| ||||||
話說男士護膚纖體公司MENCE，一向搵開視帝黎耀祥做代言人，但噚日華華赫然發現生招牌變咗股評人黃瑋傑。不過，黃瑋傑嘅可觀程度似乎弱啲噃，人哋視帝露肚晒腹肌，相反有唔少師奶粉絲嘅黃瑋傑就相當「惜身」，恤衫鈕扣到上頸。 華華問黃瑋傑做乜踩過界做代言人，佢話只係同間纖體公司老闆娘蔡敏思好熟，用過佢嘅服務，覺得唔錯，所以老闆娘叫到就幫手。 自認保守拒晒腹肌 黃瑋傑唔肯講酬勞如何，至於點解唔學視帝晒腹肌？「我個人保守啲！」佢話只係上去控制吓體重，加上夜晚要睇美股，冇覺好瞓，為咗上鏡個樣冇咁殘，所以要護膚，唔係要6嚿腹肌……簡單講，即係冇排吉百利朱古力喺身，冇得晒也！ 諗諗吓，真係越嚟越多股評人俾美容纖體公司睇中，就好似陸叔陳永陸，因為做電台節目，所以同電台廣告客戶Bioarchitect熟絡，對方贊助佢同佢太太囡囡美容療程，搞到佢成個代言人咁。 此外，化妝品牌Estee Lauder就搵咗青姐胡孟青拍咗個靚爆廣告。話時話，股評人郭思治渾身肌肉，睇怕遲早有人搵上門。 李華華 | ||||||