兩年前為三千蚊結怨蘇永康轟鄭紹康：佢擘大眼講大話
1 :
GS(14)@2016-09-11 05:46:46■鄭紹康昨日指願有中間人協調與蘇永康（左圖）擺和頭酒。資料圖片
徐濠縈早前的私人Instagram外洩了陳子聰病癒後消瘦相片，掀起一場關公災難，蘇永康指阿徐的經理人鄭紹康為洩密者，更大數對方曾以3,000元侮辱價邀請他出席活動的私怨。阿徐雖證經理人清白，但事件繼續升溫，蘇永康狂插鄭紹康擘大眼講大話，不會接受他擺和頭酒，更自嘲是泥鯭價，緣盡不會與他合作，更已準備大律師侍候。
徐濠縈日前一張放在私人Instagram的陳子聰病癒後消瘦相片被友人外洩，她在公開場合表示要緝兇，之後她的好友蘇永康在活動上力指阿徐經理人、人稱「天下第一關」的鄭紹康疑似偷相者，更提起雙方私怨，指對方曾以3,000元侮辱價邀請他出席活動。阿徐前晚已證鄭紹康清白，在內地公幹的鄭紹康亦急拍片發聲明，而蘇永康其後接受本報電話訪問表示一場誤會，不過依然寸爆獲對方發聲明受寵若驚，並再補充侮辱價一事：「傾唔埋咪少合作囉，只不過我覺得自己唔係呢個價錢，太離譜，欠兩個零咁滯！」
自嘲是泥鯭
鄭紹康昨日在會展出席時裝活動，揚言事件水落石出會向前看，問到他認為蘇永康只值3,000元活動價，他解釋：「個價每日唔同，每次都要睇番性質，件事已經有幾年，如果呢條刺仲放喺佢心度咁耐，我好遺憾。」日後會否找對方出席活動？他說：「呢個世界係緣，緣份個緣。」對於蘇永康表示不用他關照，他表示：「隨緣囉，作為負責嘅公關，要以客為本，黃雨會過去嘅。」並表示願意找中間人協調擺和頭酒外，亦會與律師研究下一步：「係唔開心，係影響咗我嘅誠信問題。」事件繼續升溫，本報昨日致電蘇永康，他繼續反擊鄭紹康言論：「阿徐嗰單水落石出，我道咗歉，佢話move on，鄭生確實做大事嘅人，佢話3,000蚊結怨唔記得幾耐嘅事，係我結婚後佢打畀我太太，兩年幾啫！」對於鄭紹康指活動價格浮動，他說：「佢話出場價次次唔同係海鮮價，我惟有認自己係泥鯭囉，佢啲貴客係龍躉，但泥鯭都有人鍾意食。」提到對方表示將來合作隨緣，蘇永康斷言：「緣份已盡，佢請我都唔嚟，反而第二間冇錢都去，就係佢請我唔去！佢如果唔係打何超瓊工，我講話毒十倍，我尊敬佢（何超瓊）。」
■今次關公災難源自陳子聰（中）病癒後消瘦相外洩開始。資料圖片
■蘇永康指兩年前與太太Anita結婚後，鄭紹康曾致電其太太邀請他出席活動。資料圖片
拒擺和頭酒
蘇永康表示不會和鄭紹康食和頭酒：「唔知邊個得罪邊個，我覺得佢得罪我，有錢不如攞去做善事。佢話同律師傾下一步點做，冇問題，呢單嘢係御用大律師陳惠源先生send畀我，我哋隨時奉陪！香港係法治之地，至於誠信問題，如果佢夠膽承認冇3,000蚊呢件事，擘大眼講大話，你咪搵律師同我傾。」提到有新劇上，蘇永康自問不用博宣傳：「套劇喺無綫播點都有收視，佢都儍儍哋。我要多謝喺fb瘋傳呢件事，90%支持我嘅朋友，特別多謝黃偉文。」黃偉文昨短訊回覆蘇永康的感謝：「那張facebook圖相信是偽造的，來源可疑。我在private account沒有發表過類似言論。其餘不予置評。謝謝。」採訪、攝影：皓騫、羅慧敏
來源:
http://hk.apple.nextmedia.com/entertainment/art/20160911/19767059