ZKIZ Archives


阿爺做庄谷A股H股接力炒上

2014-12-11  NM

 

由六千點跌到二千點,「A股」,曾經是股市黑洞的代名詞,散戶噩夢。但近日,卻成為全球矚目的淘金地。上月中,滬港通無藥效,阿爺為吸水救經濟來一招突然減息,令A股如同吃了興奮劑,兩星期累升超過兩成,突破三千點關口。上週五,交易量衝破一萬億元人民幣,竟創下世界紀錄。隸屬國務院的研究機構社科院,更指A股明年可升上五千點,擺明出口術為股市造勢。身為大庄家的阿爺硬谷A股,令H股出現嚴重折讓;一河之隔的香港股民已磨拳擦掌。本刊請來股市專家,為投資者拆局揀股,乘着「國策市」炒「瘋」,搭一程順風車。

上週五,A股創下萬億成交額後,將新一輪炒股瘋潮推至高峰。本週一,深圳各大證券行,繼續逼滿前來開新戶口或孖展戶口的散戶。早上十時,位於福田的國信證券五十個座位已經坐滿,大家攞籌等開戶,猶如輪街症。當中有經驗老到的大媽、大叔,亦有二十歲出頭﹑首次入市的九十後。記者十一時拿籌,已要排到下午三時。有人等得睏了,坐着便睡。有人在與職員打乒乓球,甚有強國味。

民間股神唱好六千點

國信職員李先生表示:「今早八時半已有人來排隊,這幾個星期多了四成人來開新戶口,很多大媽特意請假來排隊買股票。」電腦前,散戶王女士指着熒光幕自信地說:「買航空股沒有錯,就快過年很多人會坐飛機的!指數突破四千點是沒問題的。」講來頭頭是道,豈知她接着說:「我在六千點時也買過,輸了很多,唉,這幾個禮拜算是贏回一點!」另一散戶阿東透露:「上星期買的廣發證券,現在已經賺了一﹑兩萬,不錯不錯!」有內地「民間股神」之稱的林園,號稱炒股勁賺十多億元人民幣。一向鍾情茅台、五糧液等消費股的他,指即使股市低潮時,亦沒有賣股,現正「印印腳」等收成。「我的股票還沒怎麼升值,因為市場炒的主要是金融、石油股。但現在才是牛市的起點,明年可以升上六千點﹗散戶才剛入市。」他指金融股還可以再升一倍,又推介散戶買A股指數基金,「牛市開始時,指數通常升得比較快。」內地由散戶到大戶,都一致看好。相對之下,香港投資者就冷靜得多。中央減息至今,恒指僅升不到百分之三,明顯落後A股。上週一,記者去到中環一間證券行,發覺散戶及經紀暫時都未有因A股暢旺而雀躍。

減息谷起A股

是次A股「瘋潮」,始於十一月二十一日。當日A股的成交額仍只是三千七百億元人民幣(下同),但人民銀行在當日收市後突然宣布減息,二十四日開市後,A股即開始發力飇升。上週五,A股成交額突破一萬億元,首次創下全球單一國家單日成交金額最大紀錄。全民熱炒,即使本週一公布的內地上月份進出口數據令市場失望,但大市一於少理,滬指同日突破三千點關口,創超過三年半高位,比年初二千零九點的低位,升幅逾五成。 有深圳國有證券行老總透露,上星期,公司的孖展額度已被「借爆」:「有個客人拿着一億五千萬本金,想要再借兩億,我說,沒那麼多錢呀!」今次升市,金融、石油股成為追捧目標,中人壽A股這個月便升了五成,民生銀行亦升三成八。另外,上週四及週五,分別有十七隻及十八隻券商股漲停板,中石油亦連續兩日漲停。至本週一,炒風開始蔓延至其他板塊,航空股、機械股及鐵路股亦有股票漲停。A股如脫韁野馬,港股亦追落後,英皇證券(717)於本週一再抽升近一倍。另外,平安保險(2318)過去兩星期,亦累升兩成。

阿爺發功托市

A股升幅既猛且急,背後最大的推手,並非市場力量,而是阿爺。九月初,作為中央喉舌的新華社,三天內連發八篇文章挺A股。十一月,被指「南水北調」的滬港通正式出爐。當時,市場反應仍未太大。終於,中央使出減息的撒手鐧,令A股成功「撻着」。之後,官方機構仍繼續「火上加油」。「滬港通開通時,大家並不是特別看好,後來人行突然減息,股市熱起來後,上交所馬上放風,說準備實行T+0(即股票可即日買賣交收,可炒即日鮮),然後又有消息說理財產品可以進入股市。」深圳證券行老總指,是次升市,明顯有「政府的意志在裡面」。事實上,上週四,內地《證券時報》引述社科院研究員尹中立,指社科院的金融「藍皮書」,預計明年A股可升到四千至五千點。中國社科院是隸屬國務院的研究機構,中央「托市」之心顯而易見。近排A股太熱,但《人民日報》指此輪升勢只是「新常態」,隻字不提風險。

