ZKIZ Archives


罵強積金 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121104/18056602
好多人鬧強積金,一鬧收費高,二鬧回報率劣,三鬧冇自由度,要等到65歲先至可以取回,唔可以預支嚟買樓、醫急病。三罵之中,只有收費高呢樣,罵得較有理由,范鴻齡做強積金局主席之時,已睇到呢一點,提出強積金半自由行,等打工仔可以自由選擇自己供款嘅基金,藉此逼基金因競爭而削減管理費,呢樣嘢現在實行啦,但叫打工仔如洗碗阿嬸或地盤工人去自由選擇基金,因限於投資知識,實在係幾困難,以後企業嘅人力資源部相信會遇上不少特殊問題。
第二罵未必有理由,睇消委會之強積金研究報告,以十年為期,每年平均回報甚為不俗,一啲人話自己每個月定期投資一千元(以二萬元月薪供5%計),慳番管理費,買曬領匯,唔知幾爽。呢樣係知易行難,第一要考個人之規律;第二,每月買領匯亦有費用,買入碎股(因一千元未必夠買一手)嘅價錢唔同;第三,個人有無耐性買足三十年領匯基金呢?有位年輕朋友每個月定期(月供股票)買入滙豐碎股(因一手要兩萬至三萬銀,冇咁多錢買),買咗五年,蝕得好傷心,但在每股125元時已經買入,唔通家唔繼續月供咩。幾年來,佢睇住滙豐股價,心情起伏並不好受,成日唔忿氣點解當日唔買領匯,正一係有早知,冇乞兒啦。
第三罵並無理由,強積金係專款專用,作退休保障金之一種,並非全部,每月供一千(僱主供另外一千元),有排都供唔到夠錢做買樓首期啦,醫病呢樣事,要靠平時買醫療保險,唔好向強積金打主意。
有教授大罵強積金,罵得非常肉緊,都不知為乜咁勞氣,強積金每個月頂曬龍供二千多元,打工仔嗰份佔一千多元,有甚麼大不了?如果你有教授月薪,約十萬元,還有不少餘錢俾自己自由投資,嗰一千多蚊咪當作好似細佬哥時擺錢入錢罌囉,到六十五歲時攞番,有何不妥?罵強積金當然可以,但不用破口大罵,視之為洪水猛獸,好似搶曬你啲血汗錢咁緊要。現時有泛工黨議員倡議設立全民退休保障,內容不詳,如全民退保要持續嘅話,市民必須每月供款(如美國社會保障),供到六十歲,究竟供款應該幾多,有排爭拗,但不能不供,否則以香港人口老化速度之快,今日之80後、90後會斷擔挑。
PermaLink: https://articles.zkiz.com/?id=39488

Next Page

ZKIZ Archives @ 2019