| ||||||
如果呢排有人話8號仔電盈嘅服務勁優質，相信一定俾財經網站Infocast（匯港資訊）嘅管理層鬧爆。話說今個禮拜一，佢哋個網站出現3個鐘頭互聯網網路中斷，影響旗下服務同交易，涉及數以千計客仔。當日佢哋已經好嚴正咁話，會同8號仔展開對話，以防止問題再發生。 斷線三個鐘尋求「說法」 唔 知係咪冇人得閒同佢哋對話，搞到噚日Infocast要發新聞稿再講呢單嘢，話8號仔已經承認件事係佢哋有嚴重人為錯失，因此電盈應負上全部責任。 Infocast仲話，管理層對呢件事極之關注，會繼續跟進事件，務求8號仔訂出預防同補救方法防止事件重演。咁啱得咁蹺，呢個禮拜日又到8號仔一年一度 運動會嘅大日子，好話唔好聽，嗰日由8號仔第二把交椅AA艾維朗，到門市sales哥哥姐姐，都會齊齊整整喺晒度，Infocast不妨諗諗去踩場，到時 鍾意搵邊個對話都得啦！ | ||||||
| ||||||
全 球面臨經濟衰退，人人要減省開支，即使唔節衣縮食都要慳啲使，花旗國就有唔少企業同團體宣佈取消今年嘅聖誕party，實行慳得就慳。就算搞得成，賓客都 要自己科水，再冇free lunch呢支歌仔唱咯，就連紐約財經作家協會一年一度嘅籌款晚會都搵唔到贊助，全場飲品要自己『手音』荷包。 冇人肯認頭贊助 金 融危機唔單止引發裁員減薪潮，由於唔少企業縮減皮費，搞到報紙、雜誌廣告收入大減，紐約財經作家協會上個禮拜五舉行Financial Follies（財經愚人）籌款晚會，想搵客戶贊助番兩萬五蚊美金（都只不過係19.5萬港紙）酒水都冇人肯認頭，搞到協會決定「飲者自付」，唔提供免費 飲品。為咗方便收錢，每杯飲品都貼上價錢牌，雞尾酒同紅酒盛惠11蚊美金，即係85.8蚊港銀；就算齋飲水都要收6蚊美金，盛惠47蚊港銀，認真揦脷。唔 知香港幾時會有樣學樣呢呵？ 齋飲水盛惠47蚊 除咗冇人肯贊助酒水，晚會出席人數都大減，舊年Financial Follies賣咗122圍枱，今年就只得116張枱，創咗911以來最大跌幅。點解？企業閂水喉，好多公關公司都維唔到皮要執笠，留得番落嚟嘅公司都要 cut budget，又點會捨得畀錢贊助party呢。由於今年出席籌款晚會人數減少，sponsor又唔多，所以餘興派對（after-party）都冇舊年 咁熱鬧。李華華[email protected] | ||||||
| ||||||
| 聯 儲局主席伯南克在國會聽證會發言，話AIG內部一團糟，全無風險監控，令佢好憤怒，美國財長蓋特納亦講到AIG掛住玩對冲基金與衍生工具，好似細路玩遊 戲，冇大人監管（without adult supervision）。我哋亦好憤怒，好嬲美國監管機構對AIG玩泥沙，完全唔理會，直至出咗事先至去救亡，伯南克與蓋特納（以前係紐約聯邦儲備銀行 總裁）呢班大人在AIG玩嘢之時，死咗去邊？相形之下，香港監管機構因雷曼破產而畀議員鬧到暈，美國監管機構唔救雷曼而只係畀國會議員係咁意贈幾句，香港 啲高官實在好唔抵。 呢啲新聞冇乜娛樂性，睇咗只係得個嬲字。大劉講電盈私有化及種票等等，就趣味盎然。佢之突然出嚟講嘢， 唔知係唔係受到上星期「壹仔」封面故事刺激呢？