ZKIZ Archives


樓市熾熱 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130131/18151377

成班老友嘅定期晚飯集會今個月在灣仔一間酒家舉行,財務L發覺家中有陳年威士忌麥卡倫(21年)還藏在木盒內,都唔記得係邊一年邊位老友送俾佢嘅!於是拎埋嚟飲,左丁山並非飲客,淺嘗十分之一杯,加冰,又體驗唔出靚在邊度,於是收聲不敢品評。講酒質就唔識嘞,講錢就明明地,據說祖國同胞除咗飲烈酒之外,亦睇中咗蘇格蘭傳統靚酒威士忌,愛飲十二年、二十一年,甚至不知年嘅威士忌,於是啲陳年舊威士忌存貨一路下跌,價錢一路上升。上個月餐飲M叫左丁山買番一兩箱十二年至二十一年威士忌,收埋等升值,呢個世界有咗富起來嘅中國人,就甚麼都有得炒。此外,世界各地亦重新「發現」威士忌,美國、台灣、委內瑞拉、波羅的海諸國係蘇格蘭威士忌大市場,去年蘇格蘭出口威士忌高達43億英鎊,刺激到蘇格蘭釀酒業十分興旺。
不過香港人始終最鍾意炒樓,傾起呢個問題就人人有意見。財務L退休已有三四年,因早年投資樓房得宜,老早買完又買,賺完又賺,對樓市市況特別精通,佢話雙辣招推出之後,市道寂靜一排,現在又熱火朝天,佢不想持貨過多,於是揀三四件貨沽出,點知一出聲就招來四十幾人睇樓,連佢自己都嚇親,其中一個單位俾一個外國人高於市價一成買走咗,而呢位外國人仲要繳付15%BSD(買家印花稅),財務L不禁要問一問個買家:「點解你咁勇呀?唔驚跌市呀?」外國買家講:「我來港五年,租樓住,每兩年加租一次,一加起碼20%,加到我把鬼火,下定決心要買番一層樓自住,唔想成日搬屋!」
樓市又試癲癲地,上周中原城市指數升到118.38點,創歷史新高,政府仲有乜嘢招數可出?大家討論熱烈,會計A指可引入英國式資本增值稅,賣樓賺錢要交稅,但如賣樓後短時間內(例如三個月)又買樓視作換樓,可免增值稅,對真正換樓人士公平,但就針對炒家或套現客。財務L話可恢復2003年之前嘅租金管制與按揭,左丁山就大力反對,凡有租金管制,只會保護現有住客,對新租客(年輕人為主)非常不利,長期嚟講,租金打擊rental yield(租金回報)必然抑壓樓宇供應量,害咗未來一代,辯論一開,大家七言八語,幾乎收唔到聲,可以刺激大家思維。

PermaLink: https://articles.zkiz.com/?id=43798

Next Page

ZKIZ Archives @ 2019