腐爛,裡面有小昆蟲走出嚟,老實講,呢三箱嘢,係我入行後嘅手稿,公司嘅電視劇本又有,出面秘撈嘅大陸劇本又有,佢哋係我爬格仔,幾乎每一個字都係親手寫落去,一點一劃,標點符號,所有都有我當時嘅情感喺裡面,更加係我曾經喺呢行捱驢仔嘅血汗證據,雖然講到咁重要,但我始終極之唔願意搞佢哋,相信好多人都同我一樣,覺得佢哋整整齊齊喺個箱裡面,又好地地咁喺儲物櫃疊起咗,久而久之,會眼唔見為乾淨,唔係老媽子勒令我要短期內處理好佢,我都唔會的起心肝喺周末睇睇佢哋。
當然最簡單嘅方法係掉晒佢,但我真係唔捨得,因為唔單止係自己努力嘅證據喎,更加係香港,甚至東南亞電視劇本發展嘅歷史證明,應該珍而重之,留待他日俾自己嘅子孫欣賞,再講,我覺得儲多十幾廿年,可以捐俾香港文化博物館,搞番個電視劇本展,都叫做為咗呢行嘅歷史出番少少力吖。
Carol明白呢堆紙對我嘅重要,佢諗咗一陣,建議我scan咗做pdf file,我同意咁樣完全避過晒潮濕、生蟲、寸金尺土嘅問題,但係手稿喎,變咗電腦檔就唔係原汁原味啦,試諗吓,你去睇達文西文化展,只喺個螢幕度睇pdf檔,你都唔冧啦,所以最後我去買過啲紙箱,再加埋防潮、防蟲包,重新將佢哋包裝好,安全送到我以往租開嘅迷你倉度擺放,臨關上倉門嗰刻,我先發現原來裡面有好多嘢都係我一直唔捨得掉,或者覺得有用但好日唔會用嘅嘢,同樣需要我去處理。

王奇雲  (逢周一至五刊載)
電視 風雲 王奇 奇雲 天生 儲紙 紙狂 2013 03 12
PermaLink: https://articles.zkiz.com/?id=282395

電視風雲 - 王奇雲 不如唔好發 (2013年03月25日)

1 : GS(14)@2013-03-26 01:36:42

http://www.am730.com.hk/article.php?article=147859&d=2005
【am730專欄】3月近尾,新免費電視牌照依然無聲氣,一方面係由於無記司法覆核拖住,另一方面就係傳媒同社會關心重點漸漸去咗「佔領中環」同「2017普選行政長官」,坦白講,呢兩單嘢又真係大啲,之不過新牌同佢哋看似無關卻又有關,都係上面點樣操控香港嘅部署一部分,咪以為娛樂事小,政治事大,之前「藝發局」頒獎俾狂插《低俗喜劇》,就係娛樂不離政治嘅好例子,換句話講,做人有時候真係會「瞓響度都會中槍」,唔到你唔明哲保身。
近期另一單唔多起眼嘅新聞,就係我哋以前嘅名監製夫婦過檔咗Now記之後,終於宣布有劇開嘞!原來係同內地合拍嘅古裝劇《大漢賢后:衛子夫》,詳情和選角未有公開,據說主要係內地演員,先至可以上黃金檔。我睇到段新聞心情有多少唏噓,呢兩位前輩響香港拍過好多成功劇集,今時今日名成利就,竟然都要向北望搞合拍,呢種劇本題材我唔敢話舊同老土,但一定唔叫創新,仲要經過重重審批,睇內地大明星面口,仲要用埋內地人員拍攝,咁究竟對香港嘅電視業有咩嘢幫助?新人又有無機會?一連串嘅問題,令我想佢哋不如留喺無記,反而仲可以培育多啲新人,家陣猛賺人仔,實在浪費咗囉。
當然,人各有志,人望高處,人仔萬歲………(下刪三百字),我要問,發新牌照嘅目的,乜唔係除咗俾觀眾多啲選擇,仲有個使命就係發展本地創意嘅咩?咁努力去搵上面合拍,咁想要官審批,咁鍾意用大陸演員,咁不如唔好發啦!