以事論事，在自由市場，只要有人提出一個私有化價錢，而該價高出市價，就一定會有人做套戥，計完私有化成事 之機率後，入市掃貨。自由市場有度好，就係容納不同意見，永遠有人睇好，有人睇淡，既然有人提出以四元五角私有化電盈，但竟然有好多人願意以三個幾在市場 上賣出，咁咪造就咗大劉呢類有錢人去套戥，賺差價囉。出貨班人應該係相信私有化一定唔掂嘅，買貨班人係相信私有化有機會成功嘅。 以三個幾賣電盈，自然冇眼 睇，以三個幾入電盈，為咗私利，梗係想私有化成功啦，手上股票化為成千上萬張人頭票就最好。故此大劉話佢好後悔，點解佢用幾億銀，只得一張票！經此一役， 我哋普通人都學到嘢，原來法例不理會「一氣化三清」或「撒豆成兵」嘅，只要同「要約方」（offeror）冇關係就得o架嘞，例如大劉就透露有人叫佢班二 百張票（其實買幾百股就可以有二百票，學醒目人士David Webb就得嘞）去玩一玩方小姐。玩嚟有乜用？騎騎，如果有人刻意玩嘢，或者有人願意主動約見傾條件呢！大劉尊重邵爵士，唔肯滋擾邵氏私有化。另一方面， 佢更尊重銀紙，真金白銀拿錢出嚟博電盈私有化成功，點知o依家仲未掂，如果私有化不成，八號仔股價好大可能隨大市下跌，跌到三元以下，大劉就損失不止幾條 雞毛咯！ | ||||||
2009-05-03 AppleDaily
| ||||||
| 馬 場之內，碰到一位稀客，就係新聞Ｖ。新聞Ｖ原來係參加社交活動啫，佢份人一本正經，絕少投注，入馬場唔會染上賭風，馬會向政府申請增加五日賽馬及大約二十 次（唔知有冇記錯）轉播海外賽馬，馬迷視若等閒，但立即遭到一啲usual suspects嘅反對，究竟呢類反對派代表幾多名市民，無可稽考，如果民政事務局話佢哋代表民意，唔敢答允馬會之請嘅話，不如所有馬經版記者，馬經印刷 廠員工，報販等等以及熱心馬迷一齊向民政事務局表達意見，睇吓邊一方面嘅人數多一啲。 如果淨係睇天水圍萬人空巷申請馬會兼職嘅情況，張建宗局長應該支持 啦。閒話少說，新聞Ｖ百毒不侵，即使全年跑馬無休，佢都唔會成為馬迷，佢嘅興趣係新聞與英文，因為佢一畢業就入《華爾街日報》，一舉成名後，就到劍橋大學 讀碩士，返嚟做報館高職，其餘不必一一細數。o依家佢到浸會大學搞財經新聞碩士課程，係理想人選也。近日特區政府宣佈發行政府債券，上限一千億元，大概以 一二百億元試吓水溫先。特區政府完全冇發債需要嘅，呢次正是為發債而發債，要建立及發展本港債券市場喎。 發兩百億債，如果年期係三至五年，利率二厘嘅話， 以目前環境，大把人要，問題係：政府收咗兩百億，用嚟做乜？據講係設立債券基金，交畀金管局投資。於是一啲評論員立即計數，話金管局過去六年嘅平均回報率 係六點八厘，政府付出兩厘，收六點八，即係有息差四厘八，豈非一年可以賺入九億六（以兩百億元計），咁容易賺錢就好咯。新聞Ｖ嘅財經碩士班如果能夠向學生 （在職編輯記者）灌輸正確財經知識，如何分析政府發債，等佢哋唔好咁純情，咁就真係功德無量。以新聞Ｖ嘅背景，佢有辦法做得到嘅！新聞Ｖ又通知，佢會喺五 月十六日推出一本新書，叫做《瘋讀社論、狂學英語》有余若薇、鄧永鏘寫序推薦，睇落係一本惡補、強補英語雞精書，今時今日，有市場瞄頭o架。 | ||||||