ZKIZ Archives


【真‧集體回憶】孖街坊唱張國榮金曲《尋找快樂》撐廣東歌

1 : GS(14)@2017-03-03 00:54:40

(左起)Pam、Sammy、KB同阿偉上街捉街坊合唱80年代金曲



「快樂係好簡單,其實同最親嘅人嘅嗰種快樂,係無價嘅,我覺得錢買到番嚟嘅未必係快樂。」「真係笑,我覺得已經係快樂架喇!」「例如我第一次生小朋友,見到佢又好開心好激動,嗰種快樂係永遠喺你個腦度。」「每朝起身健健康康、健健全全,我已經覺得好開心o架喇,人生苦短嘛。」



呢位張先生唱《風繼續吹》都唱得有文有路o架

自稱唔係80後嘅陳小姐合唱完即刻要同各位合照,嘩!同KB頭貼頭喎

打緊機嘅張生覺得《Stand Up》好聽,但佢唱得仲好聽!

快樂就係咁簡單,就係開懷咁笑囉。音樂劇《尋找快樂時代》一眾音樂人KB李健宏(Kevin Boy)@LMF、Sammy(蘇浩才)@Kolor、阿偉(李兆偉)@RubberBand同和音女王鍾達茵(Pam),日前走上街頭訪問一眾街坊,揀選心水80年代嘅廣東金曲,皆因《尋找快樂時代》呢齣音樂舞台劇,嚟緊3月30號開始一連四場,喺理工大學賽馬會綜藝館再次公演,當中會大唱經典廣東歌。佢哋四人問到好多街坊都揀哥哥張國榮嘅歌:《風繼續吹》、《Stand Up》,亦有揀選葉德嫻嘅《幸運是我》、同陳潔靈合唱嘅《千個太陽》,街坊們都喜歡80年代嘅歌曲多啲,話旋律、主題都比現時嘅歌豐富喎,四位音樂人仲即時同街坊大合唱,玩音樂就係要玩得開心嘛!



因乜事個個O晒嘴?

仲要跪晒喺度?原來紅髮女士係舞台劇前輩陳桂芬,佢哋4個要重申冇造馬內定

原來老闆想當年晚晚去酒廊聽歌,仲憶起尹光名曲《數波波》同《數毛毛》

提到廣東歌,佢哋四個不約而同都話要撐!KB就話:「係香港嘅魚蛋,魚蛋係香港嘅特色,廣東歌就係香港嘅特色。喂,例如國內都係buy我哋廣東歌手,係咪先?你喺香港唱廣東歌插咗旗,先會搵你返去唱吖嘛。」Sammy話:「我哋係香港人,我哋成長嘅語言就係呢樣嘢(廣東話),起碼自己有共鳴,我唱出嚟有嗰個感覺。」阿偉:「廣東話係我哋嘅語言,係因為我哋愛我哋個地方,同埋愛我哋嘅語言,所以我哋必須好好保存呢樣咁重要嘅嘢囉。」



其實快樂就係笑囉

「由細到大講廣東話,廣東歌就係魚蛋,係香港嘅特色!」

採訪:懷鈺拍攝:廖達燊、Neo剪接:Roy場地:STUDIO KING




來源: http://hk.apple.nextmedia.com/entertainment/art/20170301/19943070
PermaLink: https://articles.zkiz.com/?id=327327

Next Page

ZKIZ Archives @ 2019