ZKIZ Archives


九十一歲全港最老秘書

1 : GS(14)@2010-12-26 17:05:31

2010-12-15 EW

中國人最重人情味,特別係啲老牌家族,對公司職員如同一家人,好似正重建皇后戲院為商廈嘅陸海通,公司個秘書就足足九十一歲,相信係全香港最大年紀嘅秘書,可能有機入到健力士世界大全。

陸海通有一條不成文規定,多年來公司一直唔裁員,甚至冇退休機制,員工只要有工作能力,又願意工作,公司都會繼續用。呢位全港最老嘅秘書名叫龐召斕,常務董事陳達光亞爺嗰代時已喺陸海通工作,佢中文根底十分好,書法更是秀麗,曾教陳家上下書法。

事實上,陸海通入面員工,等閒都做咗十年以上,即使行政總裁關國康,亦喺公司做咗近五十年,係陸海通三朝元老。關國康係陳方安生丈夫陳棣榮同班同學,但佢中六就開始出社會做事,原先係跟邵逸夫做嘢,過咗一年就轉去陸海通,一做就係半個世紀。

「八十後」做董事

呢邊廂有年紀最大的秘書,那邊廂就有最年輕嘅上市公司董事。一言發現,今年到香港上市的內地企業,唔少董事局成員或者高層年紀都係廿零歲。過去要喺內地任職企業高層,冇番五、六十歲都唔使旨意,家點解會出咗咁多年輕才俊?一言再細心留意,原來唔少呢啲高層,都係含住金鎖匙出世的富二代。

上個月上市首日即大插水嘅歲寶百貨(0312),集團副總裁楊題維今年只有廿三歲,舊年未讀完書已經入公司幫手,今年喺英國讀完大學後,即刻成為公司高管。先前擱置上市嘅長甲地產,集團主席個仔趙宏陽,亦係廿三歲就已經做公司執行董事。至於天倫燃氣(1600)主席張瀛岑個仔張道遠,亦係廿四歲已經做非執董。

最厲害要數到環球乳業(1007)主席趙傳文個仔趙宇,今年不過二十四歲,唔單止係公司執董,仲做埋董事總經理,呢個位對整間公司舉足輕重,除咗要制訂公司方向外,更加要負責執行,總之生產、銷售、人事等,事無大小都歸佢管。喺咁嘅年紀做到CEO,趙宇可以話係全港上市公司中,最年輕一位囉。
九十 十一 一歲 全港 最老 秘書
PermaLink: https://articles.zkiz.com/?id=272263

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019