📖 ZKIZ Archives

泛民參選有變局 左丁山

http://hk.apple.nextmedia.com/template/apple_sub/art_main.php?&iss_id=20111217&sec_id=12187389&art_id=15900548&cat_id=255&coln_id=22

 

 

呢日與中貿林食完飯，行經新世界大廈，碰到地產 L，地產 L係翠亨邨常客，在新世界大廈外面見到佢一啲都唔奇。地產 L捉住左丁山講：「真係要讚番煙仔何幾句，講嘢句句到肉，針針見血，冇句花假，你要讚吓人至得！」原來煙仔何嘅影響力咁大，一個星期嚟，由八十歲老人至十 八歲文憑試考生，都話聽過何生講話，人人話佢口才醒。地產 L問左丁山點睇，左丁山話：「何生可能講多咗，有時點到即止就得啦，唔駛咁明呀嗎，畢竟對方係何生公司嘅非執董噃！」
不過咁，金融業巨子 H曾對左丁山講過：「查理士口才夠好，夠晒通俗化，販夫走卒都會聽得明，佢勝在不扮高深，只求傳真！」咁呀，左丁山呢類人應屬少數，無謂評論何生之言。
地 產 L跟住講埋幾個小故事，但又叫左丁山唔好寫，寫乜鬼吖，人地何生都話佢嘅舖頭細，容易俾人蝦，左丁山呢個小方塊仲易俾人踢館，啲古仔聽完就算，恕難公開。 記得在四季酒店參加經濟峰會之日，場內滿是金融界、證券界及工業界人士，除咗一啲公開挺梁人士之外，不公開挺唐者則數唔晒，呢場特首競選戰有排打。
本 文見報之日，千二名選委名單已定，執筆時知道泛民起碼有二百零五個位，足夠提名一個人（何俊仁或馮檢基）競選特首，與梁唐爭過。有咗泛民候選人，情況有微 妙轉變，目前民意調查以梁為第一，唐第二，何或馮落後太遠，不成氣候，或者泛民初選決定咗何或馮之後，民望會好一啲。何馮兩人皆曾力主 2012年雙普選，爭取唔成功啫，不失為民主普選嘅代言人，但憑此民主光環，如果民望還是低於一成，日後本地政治分析家如何解釋？香港人唔重視民主？不要 民主？不要盡快普選？倘若爆大冷，何或馮因民主鬥士之名，民望躍居第一位，咁就輪到捧梁人士唔知點解釋咯，佢地現在採用以民意挾中央嘅策略，不斷話選委要 順應民意而投票（潛台詞就係要投票畀梁生），三個月後若出現何馮民意領先嘅情況，咁咪好滑稽，何馮無意中做咗特首？打民意牌是可以的，不過暫時目前領先就 猛咁講「民意決定論」，十分危險！

PermaLink: https://articles.zkiz.com/?id=29982
Next Page
ZKIZ Archives @ 2019