|
||||||
|
上星期曾有兩日 天氣轉涼，市區最低溫度錄得13.9度，今日又有寒流襲港，於是中環寒衣紛紛出籠。香港一年難得幾日天寒，高級人士嘅皮革大褸難見天日，十四度唔係幾凍 啫，中環已見有人急不及待演吓嘢，嗰日在泄蘭街見到一位好似三十歲未夠嘅高瘦男士穿一件疑似白色底衫，外披一件白皮草背心，再加一件黑皮草中褸，幾誇張 噃，與Diesel門外一位外籍女士穿一條超短牛仔褲與Ｔ恤一件，相映成趣。 我地就話驚住寒流不來，冬季衣服冇得表演，長者就驚住天寒地 凍，容易誘發心臟病及凍親。十二月八日就有一名八十二歲獨居女士在牛頭角樂華南邨寓所暈倒，送院不治，更有一千二百三十一長者按平安鐘，其中七十七人需要 送院，你話平安鐘幾有用呢，唔怪得不少朋友猛咁游說家中長者出街時帶住一個無線平安鐘。 講起長者平安鐘，鄭大班就威咯，上星期又去咗阿布扎 比參加「世界移動高峯頒獎禮」（World Summit Award Mobile，簡稱WSA Mobile），呢個WSA總部設在奧地利薩爾斯堡，係聯合國組織之一，今年頒發八大範疇嘅獎項，在M-Inclusion and Empowerment分組之中，有五個獎，其中一個就係頒畀香港嘅長者安居協會，表揚佢地推出嘅二十四小時移動聯線服務Mobile Link Service（MLS），即係我地講嘅無線平安鐘，長者出街如碰上意外，跌倒街頭，只要仍然清醒，一按身上之手機，長者安居協會職員就會收到訊息，立即 搵人到場幫忙。 鄭大班已去過荷蘭攞獎，十二月二日至八日又試代表長者安居協會到阿布扎比攞獎，唔怪得佢咁高興，佢話呢個無線平安鐘嘅概念與 技術，廣受世界「移動科技」（Mobile Technology）界人士讚賞，認為夠創新又具社會服務意義，值得其他國家地區學習，佢問左丁山：「喂，你成日出街食飯，駛唔駛攞番個無線平安鐘，免 你老婆仔女擔心呀？」吓，示人以老呀？多謝先，不過始終有一日要嘅！ |
||||||