引水救內企

中央心急托市,明顯想藉股市救起漸見疲弱的經濟。「目前的情況是,實體經濟不行,房地產走下坡,消費也在跌,所以只能把股市烘熱,讓那些中產﹑富裕戶,把錢拿出來。」深圳證券行老總表示。現任社科院金融研究所研究員易憲容解釋,中央認為升市可以製造經濟繁榮的表象,更重要的是可以令內地企業更易融資,「只要股市持續有泡沫,就能吸引人進去,然後有利企業融資,融資成本也隨之降低。」易憲容表示。對比多個融資途徑,若借銀行,現時內地一年期貸款利率要五釐六。至於發債,部分質素較差的企業債,息率可達六、七釐。上市配股可算是成本較低的吸水途徑。其中最渴財的,要算是近年備受地方債及企業債高企問題困擾的內銀。中國銀監會上月公布的商業銀行不良貸款比率,為1.16%,創四年新高。銀監會要求內銀的核心一級資本充足率,要達百分之八點五,一級資本充足率不能低於百分之九點五。但以農行為例,第三季的核心一級資本充足率只能險守標準,而一級資本充足率就不達標,要向股東伸手籌錢。其他銀行由於壞賬高企,一樣自身難保。不過,銀行要發行新股集資,根據內地法規,其市賬率必須高於一倍(市賬率即每股市價除以每股資產淨值,倍數愈高即股價愈貴,含有水分)。今年頭中國銀行及交通銀行等,市賬率只是0.63及0.7,經過近月金融股一輪急升,PB已大過或貼近一倍,隨時可再融資。這次中央托起股市,是繼過去將內銀壞賬打包為「資產管理產品」才上市後,再為內銀打通了集資新路。

次級國企謀上市

重新激活股市的融資功能,還有另一後着,就是為第二波國企上市鋪路。一直以來,整頓國企及市場化都是內地經濟的大方向。○八年金融海嘯後,國企上市之路一度受阻,再加上時任總理溫家寶,推出「四萬億」救市措施,令不少建築、內房、醫藥等國企,乘機濫借貸、濫建設、濫生產,結果負債高,卻收不回資金,須待改革重組,最好的方法,就是上市。內地鋪路二○一五年是「深化改革年」,相信第二波大型國企上市會再開鑼。本週二A股一度急挫逾6%,拖累恒指急插六百點,A、H股表現近年已「掛鈎」。不過市場中人普遍認為只是調整,A股在二千點已見底。易憲容更形容:「你不要因為它漲了一點點就大驚小怪,你想想看,美國股市從六千點漲到一萬七千點,沒人大驚小怪過。中國股市短期內升千多點,有什麼好奇怪?」香港投資者不想「隔岸觀火」,就要先聽吓專家教路。

國策市揀咩股?

林本利:梗係買H股ETF前理工大學會計及金融學院副教授林本利,並非紙上談兵,據說其自設的「實戰投資組合」,平均每年回報兩成,跑贏不少基金經理。今年九月初,他在本刊推介南方A股50(2822),至今已累升近三成。A股急升,但今次林本利卻改而推介恒生H股ETF(2828)。「依家先來問我A股ETF買唔買得?你冇睇我九月篇文咩?依家A股升咗咁多,梗係唔再追A股嘅ETF啦。識買,依家梗係買恒生H股ETF。」林本利解釋,不少H股股價落後於A股很多,有機會升起來追落後。「點樣玩?總之A股升就買H股ETF,H股升就買A股ETF,兩者間有大概百分之五嘅差價,就可以買入o架啦。」

龐寶林:玩軍工A股東驥基金管理創辦人兼董事總經理龐寶林,在發生雨傘運動後的首個交易日,大市一度急跌近六百點時,透過旗下基金買入銀河證券(6881),他笑指:「人哋驚時我就買,搏滬港通通車後,銀河業務能受惠。」之後他再陸續增持,現時,以入貨平均價計,賬面已累賺約五成。對於A股前景,他甚為樂觀:「A股依家進入牛市,佢都落後咗好多年,就算六千點都唔係頂。依家內地人嘅財富,比○七年多好多,估計上證可以升到八千至一萬點。」近來資金集中炒作A股的金融股,他的心水卻是軍工股,「軍工行業受惠國策,仲冇咩人炒,港股中又冇真正嘅軍工股,所以我會買哈飛股份(600038)。一來軍工A股同外圍經濟無關,可以分散組合嘅風險,二來未有人炒,可以買定等資金買入。」

