雞年願望傅嘉莉同是非分手
1 :
GS(14)@2017-02-12 15:34:162017-01-26 NM
娛樂圈是非圈，傅嘉莉（Kelly）出道12年，一直是非纏身。15年，Kelly唔做model賣身無綫，即獲重用，劇接劇冇停手。最近孭飛的兩套劇集孖住播，即有是非新聞「贈興」，將陪富豪出埠，收名車的舊聞再重溫一次。臨近歲晚，Kelly專登抽時間去拜觀音，祈求來年遠離是非。爭取唱主題曲
一四年以部頭形式接拍大台劇集《愛我請留言》，傅嘉莉做第二女主角，飾演大陸妺「皎妃」一角，被一致好評。網民觀眾受落，Kelly決定放棄做model，賣身無綫做親生女，正式登陸大台。時勢做英雄，無綫花旦買少見少，Kelly機會不斷。唔夠兩年，已經拍了五套劇，話咁快升呢做女一；最近出街的八點半賀歲劇《財神駕到》和九點半的《乘勝狙擊》，兩套孭飛劇孖住播。「公司啲監製都好鍾意用Kelly，覺得佢夠搏夠投入。其實佢好有興趣做打女，所以一得閒就去跟教練打boxing，做gym；另外仲學緊唱歌，Kelly想試吓唱主題曲，總之未做過嘅都想搵機會試。」一名無綫人說。
翻舊賬贈興
經常被爆生財有道，收入同支出唔成正比的Kelly，最近又一次被翻舊賬，指她收富豪名車，又陪對方去泰國。「嗰啲所謂『新聞』早就俾人寫過，但呢輪佢有劇上，又俾雜誌再寫多次話佢陪富豪去曼谷旅行，其實嗰次都係佢有個好姊妹結婚，去曼谷係pre wedding party，Kelly有份做搞手。」要忙於為兩套孭飛劇跑宣傳，又要應付沒完沒了的是非，歲晚收爐前，Kelly決定抽時間去紅磡觀音廟參拜。
定期齋戒靈修
上週六（一月十四日），在筲箕灣出席完新劇《財神駕到》活動後，Kelly隨即趕往髮型屋轉妝換衫，再直去紅磡觀音廟。到埗後，先到附近的鋪頭買香燭，同店員好好傾的她，明顯去慣去熟。年尾多人還神拜神，觀音廟內人頭湧湧，Kelly左穿右插，搵個靚位，誠心上香，唸唸有詞接近廿分鐘才離開。「Kelly信佛好多年，有時仲會閉關做靈修同食齋；佢話靜修同食素會好幫到自己，對精神同健康兩方面都有用。都啱嘅，成日惹埋咁多是非，係要搵啲位靜吓。」Kelly身邊人說。
是非纏身
現年三十二歲的傅嘉莉，模特兒出身，入行多年，13年以部頭約接拍無綫劇《衝上雲霄II》飾演咖啡妹而為人所認識。14年，首度擔任第二女主角，拍無綫劇《愛我請留言》飾演皎妃一角，開始走紅。翌年簽約無綫，成為親生女後，Kelly接拍《張保仔》飾演夏蟬一角，獲網友盛讚搶戲過女一陳凱琳。之後更一劇接一劇，近期上映的賀歲劇《財神駕到》更擔正女一，大受無綫力捧。演技被肯定，但Kelly即被緋聞纏身。14年，Kelly拍《張保仔》時，被指向「貝勒爺」陳展鵬放電，又經常被翻舊賬，指她被富商包養，離奇暴富。其實Kelly做model超過10年，又經常與家人合資買磚頭，儲埋唔少！
撰文、攝影、攝錄：娛樂組