ZKIZ Archives


智取大市:鎖國炮製樓市炸彈

1 : GS(14)@2016-03-09 16:24:17

內地一線樓市好熱好熱,點解熱到咁呢?重點原因肯定有一個,就係鎖國。今年內地GDP增長目標6.5%至7%,但廣義貨幣M2增長目標達到13%,增幅又一年拋離GDP,以國情嚟講,本來唔係乜嘢特別,因為實情年年都係咁。之但係近半年出現走資,今年初直頭鎖國,唔畀資金走出去,同時又歡迎資金流入,就算冇外資流入,都有國企借美元,然後可能調動美元返大陸,再換番人民幣,所以無論點走資,人民幣供應都唔會緊縮,造就樓市急升嘅條件。舊年1月外滙佔款下跌6,445億元人民幣,但外滙儲備1月跌995億美元(約6,474億元人民幣),反映外儲下跌主要因為外資走佬,而外資沽售資產未必單單係物業,亦可能係債券、股票之類。但另一邊廂,人民幣增加咗供應之後,要搵資金出路途徑就好有限,由於中國人都唔信股票,大家只覺得係用嚟炒而唔係用嚟揸,所以有錢都係先買最有FF空間嘅一線樓市,令短期內喺一線樓市嘅資金有入冇出。樓市爆升最大的問題,係爆煲。呢一刻,銀行想借錢出去,經濟衰之下苦無對象,偏偏最值錢嘅係物業,如果物業被人瘋狂抵押借錢,或「首付貸」買樓成行成市,到樓價爆煲時資不抵債,到時銀行硬啃壞賬,貨幣緊縮速度可以你點印銀紙都頂唔住。晉佳
https://www.facebook.com/advanceguy1/





來源: http://hk.apple.nextmedia.com/financeestate/art/20160309/19521379
PermaLink: https://articles.zkiz.com/?id=297323

Next Page

ZKIZ Archives @ 2019