孫柏文:一注獨買中移動愛「孤注一擲」的股評人孫柏文,間中交出好成績。九月中,他曾推薦殼股金寶通(320),一個月後,該股累積升幅近五成半。曾炒AH細價股折讓的他,是次選擇可曲線受惠的中移動(941)。「今次A股升,好多內銀內險都大升,但佢哋都千瘡百孔,俾着我就唔買,反而會買中移動。」孫柏文指,當年數碼通(315)成為香港首間推出手機3G上網嘅公司,股價由三元多升到十八元。而中移動是國內首家有手機4G上網的供應商,相信可成為數碼通嘅翻版。「中移動無喺A股上市,當A股投資者炒得咁上下,就會經滬港通來買內地冇嘅中移動,到時升到一百六十元都得呀!」

梁杰文:資源股靠差價復活宏高證券投資經紀梁杰文,是天才會「Mensa」的會員,智商超過一百四十七,有「天才經紀」之稱。今年九月,他在本刊推介太平地氈(146),當日股價約一元八毫,至今已累升了近三成三,眼光甚準。要搭A股順風車,梁杰文的目標是一眾大折讓的資源股。「依家多咗H股對A股有折讓,所以H股可以追落後,基本因素反而係次要。我揀股有三個條件,就係折讓大、成交大及市值大。折讓大,即係H股要比A股折讓超過百分之五十;成交大,即係每日平均成交額要超過二千萬港元;市值大,通常藍籌都會符合呢個條件。」梁杰文指睇好中石油(857)、中鋁(2600)及紫金礦業(2899)。「最睇好中石油,A股股價貴過H股五成六,投資者唔會笨到長期持有貴價A股,而唔揀大折讓嘅H股。只要有少少A股股東,換馬到H股,就好容易推升到股價。」

阿爺 做莊 莊谷 接力 炒上
PermaLink: https://articles.zkiz.com/?id=123170

新常態 Money Cafe

來源: http://moneycafe-icable.blogspot.hk/2014/12/blog-post_13.html

有留意中央經濟工作會議,焦點已經不再是放在GDP 目標幾多、又或者財政貨幣政策有咩變化,而係「新常態」地位,被推高至黨中央共識,再次突顯習近平進一鞏固大權!

過去一星期,中環不斷流傳李克強被架空消息,由今次中央經濟工作會議都睇到,雖然李克強仍然有分參與,並對明年重點工作作部署,但明顯「克強經濟學」,已經唔再係「新常態」佔有任何官方地位! 完全由新常態主導。

一星期前拆局講過,「習隊長」權力集於一身,不論政治、軍事、以至經濟地位,都成為鄧小平以來,權力最集中既人物,勉強要做「阿二」,亦只有落得大權傍落。

新常態首次出現、係喺今年5月APEC會議上由習近平提出,跟據官方講法、經濟工作會議後,"新常態"已正式成為黨中央共識,並成為未來一段時期經濟發展的重大邏輯。

但對於新常態,莫講話外界認識唔多、就算官方內部,能夠掌握都係少數! 好似一句告別「模仿型排浪式」消費,就考起唔少官方人士,結果要專登搵社科院專家解讀,其實就係指一窩蜂既消費模式,例如汽車爆發式消費或家電下鄉,都歸類為呢種!

不過習近平可能唔記得左,所謂汽車或家電下鄉,都係由政府政策推動,商家同消費者先跟風參與,「起浪者」、其實就係政府本身!

當然,個性化消費、綠色消費又或者悠閒式消費,都係新經濟下重要元素。而配合新常態,經濟模式都要「換檔」,由高速變成中高速,更重要係、新既GDP目標,由過去既「約束性」指標,變成一個只係「預期性」目標,換言之,可高也可低!

瑞信陶冬博士就對新常態感到異常興奮,形客係中央首次明確表述左新常態既具態內容,重要性甚至高到、會成為明年第十三個「五年計劃」既基礎!

反而在內地走慣江湖既平安證券,標題就用「老調重彈新常態」,指出新意欠奉,並大潑冷水,提出明年推行的各種改革、並不可能達到市場預期既程度!

