📖 ZKIZ Archives

散戶通病（１） 陸羽仁

杜指收報10067點，倒跌53點或0.5%；標普500指數挫11點或1%，收報1074點；納指收報2147點，跌32點或1.5%；羅素2000種小型股跌1%。紐約證交所交投仍顯淡靜。杜指期貨最新報10017點，比現貨低水50點。VIX或「恐慌指數」回升3.8%至24.6。總結1月最後一周, 杜指跌1.1%,標普500指數下跌1.7%,納指跌2.6%。1月杜指累計跌3.5%,標普500指數跌3.7%,Nasdaq跌5.4%。美股連續第二個月下跌，1月份更係去年2月份以來最差。

美國股市有句諺語：「1月怎樣走，全年就怎樣走」。追蹤美國股市自1950年以來，1月份未能預示全年表現的情況只有五次，睇嚟今年股市前景不妙。Sierra Core Retirement Fund投資組合經理David Wright表示，「美國經濟沒有顯露出能自我維繫復蘇的跡象。」

港股美國預托證券下挫，ADR港比指數收報19913點，比香港收市低209點或1.1%。匯控收報83.14元，比香港收市低0.6%；中移動收報72.94元，比香港收市低1.1%。

美國商務部上週五公佈，去年第四季度美國經濟大幅增長，GDP以年計增長5.7%。遠高過市場預期的4.8%，係連續兩個季度增長。但比較2008年，2009年全年GDP下降2.4%，是1946年下降10.9%以來的全年最大降幅。第四季嘅GDP增長主要由企業清理庫存帶動，美企其間共清理了335億美元的庫存，為GDP增長貢獻了3.39個百分點。而消費支出增長2%，為GDP增長貢獻1.44個百分點。主要受惠於美國政府「舊車換現金」補貼專案。

為幫助推動仍然疲弱嘅勞工市場，鼓勵小企業請多啲人。總統奧巴馬上週五提出一項達330億美元、專為小型企業而設的稅務優惠計劃。內容主要係小企業於今年內每新請一個員工，即可獲得5000美元嘅稅務優惠，每家企業優惠總額50萬美元，即係話企業新增嘅首100名員工都有優惠。計劃亦講明該等小企若在今年減少職位的話，優惠將被取消。 

上星期睇到網友Jeffrey@80後講佢爸爸買股的故事，可以同大家分享吓。Jeffrey咁講:「話說家父舊年先開始買股票，咁啱撞正舊年個市小陽春，佢好好彩咁買邊隻賺邊隻，於是越黎越心雄，仲瞓晒身咁玩。我本身都有勸佢但佢冇聽，其實我都知一個心雄既人點勸都冇用，於是後來由得佢自己炒唔再點理。好喇，到左今個月個市開始跌落黎喇，隻忠旺(1333) 都跟住跌，之前又話盤數有事後來又澄清冇事搞到好波動，而家仲停左牌成個月郁都唔郁。」

        「到左24/1出咗份澄清公告話要為之前既嘢修正，我都覺得唔妥，又知道家父之前有提過買呢隻股，於是頭先問一問佢買咗幾多，一問之下先知大件事。原來佢響俾人話盤數有事之後$6蚊反底用四成資金買咗，之後升到$8仲要用淨番D資金訓身買埋 (真係訓身果隻)。」

        「我當堂話咗佢成晚，同佢講佢D炒股方式好有問題，買股唔係咁買之類。家父聽完都頭DUP DUP冇嘢講，但仲係好似唔係好明我嘅意思咁，係咁話：「如果復牌就賣一半再去買晒建行果D銀行股啦」、「跌到$4蚊我就唔賣喇，$6先賣啦。」。果D低級老散犯嘅錯誤同心態佢全部有齊，乜嘢市盈率、每股盈利全部唔識，炒股一年一D進步都冇真係激到我噴血。」

 「想問一下陸SIR同大家：對住咁炒股嘅屋企人真係一步一驚心，個個月俾多D家用想佢有個錢傍下身而家仲反而擔心佢一Q清袋。我有諗過不如我接手佢個銀行戶口幫佢買股票 (之前其實係咁，但佢後來自己打電話買賣越買越心雄搞成咁)，唔知大家有冇計﹖其實我已經叫咗佢，無論隻嘢既消息係好係壞，復咗牌點都要起碼沽一半，但實際呢隻股既情況係咪好差﹖大家可唔可以幫我分析一下﹖」

 忠旺的問題在去年9月14日發生，內地《經濟觀察報》刊發報道，質疑忠旺上市招股書所載資料的準確性，後來該報道了歉。但事件有點澄而未清，忠旺在今年1月5日刊發通告，話搵咗安永中國做獨立審閱，認為被指控的客戶資料及所得稅付款兩件事都無問題。隻嘢在通告公布前幾日已開始偷步由低位5個幾急抽，通告出完到1月6日急升上8.07元，春江鴨隨時散咗貨，隻嘢跟住停牌，後來講要再就1月5日的通告作澄清。咁耐未復到牌，雖然唔一定有事，但感覺有啲濕滯。

        Jeffrey爸爸犯咗幾個散戶通病，第一，炒股太集中，任何一隻股都有出事的可能，何況係一隻人地話佢有事佢澄清話無事的股票，更加要小心，你買一隻股，萬一佢長期停牌，你要瞓得著至好，若果你話會瞓唔著，咁就唔好咁瞓身啦。

 第二，太信股價。好多散戶眼見為真，但股價有時有人為因素，一見佢大彈就追，好危險，呢啲情況放半注玩吓唔係唔得，10注放哂落去就唔係幾好啦。

 第三，唔識睇價。忠旺急跌前長期在7.2元、7.3元牛皮，到停牌前急升上8.07元，高過大跌之前個價，PE近15倍，即使佢無事，又值唔值得上高位呢? 咁價錢都唔係好抵的價錢，睇圖一枝箭咁上，又點追得落手呢?

建議若忠旺復牌，等股價定一定時，就減緊啲貨。以後判爸爸守行為，只俾十分一錢佢炒，輸哂唔肉痛，十分九錢你同佢買，只買大藍籌或指數股，叫佢老人家唔好咁博命啦，要知道仔女搵錢俾你都唔容易鮁。

陸羽仁