|
||||||
|
華叔係硬漢一 名，面對大是大非，立場企硬，堅持原則。小學畢業時，班主任王耀光老師在紀念冊寫以下幾句，勉勵左丁山：「論人不可論成敗，應先論人格。論詩不可論工拙， 應先論骨格，論畫不可論形式，應先論風格。」呢幾句說話，左丁山有好多年都唔明白透徹，小六畢業時更加睇到一嚿雲。在華叔身上，就真正係不可論成敗，應先 論人格。 企硬也好，華叔在不損大目標、大原則嘅情況下，可以靈活變通，願意談判妥協（如政改方案），或不顧庸俗之譏，落實做好賺錢嘅生意（如教協教師超市），能夠做到呢點，先至可以長期在社會立足，能夠長期堅持爭取大目標。 寫 到呢度，出版Ｍ遣人送來一本○八年出版嘅舊書《相遇》，作者周保松教授（中大政政系），呢本書大嘅冇乜銷路，在書局難以買到，喺香港，學院教授寫嘅個人思 想、思潮、個人經歷，略有學術意味嘅書，肯定難以暢銷，但係難得牛津出版社有為文化貢獻之心，將周教授嘅文章結集出版。問出版Ｍ：「點解呢個時候贈書給 我？」出版Ｍ話：「最近聽中大沈祖堯校長講『香港家書』，佢提及牛津出版《相遇》一書，讀後感慨良多，認為中大唔會着重大學排名等等。咁啱我又讀過《相 遇》，好感動，如果當年我唔係考得水皮，可以入中大，就唔使去加拿大讀大學啦，周教授寫嘅中大人文風景，令人神往。」出版Ｍ太謙虛嘞，在佢嘅年代，出洋留 學最是威風。
聽完佢講，立即翻閱《相遇》，有幾篇已在以前於《明報》文化版讀過，周教授少年自內地來港，苦學成材，考入中 大讀工管，修陳特先生「哲學概論」之後，就轉讀哲學系，一九九五年畢業於新亞，後到倫敦LSE讀博士，二○○二年返母校政政系任教。周教授寫陳特先生，感 情澎湃，講師生之情，確係好文章，陳先生師從新亞錢唐牟三位大師，有錢唐牟三人之傳道授業解惑嘅中國師生傳統精神，周教授受陳先生影響甚深，希望佢亦能秉 承師公師父傳統，在中大做到傳道授業解惑。唔好以為容易，大學教授無學業成就，何以授業？無一家之言，何以傳道？無豐富人生經驗、廣博見聞與精湛學養，何 以解惑？三無之士，在大學混飯吃而已，此所以左丁山老早唔敢攻讀博士學位做大學教師也，當年諷刺老師「溫故支薪，坐以待幣」，誠恐剃人頭者，人亦剃其頭！ |
||||||