王奇雲  (逢周一至五刊載)
電視 風雲 王奇 奇雲 不如 好發 2013 03 25
PermaLink: https://articles.zkiz.com/?id=282418

電視風雲 - 王奇雲 話之你香港人 (2013年03月28日)

1 : GS(14)@2013-03-30 23:23:29

http://www.am730.com.hk/article.php?article=148400&d=2008
【am730專欄】當新免費電視牌照仲未有著落,江湖依然多事,早排就謠傳「魔童」係「泊車仔」,某傳媒大亨幕後揼錢俾佢玩電視,搞到佢要出聲明澄清咁滯,喺自己個專欄義正辭嚴否認,叫人咪亂咁噏。以佢嘅為人,向來千山我獨行,笑罵由人,搞到要親自解畫,事情都幾嚴重,程度可能去到影響發牌,先要走出嚟抗辯嘅啫!
不過最令人覺得騎呢嘅係,「不死鳥」台失驚無神話有意申請免費電視牌,擺到明係要玩埋一份,甚至係做媒,無論政府發唔發牌,佢都可以出聲,明係申請,暗就搞局,係人都睇得出,其心可疑,而且佢同大陸關係比「A記」更緊密,香港人日夜期待下,無可能最後係一個「不死鳥」化身嘅「中央十台」吖?
Carol話呢招好毒,一定背後有高人指點,只要佢一申請,以後有關事無大小都可以插咀,例如:遲發牌佢就話唔急住,叫大家慢慢等下;萬一唔發,佢又可以扮埋受害者,令政府無厚此薄彼嘅嫌疑,諗下諗下,呢個消息都幾凶險,擺明有後著。我再睇埋噚日生果報左丁山,佢話政府又拋出3G電話頻譜出嚟拍賣,明係益庫房收入,暗就俾機會中移動不惜代價投到,擴大市場佔有率,令其他電訊商牙痛咁聲。
兩條看似無關事嘅新聞,一夾之下,我個心都寒一寒,再加埋姓喬嗰個官員,疾言厲色叫我哋預咗2017選特首有預選,我深深感到上面對傳媒同選舉嘅操控,愈嚟愈明顯,更話之你香港人反應,真係好鬼火滾!
(逢周一至五刊載)
2 : GS(14)@2013-03-30 23:26:04

http://realforum.zkiz.com/thread.php?tid=50191
活力先生評王維基『實為「肥佬 L」個「泊車仔」』
電視 風雲 王奇 奇雲 話之 之你 香港 2013 03 28
PermaLink: https://articles.zkiz.com/?id=282454

電視風雲 - 王奇雲 諗多少少至寫 (2013年04月11日)

1 : GS(14)@2013-04-12 00:29:40

http://www.am730.com.hk/article.php?article=149885&d=2015

【am730專欄】上個禮拜嗰套《女警愛作戰》大結局,隨即俾網友狂鬧,罪名有兩項:第一係結局涉嫌「炒冷飯」,女主角從查車、發現運毒、槍戰場面,同早前森美、陳敏之嗰套警匪劇大同小異;第二係周麗淇由一部燃燒汽車逃出後,芳容依然白淨,化妝無損,秀髮飄逸,令人咋舌。
其實,如果同無記嘅劇集要求認真,你早就輸咗。網上早就流傳《帝女花》一場戲,陳豪飾演嘅崇禎皇帝有句對白:「………同朕去check清楚」;仲有陳豪響民初劇《天梯》某套戲服袋裡面嘅發光手提電話;當然,唔好忘記《萬凰之皇》嘅膠樽烏龍茶啦!唔知點解,我哋幕後對呢啲事當笑話,通常用「鬼掩眼」做解釋就算,至於結局差不多,好心又唔好咁計較,橫掂都睇咗咁多年,仲有乜嘢新橋吖!女主角又梗係貪靚㗎啦,你哋睇都係因為周麗淇正啫,整黑塊面又點滿足到大家呢?
反而令我哋編劇覺得唔多舒服嘅,係開頭有警員「無意中」遮擋記者鏡頭嗰一幕,好明顯係影射李克強訪港事件,後來警務處長用「黑影論」回應,劇集竟然改做記者屈差人,謝天華仲大聲夾惡,令人對記者嘅形象生厭。我初時估編劇可能係玩曲線,玩抽水,諗諗下又無理由咁高章,仲有電視觀眾係一群好簡單直接嘅生物,睇見乜就係乜,玩曲線係唔work,最後只可以話個編劇無腦,無諗過社會反應,就隨便落筆。編劇除咗娛樂大家,仲有好大嘅社會責任,如果收咗贊助費「局」你要寫,我同情,無計;但係無任何好處,而又助紂為虐,幫權貴講說話,咁就真係好無謂,仲有失身分,有失斯文添!

