ZKIZ Archives


退市?駛乜驚呀! 畢氏財演

1 : GS(14)@2013-09-22 23:32:52

http://hk.finance.yahoo.com/blog ... 1%80-191812891.html

自從伯南克在6月中發表了會考慮在今年開始縮減買價規模後,環球股市便開始了玩這個「估吓幾時退市」的遊戲,個玩法好簡單,只要美國經濟數據向好,就覺得聯儲局好快會退市,影響環球資金流,股市下跌;美國數據偏壞呢,咁就估伯南克唔會咁大膽退市住,繼續印銀紙,股市上升。這遊戲好容易玩,三歲細路仔都會識,但理智嗎?絶不。

投資者好容易混淆縮減買債規模及退市兩者。退市,即係美國聯儲局唔單止會完全停止買債,而且仲要收回之前印過出黎的錢,並可能會開始進入加息周期,在市場抽走大量的資金,股市大跌自然合情合理。但係而家伯南克只係提出縮減買債規模,唔係話完全停止買債,更加完全無提及過會從市場收回之前印出來的銀紙:即係有老闆每個月俾$85你買股票,買了7個月,老闆突然話會喺年底減少俾你買股票嘅錢,可能每個月減到$75或$65,但你依然會有錢買股票,而且老闆唔會亦都未諗過收返之前借左俾你的$595,這$595,你依然可以用黎投資買賣賺錢。

美國減少買債只係減低了美股只升不跌的不合理預期,所以美股要調整係合理的。但是,老闆借左俾你的$595,你依然要揾地方投資,但係美股已經失去長升的預期,資金好自然會流去其他市場,好似香港年初至今大幅落後而估值又偏低的市場。你可能會話,南亞市場最近唔係出現因為美國可能縮買債而走資嗎?原因又為何?畢者認為原因有二:(1) 當地經濟增長差過預期,及(2)當地股市自年初至今已累積一定的升幅。縮減買債規模純粹為獲利的藉口而已。

你仲係擔心美國縮減QE會引發資金流返美國市場?畢者至今仍睇唔到資金有大舉流出香港的跡象,以港匯為例,在6月中伯南克宣佈會退市之後,港匯對美元不單沒有轉弱,更加有輕微轉強的走勢,或顯示某些聰明錢可能已經開始慢慢流入,部署第4季的策略。

總括而言,畢者認為各位基本上可以唔駛估究竟會唔會縮減買債,伯南克都講到明今年內一定會做,而美國經濟數據好明顯又唔會突然轉壞到要聯儲局繼續大規模買債去支撐。今年內縮減買債已成事實,但如上文所述,畢者認為反而會利好中港股市表現,待中國三中全會明確今後經濟發展政策後,相信大落後的恒指有機會再展升浪。
退市 駛乜 乜驚 驚呀 畢氏 氏財 財演
PermaLink: https://articles.zkiz.com/?id=283733

守得雲開見…太陽 畢氏財演

1 : GS(14)@2013-09-22 23:33:28

http://hk.finance.yahoo.com/blog ... 9%BD-015450341.html

太陽能這個概念在大約2010年中至11年頭曾經係市場的寵兒,環保概念,好!高新科技,勁!市場需求有價有市,掂!吸引了大批資金流入太陽能產業,執輸行頭慘過敗家,大量資金流入相關產業,一時間家家上市公司都話擴產,最後就是造成產能過剩的問題。本來單單產能過剩的問題都不致於會大幅推低行業內公司的估值,但再加上歐債危機的問題,令到本身為太陽能行業最大市場的歐洲 (2007 – 2011年佔全球太陽能市場70%以上,2012年市佔率依然有55.2%)減少對太陽能設備的投入,需求大跌 + 產能過剩問題,太陽能設備價錢插水式下跌,行業內公司的股價自然跌到阿媽都唔認得。

及後太陽能設備股衰足一年,到去年年底,才靠「十二五」規劃帶來一點起色,當時目標到2015年,中國的太陽能總裝機容量將達21吉瓦,計返2011年年底的總裝機容量3.3吉瓦,即在「十二五」間每年平均裝約4.5吉瓦,只係佔全球市場的15%左右,刺激作用實在有限,但市場一於少理,有國策就炒完先算。之後由去年年尾到而家,太陽能設備股基本上都係炒政策消息為主,行業內公司的業績大部份可以話無乜點改善過,畢者基本上唔係太鐘意這類只炒政策,而完全無業績表現支持的股票,但上周五發改委公布的新政策或有可能成為太陽能板塊的轉捩點,狼來了咁多次,今次的政策畢者認為終於為太陽能業轉勢的轉捩點,值得留意。

