ZKIZ Archives

最近，有行內人爆料，指每日競價時段，恒生證券於近百隻窩輪掛「陰濕」買盤，開價只是現價的六分之一至七分之一，價位看上去十分吸引，但其實少一個小數點，即是兩仙以為是兩毫，懷疑是搏投資者睇錯價而出貨。不時有心急為客出貨的經紀「中招」，有經紀甚至因此要賠償六位數字款項予客人。本刊過去兩週，追蹤恒生證券的窩輪買盤，發現每個交易日都大規模擺下「陰濕」陣，恒生證券卻厚顏回應：「我哋完全合法o架喎！」但行內老行尊則推斷有市場老鼠利用股民弱點來搵食。

「每朝九點至九點半開市前的競價時段，近百隻窩輪都會出現恒生證券買盤，開價同前一日收市價相差好遠，但驟眼望落去會以為個價好吸引，好似隻19270（聯想荷合三一認購證），現價係$0.3，恒生證券落個買盤價就$0.04，誤導啲唔小心嘅投資者，以為現價係$0.4，急急腳沽出。」宏高證券分析員梁杰文月初向本刊報料，指斥恒生證券有「搏大霧」之嫌，欲以七分一價錢買入「平輪」，誤沽貨者只得一殼眼淚。

過百「陰濕」窩輪盤湧現

在過去兩週的交易日，記者在每日的競價時段，查看多隻上市窩輪的落盤情況，發現踏入九時，恒生證券即於短短兩分鐘內，掛出近百隻窩輪買盤，金額通常為十萬元，開價與前一日收市價相差約六至七倍，日日如是。當中涉及不同發行商出的窩輪，並遍布多個板塊，如中資股工商銀行（1398）、華晨中國（1114）、崑崙能源（135），本地薑思捷（330）、和黃（13）等都被揀中。例如上週四，約於九時十九分，法興的工行窩輪（21158），按盤價為$0.229，但恒生證券則掛$0.034。恒生證券漁翁撒網式落盤，上月就有「盲頭烏蠅」不慎中伏，受害人更是經驗老到的股票經紀。「平時入貨唔會咁唔小心，恒生證券喺好多窩輪落盤，而且報個價咁似高過現價，完全捉到我當時緊張嘅心理。」該經紀憶述。由於窩輪市場波動較大，熟手炒家買入窩輪後，會於即日沽貨獲利。他有次代客購入一隻由麥格理銀行發出的窩輪後，即日未等到理想價錢，便冒險「揸過夜」。「買輪那日，我買賣其他股票已經愈輸愈寒，於是第二朝急住放隻輪。開市後輪商遲遲未報價，我見到恒生開個價幾好，就即刻沽俾佢，成交後先知中招，嚇死我！」原來他錯把$0.022看成$0.22元，結果輸掉約十萬元，須自掏腰包償還予客戶。他嘆口氣道：「唉，我不嬲唔鍾意trade（買賣）窩輪，以後避得就避！」

如何中招

走法律罅執死雞

事實上，港交所規定，所有買賣盤的落盤價，不可超過現價的九倍或少於九分一，而恒生證券掛的「陰濕」盤剛好介乎現價的六分一至七分一之間。買盤於競價時段內掛出後，若該窩輪交投淡靜，沒有其他更高價的買盤出現，恒生證券的買盤會在開市後，持續成為該窩輪的買入價。如有客戶落「柯打」以市價賣出窩輪的話，便輕易中伏。梁杰文認為此舉非常不公：「佢係無犯法，但市場應該係一個公平買賣的平台，確保每個人都係well-informed（得到足夠資訊），而唔係專吼人哋啲careless mistakes（不小心的錯誤）來賺錢。」能夠如此大規模、固定的「漁翁撒網」，不少行內人都認為有幕後黑手策劃。有外資大行衍生工具部高層說：「其實大家都有眼睇o架啦，每個盤都有一個owner（持有人），可以係散戶，但亦唔排除係證券行自己部門負責做呢啲交易。」記者曾以自己的恒生證券戶口落盤，由輸入資料到落盤，過程需時最少二十秒。恒生證券每個交易日都可於兩分鐘內落近百隻類近的「陰濕」盤，絕非個別網上散戶所為。買家亦有可能於九點前已透過經紀落盤，但香港證券及期貨從業員工會會長林德明就質疑：「如果個差價咁大，經紀通常會建議個客唔好開個咁誇張嘅價，呢個係職業道德嚟。」梁杰文更懷疑有關買盤是電腦預設的程式盤，每朝「自動波」落盤，才可如此「快、狠、準」。

