ZKIZ Archives


竊聽風雲2 現場版 老狐狸

來源: http://hkcitizensmedia.com/2015/05/08/%E7%AB%8A%E8%81%BD%E9%A2%A8%E9%9B%B22-%E7%8F%BE%E5%A0%B4%E7%89%88/

早前老狐貍覺得勢色不對下增持現金,最高水平逾55%,隨者大市下跌,幸好亦令小弟損失大幅減少,從而有力量係昨天重新建倉,買入了廣船 (317.HK)和哈爾濱電氣(1133.HK)去配合中既政策慢牛市,今日亦買番一D之前我好有信心的股份,遇巖個市反彈中,叫做正方作賽,感覺良好。

今早老狐貍如常地工作時,突然我的Whatsapp和微信都狂炸我,原來市場人仕都係度討論緊新科狀元的出現,大家係度大揼其心口,更有人講要回家睇下有無剩低一兩萬股現貨係個倉度沽漏左,咩狀元咁巴閉呀?登登登,就係恩達集團(1480.HK)。

1
睇個圖可以話係無乜特別,只係3日前開始有郁動,但點都估唔佢由2014年12月以每股$1.23上市,短短半年唔夠可以炒到今日最高位的$102蚊,無錯,係$102蚊,即係82.9倍,如果你招股時有一萬幾千係個倉度或者係床下底,你已經變成一個有百萬資產的有產階級了。

其實老狐貍一直都好鍾意紀錄呢D歷史時刻,有幸地老狐貍都CAP呢個圖喎,就同大家分享一下。

2
事發時係11:21 分,當老狐貍收到第一個Whatsapp時,應該係約10:30,個時係$60蚊,短短一個鐘頭,老狐貍可以話係用竊聽風雲2,阿祖同同叔玩貨源歸邊的情況黎比,但情況更勁,沿途就係呢間行不停掃,有2,000掃2,000,後來更似阿聖雲叔話齋:「死咯,你睇,連d盲毛都入黎搶咯!」咁就掃到$102蚊,寫到呢一刻,股價已回番去$60蚊(11:46am),不過查就查硬架啦,如果唔係有乜勁人入股的話,就升得高,跌得痛楚咯。

世事就係咁,有狀元就有榜眼,一波未平,一波又起,榜眼飛尚無煙煤(1738.HK)又再觸動市場眼球,由11:05am的約$16蚊,一口氣炒到最高的$51蚊,有幸地老狐貍又再cap到呢一刻喎,分享下先。

3
係呢兩隻之後,其實又再開始禾雀亂飛了,包括集成傘業,寶姿等都飛升。

好,不如又黎睇一睇狀元同榜眼有無乜共通點。

行業?

無關係喎!

大股東?

無關係喎!

大股東持倉?  

恩達集團:      大股東持有75%

飛尚無煙煤:  大股東持有52.44%

股份分佈?   

恩達集團:       頭5 大劵商連同現貨:

飛達無煙煤:  頭5 大劵商連同現貨:   98.45%

好似乾係其中一個共通點喎,咪住先,我講過好多次乾只係一個較大的誘因去炒高,同炒的速度會快好多,但唔係代表一定乾就升,「你老豆有鬚,但有鬚唔係一定你老豆一樣」,否則老狐貍講過好多隻乾股啦,隻隻都95%以上,又唔見佢飛左上天?而當日隻華富都唔係好乾者,又會升幾倍?

感覺上,呢個浪已經升到一D無受政策影響的中細價股,亦開始惠及一D本地莊家,相信黎緊必定愈演愈烈,幸好老狐貍呢兩日都買番唔少貨,否則升市無份跌市就中會死得好慘的,但我相信我D股近架啦….(強烈主觀意願中)。

此文章只屬分享,不涉及遊說或投資建議,投資涉及風險,請量力而為,小弟亦沒持有上述之股份。

如大家有興趣,歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

PermaLink: https://articles.zkiz.com/?id=145488

Next Page

ZKIZ Archives @ 2019