📖 ZKIZ Archives

業績簡評 - 利亞零售 (0831.HK) PARTIPRAL 派得好

http://partipral-hk.blogspot.com/2012/03/0831hk.html


利亞零售剛公佈2011年全年業績, 營業額上升一成, 比較特別既係理應係四季如一既業務一連兩年都係下半年做得較多生意. 相較於店舖只增加17家, 營業額增幅其實算相當理想. 兩大業務 - OK便利店同聖安娜餅屋均同步增長, 唯一美中不足之處係香港業務仍然佔集團總收入超過95%, 便利店業務繼續緩緩向北發展, 可惜營收暫時仍然停留於兩年前階段. 

唔知係咪系出名門既關係, 值得大讚既係管理層控制成本相當理想, 不論租金抑或受最低工資所影響既僱員成本, 增幅相對營業額都算溫和, 乃純利增長兩成主因. 純利率進一步擴闊至近4.2%, 乃近年最佳表現, 而且在進步之中, 有足夠理由相信利亞目前正處突破點之上, 往後營業額增長, 會有更大比重化成純利. 內地業務進步比想像中慢, 但便利店虧損正在不斷收窄, 算係好事. 

利亞財政一向相當理想, 加上所經營既係一門現金流異常強勁既業務, 今期現金大增近兩億, 派息率亦能維持, 實在沒什麼值得懷疑之處. 手頭淨現金超過7億, 要應付類似早年收購聖安娜之類既併購或其他發展應該足夠有餘. 目前股價$3.90, P/E 17倍, 息率3.8%, 扣除現金後P/E仍達13倍, 估值合理偏貴多少, 主要溢價應該來自利豐品牌效應.

對利亞比較詳細一點既睇法上年6月其實都寫過, 詳見舊文: 

0831.HK 利亞零售. 至今九個月過去, 績後股價雖然已經急升超過1成, 但對比早前撰文之時其實只係原地踏步. 利亞進軍內地步伐仍然偏慢多少, 但我非常佩服既係集團係大本營香港仍然能夠繼續發圍, 相比我之前以為本地業務早已難再寸進, 算係有多少喜出望外. 始終內地業務仍未起飛, 很難說服自己此股為增長股, 但正如早前所講, 相對本地市場, 利亞於內地所霸既地盤其實只係九牛一毛, 眼光放遠一點, 仍然大有可為. 業務穩定繼續係加分點, 其餘證供亦比去年6月更有說服力, 所以目前股價相對上係平左.

付一定溢價, 買另一個中國夢, 究竟是否值得就見仁見智. 而我既睇法就係, 希望聽日$3.9可以買番多少.

PermaLink: https://articles.zkiz.com/?id=31946
Next Page
ZKIZ Archives @ 2019