行內人鬧爆

「呢單嘢我聽過好耐o架啦，擺明係人為控制，根本就不公平、不合理，我覺得係有伙記有目標及有意策劃，透過技術性方式獲取利益。因為未有人集體受害，所以無人理。以前迷債都無人理，出咗事先有人理！我哋同證監、港交所嘈咗好耐，但政府聽而不聞、聞而不做、做又不切實際，有乜計？」

「我有聽過你講嘅事，競價時段啲差價差好遠，好似$0.01睇錯咗做$0.1，一個唔覺意就搞錯。證監同港交所都要對競價盤有價格限制，但政府唔夠膽郁啲大行，人哋有大把律師，吓吓同你講法律原則都煩死你，散戶只有任得佢屈咋。」

「有唔少客都同我提過：『嘩，又有錯盤喇！』有啲客仲一次過trade（交易）咗十萬蚊。我幾個星期前已同港交所反映過，依家仲未有回音。港交所應該設定個買賣盤限制，保障番投資者。」

「以前都試過有人喺開市前競價時段亂咁擺盤，09年亞洲果業（73）試過前一日收市價係$5.89，開市升咗近九倍到$51.25，要即刻停牌。唉，競價時段亂咁開價都得o架，散戶要小心睇實。」

窩輪臭史高盛自製「烏輪」盤

去年四月，高盛發現旗下四隻日經指數窩輪的發行文件中，計算程式將「除」當作「乘」，令窩輪價格相差百倍，要立即停牌。按舊有公式計算，公司須賠償數億元予窩輪持有人，但高盛只肯每人賠償五千元，並以買入價加一成溢價收回窩輪，前後只需五百萬元。受牽連客戶成立「高盛烏輪關注組」追討賠償，但最後不了了之。

德銀高層貪污賣平輪

同年同月，廉署就德銀高層與經紀貪污案拘捕十一人，包括德銀兩名高層、一名股票大戶，以及一間證券行兩名持牌代理人。案情指，德銀高層於08年收受二千多萬元賄款，以「優惠價」賣輪予大戶，對方再以高價出售，數年間獲利逾千萬元，案件仍在審理中。

殺戮股票戰場，是不少人嚮往的生活。

但在金融界打滾了三十年的李錦，卻有另一番體會。

李錦（Edmond）曾在澳紐銀行、新鴻基證券及法興證券工作，○五年衍生工具蓬勃，李錦成為法興證券環球股票產品部董事，經常在鏡頭前大講窩輪。再遇上○七年「港股直通車」，恒指衝上歷史高位，同樣將李錦的事業推上高峰。不過此時，卻埋下了他想離開的種子。

「有客拎住五十萬問我點算，我問原先有幾多錢？佢答：『三百萬。』佢一直以為跌咗第二日會升番。」

李錦早睇穿炒股無必勝，理財應由七歲開始，上年他毅然辭職瞓身兒童理財教育。

他自知收入難比從前，但他說：「老婆應承就得啦！」

以往的李錦，經常要開講座sell窩輪，面對的是一班師奶阿叔；今日的李錦，一樣開講座，但面對的是一班嘩鬼細路。他搞的理財工作坊，最細七歲已可參加， 根據理財班網頁顯示，四堂課的課程學費高達三千三百元，一樣爆滿！課堂以小組形式進行，李錦在堂上與學生互動頗多，一時抽數字卡，一時在黑板上貼上超市價目表，寫上「買二送一」、「限時優惠」，讓小朋友比較買哪個較值得。

在堂上李錦又建議將零用錢儲一半，用百分之三十買必需品，剩下的百分之二十買想要的東西。小朋友上完堂講理財都頭頭是道：「買股票要揀有歷史、會派股息嗰啲！」另一位小朋友就指：「Edmond叔叔叫我哋唔好做守財奴同大花筒，因為兩樣都唔啱嘅。」

「香港人都唔識理財」

李錦由投資銀行部門主管，變成中小學「初階理財班」導師，收入不比從前，有人更懷疑是衍生工具在港已「無肉食」，所以他被迫急流勇退。不過李錦指早在數年前已有此打算：「喺○八、○九年左右已想走，但我當時諗係唔係太早？家人會點諗？會唔會太後生？我就同屋企人商量，同埋開始研究呢方面工作。之後寫咗兩本書，去到一三年第二本書出版之後，我就決定兩年後離開。」李錦的事業高峰，一如其他金融人，在○七年。適逢「港股直通車」熱炒，每日平均千億成交，是衍生工具市場的全盛時期：「試過以年計，成交佔大市百分之二十五。當時開親講座都好多人報名，最誇張嗰次喺會展開，有成三千人嚟聽。」他憶述當時他經常跟亞洲各國金融機構開會、開發新的投資產品，「四日去五個國家都唔出奇。」其間更幫公司寫書，介紹相關產品的知識。

