「讀者文摘」四年內第二度申請破產保護令，睇嚟呢間老牌刊物/出版公司就冇晒前景，快趣完成歷史任務了。「讀者文摘」係左丁山讀書時之中英文「補品」，中文版有林太乙女士坐鎮編務，不同時期有繙譯高手如李如桐、蔡思果、董橋等人，既打得又睇得，益晒我地啲讀者學習學習。可惜吖，「讀者文摘」式嘅保守主義，溫柔敦厚作風、溫情文章已不合快餐時代，實在難搵讀者。前幾日「華爾街日報」有一篇文章悼念逝世不久之編輯Barry Wain（68歲），講述呢位先生發一篇新聞報導之前，必定事先調查清楚，掌握事實，有證明在手，需要不少時間，每篇稿長達2500字，讓讀者睇得詳細，被批評對象無法反駁，然後慨嘆今日任何一位記者夠膽寫一篇超過600字嘅稿件，就會被編輯省到面懵懵！大局如此，「讀者文摘」在互聯網爭奪之下，邊度會有運行吖。
投資基金/金融元老桂徵麒（Randy Kwei）先生賜飯，在美國會所48樓請客，佢自己就只飲一杯水，一碟沙律，緊守保健規律。佢剛剛出版一本自傳嘅中文版，由商務印書局出版，書名叫做「國際金融睿智──桂徵麒四十年投資生涯」，行將在3月3日星期日下午二時半，在尖沙咀美麗華商場內之商務舉行新書發佈會。桂先生今年78歲，70歲時想起家族書香世代，但父親生前絕少提起家族歷史，令佢所知不多，於是興起寫自傳念頭，希望將家族事蹟傳諸後世，佢在美國讀書生活多年，寫書用英文，商務就將本英文自傳繙譯為中文出版。
左丁山得書，先睹為快，讀咗開頭幾十頁，第34頁就講到1940年佢與孖生弟弟考入香港華仁，父母聘家庭教師補習英文，精選「讀者文摘」英文文章俾佢兩兄弟研讀，原來佢又係「文摘」嘅受益人，1949年噃，由上海逃難來港之上海家庭有此一招，肯定不簡單。原來桂徵麒先父叫做桂中樞，1930年代上海著名編輯及律師，係英文《中國評論周報》（The China Critic）嘅創辦人，屬下有14名編輯，一位就名叫林語堂！桂中樞在上海有名有利，但在1949年4月，見勢色唔對，立即放棄一切，走嚟香港，年底就被胡仙聘請為《英文虎報》總編輯，當年14歲嘅桂徵麒從此命運改變！ 