值得留意係、在新常態下,炒板塊規則固然有變,過去玩「家電下鄉」「汽車下鄉」固然炒唔起,反而在新常態下,2015年將是改革落實年,過去兩年提出左既央企、國企改革,以至資本市場、民營銀行準入,都會加快,識得炒既你,好應該知道點樣部署!
常態 Money Cafe
PermaLink: https://articles.zkiz.com/?id=123275

雙十二 Money Cafe

來源: http://moneycafe-icable.blogspot.hk/2014/12/blog-post_11.html

百麗星期三公布既同店銷售,再次為內地零售銷售商響起警號!

瑞銀既「史賓沙.梁」在眾多分析員中特別細心,留意到百麗業績係受淘寶「雙十一」打擊,加上消費者已經認識到百麗定價過分進取,肯定未來同店銷售趨勢,只會拾級而下!

可怕既係、雙十一效應未完結,馬雲淘寶已經擺下「雙十二」戰書,又靠「全民瘋搶」打折半價做賣點,會唔會又掀起另一輪熱潮?

眾所周知,雙十一係專為天貓商家而設,到雙十二就係為淘寶集市商家谷銷售。不過今年居然遇到極尷尬局面,內地媒體形容「雙十二」已變成雞肋,不論商家以及消費者熱情都大幅冷卻,甚至興起「正反兩方」辯論,係咪應該取消「雙十二」!

的而且確,雙十一驕人既571億天量成交,有幾乎一半人話,係提早催谷消費者購物,加上有商家話要打折五成至七成,其實血本無歸,所以令雙十二急速「遇冷」。

跟據百度最新投票,有八成一既投票,都贊成「雙十二」早應取消,認為仍有亮點既,不足兩成。

有買家更喺微博埋怨,話平日買淘寶貨、兩日就送到,相反在雙十一,要兩星期先到貨,反正折扣唔多,就叫馬雲不如取消「雙十二」!

商家方面,雖然好似做多一倍生意,但有分析提出,真正贏家,唔係阿里巴巴同屬下商家、反而係對手騰訊既合作夥伴京東商城先真!

里昂在雙十一後,進行左一次大規模調查,指雙十一當日,天貓同淘寶的確分佔左49%及25%生意額,京東就以17%排第三,不過作為商家,由於強制要提供更高折扣,令佢地變得無利可圖!

令人意外係、調查發現買家原來對減價、其實興趣唔係大。據統計,平均貨品真正減價幅度只有20%,而且當中因為減價而選擇京東更低至16%,反而大部分京東用戶,更對快速送貨表示讚賞,有41%買家話三日已經收貨,相反天貓淘寶就大部分要一星期先收到貨!

過去一年備受疚病既退貨問題,京東亦遠勝,退貨率只有一成,反而天貓同淘寶就有三成買家話最終要選擇退貨!

更有趣係雙十二前夕,工商總局居然打馬雲嘴巴:話天貓有賣假貨!認真唔比面!

回想當日,阿里巴巴在杭州總部搞幾場大龍鳳、由陸兆禧、蔡崇信到馬雲輪流登場,市場亦以為阿里巴巴「完勝」京東,但無論由送貨速度到購物經驗,京東先係真正贏家。如果反映股價身上,顯然阿里巴巴而家就係Overprice,相反京東同騰訊仲諗得過!

雙十 Money Cafe
PermaLink: https://articles.zkiz.com/?id=123276

不死券商 Money Cafe

來源: http://moneycafe-icable.blogspot.hk/2014/12/blog-post_10.html


經歷過黑色星期二大跌市,內地股民星期三要做部署、知唔知第一件事會做咩?

考我唔到既、有上海股民就由面至底、再由底至面睇一次人民日報,睇下有無官方「風險提示」,結果發現無一篇文提到股市過熱。轉個睇到中國證券報,見到頭版頭條標題:「牛市撞腰不足懼」,簡直如獲至寶,可以重新放膽入市。

內地股民深切理解、作為政策風向標,社論先係股市最好明燈! 瑞信陳昌華都同意,可以同今輪牛市比較既99年至2000年A股升市,正正就係由99年5月一篇人民日報社論觸發、而家只係只係重複當年既Story!

要量度風向標,鬼子佬就唔識睇社論,里昂就用券商股、作為A股有幾熾熱既測溫計!

6837 海通證券,2012年上市以來,累積升左九成,夠熱啦! 不過要留意,當中有一半升幅係喺過去一個月出現!

當然上市以來,海通基本因素不斷改善,無論ROE、資產負債表,更重要係喺「發行人」排名榜、由去年第六位,跳升至第三位,成績表夠曬亮麗!

不過同步上升既、仲有係海通既P Book! 市帳率由九月底1.4倍樓下、已經去到2.6倍,貴盡全行,要支持股價,ROE要由8%先合理,而唔係而家只有1%咁大把!!