「輸錢因不肯等待」

促使他離開股壇，走進課室，亦正是這個時期。事關他看見太多港人急功近利，「試過有五、六十歲嘅人問我，李生點算呀？我就睇一睇佢證券行個statement，見到有五、六十萬，我就問佢原本有幾多錢，佢答三百萬囉！佢原來諗住依家跌，第日都會升番。但係我睇番落去佢買嘅產品，好多都係高風險，有啲股票聽都未聽過，根本唔適合退休人士。」他指不少散戶盲目追求高風險投資，全因他們「不肯等待」：「早啲教佢哋咩叫儲蓄、投資同消費，其實呢幾樣嘢都係講等待。好似買嘢咁，如果你唔係吓吓使錢，簽卡數都唔會爆；又好似買股票咁，諗住今日買，升咗兩個價位就放。又有人話做投資，買咗隻真係有實力嘅股份，過兩日就放，其實都係投機行為。」李錦的目標就是由小學開始教導，灌輸小朋友「升得快，跌得仲快」的理念，「好多人一開始都以為我教小朋友炒股，俾number，其實第一步就係要佢哋學識等，好似會俾啲種子返去種，同佢哋講做所有嘢都需要時間。」

「世界上無炒股必勝心法」

李錦早年於澳洲墨爾本大學畢業，隨即加入銀行界，先後加入澳紐銀行、新鴻基證券及法興證券。他直言二十八年間「乜都炒過晒」，亦見識到「股海迷途」的道理：「喺九一到九七年之間，我自己就搞搞震，一面打工一面搏命去炒。咩槓桿產品、外匯、黃金，咩都試過，真係炒得好犀利。」他自命眼光應高人一等，於是「愈輸愈炒」，「我上過好多堂，本身基本嘢識晒，之後飛去美國學埋技術分析，五千蚊美金一堂，有專人book埋酒店，跟Peter Steidlmayer（四度空間理論發起人）學，事實係學到，返到香港係贏錢，但炒炒吓又輸番。」「到九七年，開始炒期指，五十張咁炒，日日最少都六、七萬上落，你話恐唔恐怖？」他坦言最後都「輸光輸淨」，淪落到要問朋友及銀行借錢：「好彩嗰時仲有份工，恒生都肯借，總共借咗幾十萬，最後贏番一成錢，兩年內還晒。」回想這六年間，他坦言「唯一就係輸心態」：「技術、分析、經驗我都有，就係輸心急，成日同自己講聽日會贏番，贏完就唔炒。」

「金融才俊唔易做」

金融界一向為畢業生首選行業之一，以為入行後就能很快賺取第一桶金。李錦見過不少新人入行，他忠告青年人「唔好諗得咁簡單」：「外面好多人都覺得投行好易搵快錢，但係新入行嘅人，都係由初級分析員做起，要經濟配合，個部門好，公司又賺到錢，收入相對先會多啲，真係搵到錢，最少都要等五年。」李錦現時教兩個兒子投資，也是要等，他要兒子將部分儲蓄買入黃金，藉此灌輸投資最基本的觀念。當時金價在九百美元徘徊，他對兒子說：「我哋依家買入黃金長線持有，短期起跌唔使理，直至黃金走勢同影響因素重現，先再作打算。」最後等了兩年，金價升到一千八百美元以上，他跟大兒子計算一下，認為是時候沽貨。「佢（兒子）認為有一倍回報，已好滿足。我照佢主意賣出，而家個仔識買金唔係『投資』，因為『都冇息收嘛！』」

李錦透露，想用十一年時間推廣兒童理財教育，期望理財班能列入初中理財課程。他指太太了解他的想法，由於二人本身都不算「大使」，所以太太都能夠接受丈夫不再做金融才俊：「佢（太太）本身冇做嘢，依家都係應慳則慳，得閒食餐好少少都OK嘅，到十一年後退休如果冇錢環遊世界，環遊澳門太太都唔介意嘅！」

香港衍生市場停滯11年

近年不少銀行淡出香港衍生工具市場，有行內人士指出，未必是「賺唔到錢」：「成個銀行業都好難做，經濟本身都差咗，同埋監管愈嚟愈緊，好多銀行嘅衍生工具部唔係冇錢賺，但係要重整架構。」他指港股近期有復甦跡象，雖然大多數被裁的員工都能重回業界，但金融業人士對行業前景未有太大信心：「最大問題係無新產品，同歐洲市場距離已經愈嚟愈遠。睇吓香港市場○五年出咗牛熊證之後，足足十一年無新產品。好似台灣依家都話想做黃金牛熊證，但係香港一啲眉目都無，輸俾台灣咁香港市場係好可悲。」

撰文：梁延宇攝影：李育明攝錄：李育明、鄭樹清[email protected]