| ||||||
代表金融服務界嘅立法會議員詹培忠，一早講明唔會再選立法會，玩埋呢屆就唔玩。據聞，詹議員打算今年8月正式宣佈辭職，換言之，有意參選嘅人士可以做定熱身，搵定人幫手拉票。 立法會明年選舉，做咗差唔多廿年嘅詹培忠如果真係唔玩，呢個界別嘅候選人應該有一場龍爭虎鬥。市場傳咗好耐，話香港金銀業貿易場永遠名譽會長胡經昌、馮志堅、香港證券學會永久名譽會長張華峰、港交所（388）董事李君豪，同埋金利豐老闆娘朱李月華都有機會參選。 張華峰好謙咁同華華講，做金融界立法會議員要有「三才」，就係口才、錢財同急才，以上三個條件，無人能及詹議員。業界都好希望詹議員繼續做，若然詹議員真係唔玩，張華峰話，希望出嚟選嘅人，真心為業界做事，但自己就無意出嚟選。 張華峰認為，朱太係唔錯嘅候選人，問題係朱太有金利豐成盤生意要打理，唔知佢肯唔肯拎多啲時間嚟做立法會事務啫。 | ||||||