海通向分析員講述收購既聖靈銀行,係部署海外發展三步曲、包括先在港設立分支、先後於09年收購大福,而今次買聖靈就係最後一步,但分析員都係唔了解、到底券商同銀行、有咩協同效應?

無錯,聖靈由07至13年ROE 都有近10%,只係上半年要應付減值,所以先急跌。但未來要合併,附帶既成本急升,就更難估計、呢點,里昂一定唔會講,因為正正發生喺中信收購里昂時出現左!

無論如何,里昂結論係、即要面對集資壓力,未來ROE又可能下降,有貨既、無理由唔走啩?

不過好似FT講,內地禁賭,但股民同賭民其實無分別! 特別過去幾日A股成交屢創全球新高,較之前急漲6倍。唔使多、如果出年平均有6000億一日,花旗計過海通同中信證券就值得升多1.3倍!!

更不可忽視係內地既「動物精神」!又或者調轉用雷軍講法,站在風口位、一隻豬都可以飛起上來!
不死 券商 Money Cafe
PermaLink: https://articles.zkiz.com/?id=123277

城投債 Money Cafe

來源: http://moneycafe-icable.blogspot.hk/2014/12/blog-post_97.html



要來既終於要來,想避既始終亦避唔開!

我地唔係講佛語,而係講等左好耐既A股大跌市。高槓桿帶來既大牛市,唔講都知,係一把雙面劍,牛市當然成為帶領大市上升動力、但市場一旦轉向,風險亦都倍大!!

「上午數錢、下午抹淚」,相信對好多內地股民今日寫照。而特別對八、九十既新一代,都無經歷過券商斬倉日子,眼見明明上午升左既銀行、券商、內險股,都仲想緊咩位可以獲利時,下午已經被大手斬倉,血本無歸!

當然今日大市逆轉,市場消息眾說紛雲,有傳因監管層出手,或者係券商進一步收緊孖展,以至中證登收緊城投債風險、扯高市場利率。

以上講既可能通通都係理由,不過一個上市公司通告,亦可能帶出玄機。A股掛牌既山西證券、在深交所發表通告,表示收到控股股東山西國信投資通知、要減持山西證券四千萬股,涉及六億幾資金。

講真,面對證券股近日急升,大股東趁高套現無可厚非,不過內地媒體就解讀成資金逃出券商板塊,殺傷力就變成非同少可!

諷刺既係瑞銀,朝早出報告先話非理性可以持續一段時間,仲叫散戶多搭一轉順風車,點知轉頭已經比網民鬧爆!

共出一徹仲有人民日報,今日社論先用「未上漲、就喊過熱」,形容目前A股未需主動調控,結果又成為「明燈」!

當然、由中證登引發既債市「黑天鵝」,的確對投資氣氛有心理影響。城投債問題,坦白講、過去半年除左美林既崔魏,大家都好似唔記得左,但今次由中證登出手,就令市場風險意識提高,將一眾高風險債券、人民幣、以至股票拋售,引發震倉潮。

債市震倉係咪不利股市?市場利率抽升,強如國開行都要暫停七年期發債,國家電網亦推遲原定明年推介100億人民幣發債計劃。

更多憂慮係流動性問題!其實國家財政部早已經定出死線,就係明年一月前,地方政府要交待地方債問題,不過今次中證登提早出手,只接納有AAA級企業債,仍然是令市場意外!

大家有所不知,內地比既所謂AA級別,喺穆迪同標普既評級系統中,已經係非投資級別,即是大家平時講既垃圾債券! 有內地券商估計,多達4700億企業債,會幾乎變成「廢紙」,引發連鎖效應當然非同少可。

想當年,首個地方融資平臺,正係由國家開發銀行創造,多年來雖然為地方加快GDP增長,但風險同樣被倍大、變成內地經濟最大計時炸彈。瑞信陳昌華今日正好有分報告,為多年來政策性銀行功過定論,結論係近年將國家開發銀行商業化之路、已證明係失敗之舉,未來可以預期、在改革先行既思路,政策性銀行回歸、似乎係必走之路!
城投 投債 Money Cafe
PermaLink: https://articles.zkiz.com/?id=123278

萬達 Money Cafe

來源: http://moneycafe-icable.blogspot.hk/2014/12/blog-post_9.html


盡管A股火熱既股民熱情一啲都無冷卻,但萬達商業來港上市,就面對一再挫折。

由最初傳出100億美元,之後收窄到60億,而家再縮水到39億,不過都未知係咪最終數!

如果搞到好似隻豬肉股萬洲咁,要上唔上最後夾硬上,恐怕最終收場都會差唔多。

萬達上市臨門前,再改動招股書,好多基金都話唔係太鍾意。降低集資額事少,其實都早有預期,反而勉強谷大盈利,就令人唔多舒服!