王奇雲  (逢周一至五刊載)
電視 風雲 王奇 奇雲 多少 少至 至寫 2013 04 11
PermaLink: https://articles.zkiz.com/?id=282481

電視風雲 - 王奇雲 仇富係必然 (2013年04月22日)

1 : GS(14)@2013-04-22 22:52:09

http://www.am730.com.hk/article.php?article=151335&d=2023

【am730專欄】從前網絡上流傳一則「電視劇常見的九十九種場面」,唔知大家有無睇過,例子如下:
「01、聽到噩耗,手中的碗一定會掉到地上碎掉」;
「02、遭遇突變,傷心難過時衝到外面,天氣一定是打雷下暴雨」;
「03、掉到懸崖底下一定死不了,因此,跳海跳崖是百試不爽的逃生法。 」為免俾人以為呃字數,其餘就請自己上網搵。我睇完晒都不禁會心微笑,大大話話寫咗十幾年電視劇本,兩隻手唔多唔少都染滿咗多多少少「常見場面」,要計嘅話,何止九十九條?
編劇係咪腦殘?偷懶?可能有時候信手拈來,不假思索,潛意識就用咗個設計;但係有好多情況又唔一定,編劇係有心兼刻意,例如:「74、電視劇中的高學歷者往往不是甚麼好人。」呢一條「金科玉律」以前好多劇集用好多,最經典自然係神童韋家輝監製操刀嘅長劇《義不容情》,呢套嘢裡面黃日華係少讀書之輩,有情有義,而溫兆倫就係大學生,壞事做盡,從此就奠定咗「大學生、有錢人係衰人」嘅方程式,以後嘅長劇男主角,如萬梓良、羅嘉良等等,全部都係低下層出身,奮發向上。點解要咁?點解電視劇唔寫一個讀書多、賺錢叻嘅成功男主角?又唔俾佢有好中產,甚至blue blood嘅家庭背景,乜呢啲人社會上無咩?佢哋做生意應該都有好多奇情故事㗎,好似呢輪碼頭工潮嗰位好型嘅極高層嚴生,或者話工人自願返24個鐘嘅香港打工皇帝霍老爺,呢亭人先至係「香港精英」,高學歷叻人,又護主有功,無記係咪應該立刻開一部「碼頭精英」,表揚下佢哋?

王奇雲  (逢周一至五刊載)
電視 風雲 王奇 奇雲 仇富 富係 必然 2013 04 22
PermaLink: https://articles.zkiz.com/?id=282590

電視風雲 - 王奇雲 有情又有義(上) (2013年04月23日)

1 : GS(14)@2013-04-24 00:29:56

http://www.am730.com.hk/article.php?article=151524&d=2024

【am730專欄】近日,有亞記行家喺FB召集新舊同事出席聚舊晚宴,由幕前藝員到幕後工作人員,初步已有成百幾人,當然有唔少人經已離職,甚至轉行啦,我見搞手喺FB多次留言婉拒再有人報名,可見大家一呼百應。今次呢個純粹聚舊嘅活動,令到一班曾經共事嘅好兄弟群情洶湧,個個都報名出席,聽講甚少夜生活嘅「影后」鮑起靜鮑姐,同埋盧海鵬鵬哥都會出席,部分有工作在身嘅行家,仲誓言話一收工即到,可見事隔多年,大家依然有情有義,希望聚首一堂,開開心心食番餐。
曾經有下屬同我分享過,以前林伯時代喺亞記打工,無論台前幕後,同事間真係如同手足,大家會為節目嘅拍攝工作盡心盡力,佢分析過可能大家體諒公司資源有限,惟有靠大家幫忙合作去完成任務,即使唔係本份,亦在所不辭;再難聽啲講,外界又既定佢哋係弱台,所以如果喺咁嘅定位造出驕人成績,更加係錦上添花,當年嘅劇集《千王之王》同埋時事節目《今日睇真啲》就可見一斑,至於員工餐廳上下都係一條心,見有同事趕開工,茶水阿哥會盡量先招呼,又或者見到成個喪屍咁款,通頂做後期製作嘅同事,老闆娘會特別關照多碗例湯,無可厚非,佢哋嘅人情味的確比其他電視台濃厚,漸漸成為佢哋嘅文化。
我唔知依家嘅亞記仲有無呢份人情味,同事間仲有無存在無私嘅情操,之不過近年為咗新電視牌事件,有關嘅負面新聞的確多咗,淨係迫員工參加呢樣嗰樣,相信大家都唔會冧囉,雖然公司情不在,但同事心未變,此事實在難得,希望晚宴當日,各位盡興,不醉無歸。

王奇雲  (逢周一至五刊載)
電視 風雲 王奇 奇雲 有情 又有 有義 2013 04 23
PermaLink: https://articles.zkiz.com/?id=282621

電視風雲 - 王奇雲 大富貴 (2013年04月29日)

