📖 ZKIZ Archives

無敵居屋 左丁山

2011-11-21  AD

領匯宣佈中期業績，盈利增長令分析界滿意，基金界視之為資金避難所，股市上星期自高位回落，恒指飽受摧殘，但 呢隻 823十分堅挺，如金槍不倒，逆市上升，股價接近 52周新高，一早買股買到呢隻收租 Reit，可謂十分安樂。
領匯財務高層，公關團隊好 識推廣，宣佈業績後，出動十四人小巴在國金二期外接載分析界到赤柱史丹利廣場吃法國餐，一來分享新裝修落成嘅史丹利廣場嘅設計與設施，二來向分析界講解吓 業務，一舉兩得。可惜呢晚有微雨，史丹利廣場嘅設計以接近大自然為目標，內有不少空曠地方，最方便賞月或欣賞天上繁星，但呢一晚就周圍濕滑，不宜外出步 行，大煞風景。即將結婚嘅分析 K話：「喺史丹利廣場吃過晚飯，與太太拍拖行去美利大廈，跟着月光漫步行去沙灘，會好浪漫。」係嘅，係嘅，不過在座者有不少已慶祝二十年、二十五年結婚紀 念日之人，要佢地老遠揸車入赤柱行沙灘，反對嘅會係邊個？老婆是也，費事長途跋涉喎。
記者 E就唔同，晚晚可與老公落沙灘踱步，佢老公認真夠運，當年居然抽籤中獎，買到史丹利廣場隔籬嘅六層高居屋一個單位，擁無敵海景，雖然日日出中環返工搭巴士 幾麻煩，點都唔捨得賣，最新呎價係八千元，賺好多啫。聽聞有不少國際學校外籍教師最喜歡租赤柱居屋住，好好租喎。外資大行一位分析師望住啲居屋公屋，不禁 搖頭：「浪費資源，其此為甚！」所有在場分析師都同意此說。呢啲地皮絕對係豪宅地，唔起公屋居屋，政府可以收多百幾億元，用嚟興建更多公屋，咪仲好咩？

每件事都有個背景，呢啲公屋居屋乃當年八萬五下嘅產品，王䓪鳴係房委會主席時期之傑作，但 整個八萬五政策之後，主要策劃人士並非王䓪鳴，而疑似係即將宣佈競選特首之振英哥。振英哥有領導之風，最近出席房屋論壇時講到，「未必需要共識，領袖領導 要緊」諸如此類（請看上星期六李怡「蘋論」），不久之前又講過公屋每年興建三萬五千個，相信他日如當選，一定搞大有為政府。分析師們冇話支持邊一位，但多 數摸唔清振英哥嘅門路，唔知佢上台之後會開邊一瓣，而唐唐卻係 known material，金融界容易適應啲。

PermaLink: https://articles.zkiz.com/?id=29547
Next Page
ZKIZ Archives @ 2019