今年整體預測盈利提左21%,達到240億,預測市盈利5.5至6.6倍,表明睇好吸引!

當然魔鬼在細節,240億盈利中,有97億係公允值收益,比原來多左45%,即係玩帳面數! 如果睇實際盈利,只係上調左8%左右,基本市盈率介乎9.2至11倍,已經唔算吸引!

講真、主席王健林其實為今次上市已經做足功課,親自為IPO打氣做訪問,同步上市仲有內地萬達影院,更爆出有意收購製作電影「饑餓遊戲」既Lions Gate, 最新搞作、連養豬都搞埋,在貴州開設養豬場,投資總額10億人仔!

都係個句,鍾意既就認為係一個多元化既金融「鐵達尼」、唔鍾意就會好似FT 形容既「結合兩大洲既投資垃圾袋」!

值得留意係萬達自己標榜既一個賣點,就係遍布全國110個城市、總共有159座既「萬達廣場」,呢個亦都係萬達品牌,點解喺內地有咁多人認識!

有內地分析師同意,呢種遍布全國性既商業組合,其實係內地好罕見,原因一般內房、即使好似央企中海外甚至潤地,都唔容易做到,因為地方政府好多時都有人為阻力。

所以市場反而對呢種獨特經營模式,唔知點估值!

有接近交易既消息透露,由於基金對估值有保留,喺競價投標制度下,基金比萬達最合理估值,可能只有30-40億美金,以下限計,只係得番230幾億,會輸埋比中廣核!!

其實到最後要輸既,可能仲有388。雖然有左中廣核加埋萬達,令到港交所全年IPO可以由舊年第四扒番上第二,僅次於有阿里巴巴已紐交所,但上市公司質素參差,上市無耐盈警又有、爆煲要證監出手賠番錢比股民都有兩隻,試問市場質素點維持?

統計數據顯示,舊年同今年有玩新股既股民,平均兩年分別有77%及75%要損手離場,反映公司質素其實愈來愈差,香江股市就好似變左提款機!

萬達 Money Cafe
PermaLink: https://articles.zkiz.com/?id=123279

見頂訊號 Money Cafe

來源: http://moneycafe-icable.blogspot.hk/2014/12/blog-post_5.html


話說內地微博討論股市,網民傾得最多係兩個見頂訊號:一、央視新聞主播講股市;二、兩桶油連日漲停、都係股最後一戰之時!!

年紀輕既股民可能無咩印象,07年時,大市見頂,上證突破6000點,當時正正係兩桶油破頂之時,之後既故仔,恐怕就不用多提!

經歷兩個幾星期急升,今早散戶都經歷左一轉疑似「過山車」,十點指數升近3%,以為三千點「垂手可得」,點知半小時內,大盤突然全線回套,倒跌過百分之三,散戶形容就好似「人踐人」,爭相要沽貨、遍地哀鴻~!

原因正係十點過後,傳中證監出手要求證券行上調「融資保證金」,由於市場早有預期當局唔會對大市過分槓桿不聞不問,消息一傳出,股市即時崩盤!

但內地股民既生命力,又點會咁快完結? 當十點半過後澄清並非監管機構要求,只係個別證券行控制風險,股民又再鼓其餘勇,再戰江湖,結果造就全日過萬億成交,再次改寫「人類歷史紀錄」! 平均每0.74秒,就有一億成交!

面對瘋牛、但唔係個個有錢賺,內地股民不斷發揮創造力:「人世間有一種悲哀,叫做漲停跑輸」、「滿倉踏空怎辦?滯漲股都係會飛既豬,就耐心等候吧!」「空方不死、多方不止」....

更多人創造出新名詞,好似有人「高位建倉」、但「滿倉踏空」,就改名為剛去世既日本名星「高倉健」,真係佩服內地網民創意!

散戶有面對大牛市不賺錢既煩惱,大戶何嘗唔係一樣? 就連國家隊,面對呢個突如其來牛市,都顯得促手無策,要連夜緊急開會應對!

以保險資金為例,掌握著數以萬億計資金,但此刻只可以話心情複雜:大戶正係今次大牛市中、最大「踏空者」!

由於規模大、轉身難,又近年結,保險資金近期都無主動加倉,唔少之前引以為榮既「低倉位」策略,而家變成大牛市之中,最失策之舉,分分鐘仲要跑輸過大媽!

以保險公司目前持倉比重,大約只有11%左右,同十月比較、只係增加一個百分點,顯然保險公司未有趁市況改變而調整策略、所以主流險資,今次都係「踏空」居多。

如果咁樣講,咁平保、國壽、新華過去一個月累升左15至24%,豈不是市場過分放大?

