好不主席：歡樂冇江華
1 :
GS(14)@2012-09-12 00:00:08http://hk.apple.nextmedia.com/financeestate/art/20120911/18013317
呢幾年最令支持香港民主的市民痛心，莫過於眼看民主派別不斷內訌，同室操戈。或者有人會說，泛民的光譜亦因此拉闊了，但實際上卻是沒法聚焦，即係幾乎全部都變曬「散光」，再唔係就係「老花」，迫在眉睫嘅民主近憂都睇唔清楚。當中仲有啲大言不慚話自己先係貨真價實的宇宙唯一民主派，不屬泛民類別，睇返佢哋啲「人力」對其他民主黨派的狙擊，又確係勝似建設派，所以都可劃為同樣嘅另類「犯民」。
輸足七注要消氣
事實上今次立法會選舉，投票人數創下紀錄，而泛民總得票率不可謂低，人數亦有實際的增長，因此並唔係市民冇出嚟撐你哋，亦唔係栽在人家手裡，只是自己作孽與人無尤。
當然對家配票嘅功夫了得，諗起讀書嗰陣玩嘅德國橋牌咁，如果對手鋪鋪都「Just Made」，咁一就係佢真係堅，一就自己確係唔入流。又要玩，又話人哋使唔使計得咁準，再者都已經係三番四次，自己都仲要係得嗰套板斧，唔輸死都偷笑。況且明知人哋嘅牌章高，默契好，仲會間中「出術」，白鴿友嗰陣仲懶醒咁走去爭取一個以為可以益自己友，其實係更加有利對手嘅政治分贓方案返嚟。結果咪就係貴黨既流失三成選票，復又送多七席畀人，其中兩席自己哽埋。華叔泉下有知，不知有何感想？
埋單計數，另邊廂公民袋就係賠了「女神」又折名。兵行險著唔係唔得，不過計數呢瓣就連商界翹楚嘅「豉油檔」都篤錯曬，平時只識講法理，鑽條文方有勝「算」嘅大狀又點會搵到著數？學似嗰句宣傳句語：「贏曬啲票，但係輸咗頭家」，值得嗎？當然比起白鴿友，都已經可以五十步笑百步，起碼叫做可以保住去屆嘅六席，平手離場。至於與嗰啲「伯仁」同「池魚」條數，以後應該仲有排計，當然仲有唔少投咗佢哋票嘅選民，包括我，都真係要「痛定思痛」，諗清楚下次要點投。
唔好意思，寫咗一年專欄，「建設」派和政府肯定係我頭號目標，但舊年區議會，今年嘅特首選舉，仲有家陣塵埃落定嘅立法會，每逢選舉之後，我都會抵唔住頸要痛陳一番。若然民主派諸君能夠為大局設想，搵次「無私」地不計黨利，放下小我並玉成盟友；再者摒除門戶之見，暫釋前嫌，「團結」異己，爭取更大勝利；且能與時並進，不再拘泥於僵化的組織觀，願意結合（惟不一定能夠吸納）新生代的社運人士，形成更加「進步」的力量，下次選舉再來，民主派方能有一線生機。
不要忘了，呢幾年數以萬計獲准在港居留嘅新移民，到時將會自動過戶成為建設派嘅新票源。此起彼落，爭民主、保自由、抗陸化的仗只會更難打。而香港的價值和未來，就在你們口口聲聲話要捍衞、要維護，卻依然故我的政治理念中逐漸斷送。唔知到時，各位大老（應該都仲係嗰幾位，不然就係換咗落選嗰啲）係咪又話係我哋選民嘅意願。為咗議會裡少一把聲，很多人，又包括我，先委曲「怒投」超區，家陣「歡樂冇江華」至可以稍消輸足七注嘅嗰度氣！
盧先亞