1 : GS(14)@2013-04-29 22:38:48

http://www.am730.com.hk/article.php?article=152400&d=2030

【am730專欄】提起想當年在亞記,其中令我最印象深刻,係有位平時衣著光鮮嘅師兄,轉數又快,工作又有效率,喺公司各組頭、監製都鍾意搵佢度嘢,佢為人友善,樂於教新人,曾幾何時,亦醒過我唔少料,大家熟落咗一排,佢仲帶埋我出去秘撈,有錢齊齊搵,每次開工都照顧埋我兩餐,夜收工時,明明唔多啱路都打的兜埋我返屋企,當時嘅我,見佢度嘢得、寫嘢快,仲要識湊出面啲老細,成日想喺佢身上學多啲,吸收多啲,直頭當正佢係偶像。無幾耐,有幾位做得耐過我嘅同事,不約而同咁無啦啦叫我唔好同呢位師兄行得咁埋,我追問原因,大家都自命君子,唔會講人是非,只係想提點我。
終於有一日,師兄搵得我好急,說話好緊張,原因係乜我已忘記,只係記得佢問我借三千蚊,我都係義氣仔女,仲拔刀相助好幾次添,條數愈來愈大,大到我都無能為力,我終於明白之前有同事提點我嘅係咩一回事。我嘗試去了解呢位亦師亦友嘅好兄弟,即使亞記人工唔高,但明明喺出面啲秘撈多到接唔切,應該財源滾滾至啱,又唔係衰賭,有咩理由係「重數組」嘅人呢?原來佢好多嘢只係表面風光,公司以外多秘撈又如何,收唔足錢又有,要走要拖數嘅又有,佢自己孤身寡仔,但開支鬼咁大,喺公司,為咗面子,同事嗌聲佢「師兄」,佢又請下午茶,喺出面,叫得我呢啲細嘅出嚟開工,佢又要照顧花費,去酒店coffee shop同老闆傾嘢,個老闆一時善忘無埋單就走先,咁又係佢頂,成個大富貴咁使錢法,你都咪話唔頭痛。後嚟我發現,呢啲事,其實喺我哋呢行好普遍,可惜有苦自己知。(逢周一至五刊載)

電視 風雲 王奇 奇雲 大富 2013 04 29
PermaLink: https://articles.zkiz.com/?id=282634

電視風雲 - 王奇雲 肥仔綜藝組 (2013年04月30日)

1 : GS(14)@2013-05-01 16:47:16

http://www.am730.com.hk/article.php?article=152511&d=2031
【am730專欄】做電視台嘅工作,有時為咗提高節目質素,度橋度到頭都痛,甚至日以繼夜趕稿、趕後期製作,做到你不似人形,話雖如此,其實又有好多「油水位」,唔講你唔知,尤其是綜藝組,多到唔到你唔接受,大家唔好誤會,我講緊嘅係合情、合理、合法嘅事。綜藝組基本上分為幾個大組,好似台慶、選美、籌款等,屬「大型節目組」,另外,長期每個星期要有嘢出街嘅音樂節目組同埋「資訊娛樂組」,仲有我最鍾意嘅「旅遊節目組」。響八、九十年代,唱片業盛世時期,各大唱片公司要推新歌,又或者要介紹新晉歌手,因為工作需要,必定搵人送隻CD放響你枱頭,俾你試聽後去介紹,甚至仲有埋歌手親筆簽名;做飲食節目,就更加隨時飯錢都慳埋,每次開廠都有大師級廚師為你下廚,去外景,唔係去介紹特色餐廳就係貴價餐,珍饈百味任你品嘗,咁梗係要待拍攝完成後啦,但都已經好幸福嘅嘞。至於旅遊節目組,簡直係我入行前夢寐以求想投身嘅組別,原因好簡單,感覺係公司俾埋錢請你去旅行喎!返工都寧舍醒神啦,當然唔止咁膚淺,拍攝之前要做資料搜集時,就足以增廣見聞,到你去到外地實景拍攝時,因為你係嚟拍攝介紹佢哋國家,有好多地方就算你參加咩豪華團都遊客止步嘅地方,當地單位都為你中門大開,能夠遇到嘅人同埋事,係你喺其他行業無法得到嘅體驗,所以話,綜藝組實在有太多令你意想不到嘅福利,即使你有大把錢都未必會得到,所以有時諗番起,我都好懷念喺綜藝組嘅日子,不過呢,為免廉記請飲咖啡,稍作聲明,所有嘢都有上報公司,咁多年我無飲過茅台,全無利益輸送㗎! (逢周一至五刊載)