又未必,因為保險資金一向都係內銀最大股東,第三季就持有超過四百億股既內銀,以今輪升勢集中金融股,就算唔加倉,加埋都可以有過百億帳面盈利!

講真、連阿爺都透過社科院,為牛市撥火,無論散戶大戶都只有順勢而行,好似日前話股市會倍翻既大摩、又吹「摩笛」,用最「藍天」分析,為自己估市提供基礎,居然可以作出上證萬六點預測,中環人除左搖頭嘆息,仲可以講咩?

不過講到底,就算一隻會飛既豬有幾巴弊,到最後都係一隻豬,當風不再吹時,咪一樣要由飛豬變成豬扒。
見頂 訊號 Money Cafe
PermaLink: https://articles.zkiz.com/?id=123280

習隊長 Money Cafe

來源: http://moneycafe-icable.blogspot.hk/2014/12/blog-post_4.html

奧巴馬近年對中美關係,可以話若即若離、時好時壞,但琴晚佢對國家主席習近平既一番評論,就被外交界認為對中國新一屆認領人,反映出相當深厚認識。

奧巴馬觀察係、在過去幾十年裹面,無一個領導人可以好似習近平咁快,在兩年就完全鞏固權力,成為鄧小平以來,權力最集中既一個領導人。

拆局早喺去年底做2014年預測時,已提出「習主席權力進一步增加,甚至架空總理、政治局、正正反映、改革的力度可能是遠超想像。」

結果一年下來,習大大對證券市場改革、金融改革、國企改革、以至政治體制改革,大刀闊斧力度,一年前又點能夠想像?

半邊染紅既里昂證券,發表2015前景,正正就係習大大做封面、以一身中國隊長打扮,未睇內容已經先吸引眼球!

報告主題正是「Reform Power」,形容國家改革力度不斷加強,明年經濟增長目標肯定會放慢,以落實推行更多改革,包括更多針對金融市場、央企以至地方政府改革措施會出臺,相信股市會繼續呈現V型反彈! 恒指目標26500,已經算係大行中較牛。

為下星期中央經濟工作會議定調,新華社發稿,7%已成為多數經濟師共識,更稱下定決心既中央政府、不會糾結於GDP「小數點既變化」!! 果真是豪言壯語。

其實啟動今次A股「超牛」升市,正正係人行突然出手減息,據里昂了解,其實都係國務院迫人行屈服,甚至要向外表明,人行唔似聯儲局、並非獨立機構,簡言之就係為阿爺出力。

有明眼人睇出,今次減息、唔單單係要救經濟,更重要是重新激活資本市場,令明年推行既央企改革、以至金融市場改革,可以有更大本錢,所以「5000點」不是夢,恐怕好快會夢境成真!

因此要炒國策、的確就要認真領導人思維,例子之一是當李飛星期三提出澳門唔可以「博彩業獨大」時候,有操盤手已提醒,背後另有玄機!

當然背後同習近平過去兩年打貪思路完全一脈相承。上任兩年以來,下馬貪官已有數千人,如果繼續容許黑錢流入澳門,又點可以立威? 「清洗大平地」其實早有部署,博彩股今年以來走曬樣,亦非朝夕之間既事。

隊長 Money Cafe
PermaLink: https://articles.zkiz.com/?id=123281

滿倉踏空 Money Cafe

來源: http://moneycafe-icable.blogspot.hk/2014/12/blog-post_3.html


內地股民最新流行名詞「滿倉踏空」,看似矛盾,但就成為股民最新寫照。

都已經摣到成手倉,內地遇正大牛市,點會賺唔到錢?原因正係近日「小盤唔得大盤得」,內地股民買買埋埋都係中小股,但呢幾日資金流入、都係券商、銀行、保險、地產等大型板塊,其他板塊分流甚少,結果只有眼光光睇著大市升。

有咩方法可以突破「滿倉沽空」,簡單,靠融資、即係我地講孖展。有老股民話、再唔追加融資買銀行股,就會被大市拋棄。

過去幾年,內地散戶慣左「抓少放大」,追入都係增長股或創業板,但面對呢一輪大盤急升,好多都已經把持唔著,要加倉殺入金融板塊。

有內地證券行已觀察到,11月下旬,營業部大戶既保證金賬戶,增加得非常明顯,原來只有幾百萬資金既、突然變成過千萬,而呢啲客戶多數來自鋼貿批發、家具外貿等企業,唔少近日更將流動資金全數搬到去股票帳戶,全職專心炒股票。

就連外資行大摩都大吹「摩笛」,估內地可能出「Ultra Bull」局面,中文翻譯姑且稱為「超級牛」!!