講發改委新政之前,稍為翻一翻帶去到7月中的時候,當時國務院推出了太陽能業的發展意見,把2015年中國太陽能總裝機容量的目標提升至35吉瓦,2013 – 2015年間將每年裝10吉瓦的太陽能項目,這目標較之前的「十二五」規劃進取得多,單單中國的份額已能推動全球太陽能市場增長超過16%,可望解決太陽能業需求疲弱的問題。但係空有目標,無實際政策支持都係無用。上個星期五發改委推出的新政就正正可以支持中國達到目標:發改委推出光伏發電標桿電價及補貼政策,全國將以太陽能資源條件和建設成本分為三類資源區,分別執行每千瓦時0.9元人民幣(下同)、0.95元及1元的電價標準。新政可大大提高太陽能電站的投資回報,吸引資金投入,提高太陽能產品的需求,有助改善行業內企業的經營情況。

由於政策的推動,相信太陽能業能在2014年走出低谷,讀者不妨趁最近行業內公司股價因上半年業績差而回落的機會買入相關的股票。
守得 雲開 太陽 畢氏 氏財 財演
PermaLink: https://articles.zkiz.com/?id=283734

敍利亞在哪裏? 畢氏財演

1 : GS(14)@2013-09-22 23:34:01

http://hk.finance.yahoo.com/blog ... C%9F-003018945.html

畢者並不是想和大家上堂地理課,而是環球股市呢兩日受到「敍利亞涉嫌使用化武,美國及盟友準備進行軍事行動」困擾,可能打仗,避險情緒當然升温啦,股市下跌,油金價格上升,合情合理,敍利亞在哪?唔理,邊個同邊個打?唔知,大家都係快些拋售手上股票,現金為王為妙!但,事情真的如此嚴重嗎?

敍利亞其實為一中東國家,位置大概位於土耳其及伊拉克中間,受到阿拉伯之春的影響,國內近兩年半內亂不斷,日前在首都大馬士革發生針對反對派的化武攻擊,觸動美國及其盟友的神經,決定對敍利亞採取軍事行動。雖然貌似嚴重,但畢者相信美國不會貿然出兵,充其量只會發動空襲。首先,經歷阿富汗及伊拉克兩場戰爭後,美國國民反戰情緒依然濃厚,啱啱奧巴馬先從伊拉克撤軍而贏盡掌聲,斷估佢唔會轉個頭又出兵中東啩?而且再次打仗定必會大幅推高國防財政開支,推高美國財政赤字,拖垮經濟。

雖然敍利亞只係石油小國,其內亂基本上對石油供應無甚影響,但美國若採取大型軍事行動,將使中東局勢持續不穩,影響地區石油產量,大幅推高油價,這將嚴重阻礙美國的經濟復甦。不單如此,油價上升亦會推高通漲,最壞的情況甚至會出現滯漲(即經濟增長停滯,失業及通漲同時高企的情況)這難以根治的問題,屆時美國既不能通過量化寬鬆等措施刺激經濟,又不能加息以解決通漲問題,將對美國的經濟作出沉重的打擊。

最現實的一個原因,攻打敍利亞根本無利可圖。攻打阿富汗,可以話為911復仇,清除恐怖份子,名正言順。打伊拉克,老屈對方有大殺傷力武器,實則為其龐大的石油蕰藏,名不正,但有利可圖,照打。但係今次,雖然敍利亞動用化武的證據都幾明顯,但推翻當地政權基本上無利可圖,相信奧巴馬政府斷不會作出勞民傷財之舉。

基於上述幾點,估計今次危機應該唔會再度升級,今次市場反應咁大,無他,純粹揾個藉口借勢調整。大家都應該記得年頭北韓金正恩都話會發射核武啦,個個投資者都有得震無得瞓,到最後結果又點?
利亞 亞在 在哪 哪裏 畢氏 氏財 財演
PermaLink: https://articles.zkiz.com/?id=283735

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019