電視 風雲 王奇 奇雲 肥仔 綜藝 2013 04 30
PermaLink: https://articles.zkiz.com/?id=282689

電視風雲 - 王奇雲 「飛紙仔」至大 (2013年05月06日)

1 : GS(14)@2013-05-07 01:25:53

http://www.am730.com.hk/article.php?article=153268&d=2034

【am730專欄】「本以為會看到娘娘們鬥得你死我活,結果只是兩個嬤嬤間的爭鬥;本以為如妃還會霸氣則(顯)露,結果她已變得溫柔賢淑………雖然憑借第一部積攢的人氣,前四集在優酷點播次數過千萬,收視並不算很糟,但《金枝慾孽2》的口碑仍可以說不如第一部。雷人的扮相、突兀的開端、凌亂的線索,只有熟悉的配樂還能叫人依稀想起第一部驚心動魄的後宮爭鬥。」以上是內地網絡對那齣神劇嘅評論,有人仲會用《甄環傳》嚟做比較,我就覺得啲大陸人好唔識貨。
周旭明,呢鋪我就撐你嘞!雖然頭兩個禮拜收視低迷,得廿零點,但係你作為另類創作人,響無記收視低先至係光榮,啲人唔知道,以為你介意,呢啲絕對唔係你fans,唔明白你不屑取悅普羅觀眾嘅心態。
自從亞記《我阿Sir係隻鬼》開始,到無記《O記實錄》,再到最近四套電視劇,你嘅另類風格深深吸引住我,雖然我未曾跟過你做過嘢,緣慳一面,背後又有好多人講你,但我都好想同你過一次招,睇下跟唔跟到你個腦諗乜。
仲有,啲人歸咎個戲睇唔明係因為「飛紙仔」,我好唔認同,皆因令人睇唔明正正係風格之一,試問《天與地》又有幾多人明?《心戰》又有幾多人分到嗰四個分身?咁睇唔明《金枝慾孽2》係好正常嘅事,你哋班人又唔先睇番第一輯先,就梗係唔明:宮女太監對食謠言、烏鴉、笛聲同太醫父子催生啦。大家記住,無「飛紙仔」就無兩套《金枝慾孽》,「飛紙仔」功勞至係最大!

王奇雲  (逢周一至五刊載)
電視 風雲 王奇 奇雲 飛紙 紙仔 至大 2013 05 06
PermaLink: https://articles.zkiz.com/?id=282712

電視風雲 - 王奇雲 電視氣味 (2013年05月09日)

1 : GS(14)@2013-05-10 01:42:02

http://www.am730.com.hk/article.php?article=153899&d=2037

【am730專欄】最近,女友Carol俾一位新同事嘅體味困擾,每次同佢近距離傾談,總會有種濃烈嘅男人味散發出嚟,雖然唔係體臭,亦唔係某牌子嘅古龍水味道,總之Carol覺得非常難聞,厭惡到直頭唔想同嗰位同事接觸,當我細問之下,原來嗰種體味同佢個ex陣除一樣,呢種氣味令佢記番起過去嘅一段失敗愛情,我好明白佢,因為無形無色嘅氣味,往往令人好敏感,而且會留下連自己都唔察覺嘅深刻印象,曾經有位學者,喺毫無預先知會情況下,將一般人覺得無咩特別嘅燒燶氣味,俾一位多年前經歷過大火災嘅生還者聞,結果嗰位生還者激動得歇斯底里,無錯,味道就係會令人勾起回憶。
呢個情況,同樣發生喺電視劇身上,當你係慣性觀眾,多年嚟喺同一個電視台,經已睇過一百、幾十套電視劇,你會發現每套劇都會有陣除,呢種味道你唔會聞到,只會感覺得到,唔係話故事類同導致,而係講緊嗰種感覺,即使係一套時裝劇,另一套係古裝劇,一樣可以察覺到相同嘅風格,就好似每個人身體上都有一種獨特嘅氣味咁。
如果第一次睇某套劇,令你感覺良好,之後睇第二套,你亦會鍾意追看,甚至你會不知不覺間,漸漸愛上呢種風格,你可以話係先入為主,但感覺呢家嘅嘢,確實係好難去解釋原因,再講,我哋熟識行內人,甚至睇一、兩場戲,就知嗰套劇係出自邊組人嘅作品,咁大家又有無發現自己鍾意邊種風格、又討厭邊陣除呢?而Carol日日返工聞到嗰種令佢厭惡嘅味,除非炒咗嗰位同事,如果唔係就無法幫佢除臭。

王奇雲  (逢周一至五刊載)
電視 風雲 王奇 奇雲 氣味 2013 05 09
PermaLink: https://articles.zkiz.com/?id=282769

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019