有幾超級?大摩認定,未來A股18個月內,可以大漲一倍,死未?

大摩亞洲及新興市場策略主管指,由新開戶人數表明,投資者正大力參與建倉,認為高成交量應該得到重視。

但要認清高成交背後、所謂「資金市」來源,其實正正就係開頭講既高槓桿,相反、外資反而係撤走多過沖入A股。

所以不得不佩服美林崔魏,單人匹馬向中國1億股民挑機!

作為全港最佳策略師、崔魏發表既「大勢」報告,簡簡單單一頁紙,但中環人形容殺傷力巨大,更甚係解開點解A股猛升、但港股甚至H股不跟之謎。簡單講、就係「唔跟風」!

崔魏「一士諤諤」,認為A股成交屢創新高,但背後只是缺乏基本因素下的市場過渡亢奮,原因簡單,就係睇唔到盈利有改善、以及過分桿桿進一步惡化。

當然,崔魏「熊市反彈」說法,的確有討論空間,但佢老兄一向睇重內地違約風險因素,而由今日A股表現先高後低、後市既風險,似乎真係不宜低估。

中環操盤手對近日A股提出陰謀論,就係外資似乎唔多領情「滬港股」,流入A股資金遠少過預期,中資基金要Front Run 外資,唯一方法當然係製造利好消息,好似先焗人行減息,之後透過融資谷大成交量,就係怕你外資唔敢再唔入市。

中外角力,作為小戶都係跟下風算,更重要係、A股大戶已落指令,無論未來兩星期股市好定醜、到20號就一律要沽貨離場,大家識計日子嘞!
滿倉 踏空 Money Cafe
PermaLink: https://articles.zkiz.com/?id=123282

走資ETF Money Cafe

來源: http://moneycafe-icable.blogspot.hk/2014/12/etf.html


黑色星期一大跌市,事後回想,當然理由多多,不過里昂一口斷定:佔中、走資、油價、Risk Off,全部唔係理由!!

里昂而家染紅,莫非真有內線?按佢地推斷,大跌市背後,言之成理只有PMI同百城樓價指數疲弱!

如果由星期二反彈市來睇,里昂又的確估中:數據愈弱、愈反映阿爺需要加快出手救市,君不見今日內地媒體高唱入雲-- 央媽要減息降準救市,唔睇清楚,幾乎以為人行已經做左野!

當然,內地要救市,等到政策落實出臺已經係低招,製造政策預測,先可以快人一步。內地媒體由「放風」減息、批萬億方案、以至國企改革「1+N」形式,好似已經包含曬成個中央經濟工作會議既所有議題!

連串消息下,內地股市再註入強心劑,股民在微博直言:「係咪已經開通左全球股市通?」、又或者「今晚就降準?」

逆向思維一向都係內地散戶最擅長,下星期阿爺就召開年度經濟工作會議,正係最好建倉好時機。

有中環人話,講升幅、港股大指數固然唔使睇、就算國企指數今日表現,都遠不及2822同2823咁亮麗,跑贏大市之餘,甚至比A股大指數仲要好。

但值得留意是、2822同2823沽空金額都創左新高,至於A股ETF溢價,由八月中以來,都係負數,即使今日急升,都無改變呢個情況。

其實有滬港通以來,A股ETF表現已大不如前,過去兩星期,流出2822既資金,達到8.5億美元,相當於66億港紙,創2012年南方A50成立以來新高。

即使「老牌」既安碩A50,過去一星期亦流出近6億美元資金,創09年以來最大紀錄。到底點解釋呢個A股升、但A股ETF贖回增加現象?

德意誌有個講法:投資者,特別係來自香港,在滬港通開通前夕,早已睇到係利好A股多於H股,於是透過Pair Trade,買A股ETF、沽空H股ETF,取得5至10%回報。

唔好睇少呢個幅度,以今年對沖基金平均回報只有2%,已經算相當理想。

於是到開通日子,投資者就開始由A股ETF獲利回套,引發大規模流出,令到2822同2823都有折讓,表現反而唔及在美國上市ETF,仍然有超過1%溢價。

坦白講,有滬股通之後,肯做功課既投資者,都已經離棄A股ETF,寧願直沖入去買180 同380既 A股,唔需要再被動跟隨ETF。所以睇今日滬股通額度,都加快用左32億人民幣,係一個星期以來最多!

果然,有得揀,先係老板。無論政治定股市、一樣啱! 
走資 ETF Money Cafe
PermaLink: https://articles.zkiz.com/?id=123283

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019