📖 ZKIZ Archives

毓民護賤男　兩派對決　社民連大分裂

1 : GS(14)@2010-12-31 09:44:46

「維園阿哥」任亮憲風流惹禍，與女fan屎一夜銷魂後涉嫌霸王硬上弓，瞬間由民主鬥士淪為政壇賤男，下降速度快過ifc升降機。佢老哥最後下場如何，要睇差佬查到啲乜，但呢單嘢已即時引發社民連「內爆」，倒任與挺任兩派人馬分頭吹雞互劈，幕後大佬毓民則越洋直插現任主席陶君行，咁搞落去，社民連隨時大分裂，其中一派可能拉隊另起爐灶組個「新社民連」，若然係咁，成個丐幫就散晒。
毓民企出嚟護任亮憲，直斥陶君行（右）無用，應該落台，並說大不了散檔另組新黨！

任亮憲向來得到毓民撐腰，在黨內氣焰囂張，早有唔少仇家，佢爆出醜聞後，班友乘機發難，有核心成員向外放料指佢「臭名遠播」，又在一次聚會中以其好色行徑為笑柄，更高呼「監禁馬草泥（任之綽號）」，然後再灑酒落地「奠祭」其亡魂，擺到明想佢死。
陶君行一派得勢不饒人，提出召開黨內公聽會，揪賤男出嚟交代事件。與此同時，社民連另一大佬「長毛」嘅助理唐婉青正發動聯署，要求開除賤男出黨，而盤踞港島東嘅「阿牛」（曾健成），亦糾集旗下親兵，要同賤男算帳。
線人話，班友今次齊打落水狗，亦借機打擊隻狗嘅主人──毓民，原因係呢隻狗受寵糾眾四出咬人，觸發黨內矛盾重重，又踩入他人地盤樹立勢力（例如阿牛山頭就受威脅），阿陶、阿牛以至長毛都覺得唔順，遂藉此次醜聞發難。
毓民作為賤男背後嘅大佬，見到條o靚被內外圍攻，以佢嘅大佬性格，自然企出嚟幫細佬撐腰，亦乘機向「眼中釘」陶君行開火。佢老哥現時在紐約，出席兒子婚禮，但仍然越洋在「香港人網」大罵阿陶，指佢作為主席對任亮憲受攻擊坐視不理，全無領導才能，不宜再領導社民連；又炮轟長毛畀職員發動聯署公審馬草泥，「你仲有乜資格爭取公義呀大佬，笑死人呀！」用語十分之重。
毓民仲發晦氣話，自己無意重掌主席之位，但政黨並非千秋萬世，大不了散檔另外組新黨。毓民咁講未必係一時意氣，有傳聞話佢已註冊咗「社民黨」個名，隨時可以拉隊出嚟打正政黨名義，建立一個新山頭，同阿陶唱對台。
線人話，毓民高調要阿陶落台，正是看到「陶派」咄咄逼人，如果不及早還擊，回港後恐怕更加失勢，故擺出一拍兩散的姿態，如果「陶派」繼續狙擊賤男，佢會親自出手將阿陶推落台。
其實阿陶一派亦諗過拆夥，另外開一個新檔口，線人話，一批阿陶支持者及已退黨嘅成員（如前秘書長季詩傑），曾勸阿陶帶隊自己出嚟玩，唔使等到毓民殺埋嚟至諗退路咁被動，反正自己有一定實力，立場又同大佬唔同，不如另搞一檔好過！
民建聯詢問旗下八十後黨員，有冇亂搞男女關係，確定冇埋下炸彈。


民建聯防患未然
查詢青年黨員私生活任亮憲桃色風波震動整個政圈，其他政黨嘅大佬忽起恐慌，心諗：自己個黨都有唔少八十後，呢代人興一腳踏幾船兼玩即興，如果有人唔生性留低蘇州屎，等到選舉之時被人爆出，成個黨都好大鑊，上上策仲係未雨綢繆，先了解年輕黨員有冇風流事迹。
線人回報，向來最講紀律與操守嘅民建聯及工聯會，各黨支部嘅頭頭近日紛紛單獨約見日後可能出戰區選嘅政治新秀，主要詢問三條問題：有否亂搞男女關係？有否婚外情？有否去過尋歡？各人毋須即時作答，返去諗清楚再答都未遲，似乎唔想聽「標準答案」，而係認真摸底，以防埋下計時炸彈到關鍵時刻至爆發。不過民建聯同工聯會班青年軍絕大多數都係乖仔乖女，牽涉桃色事件嘅機會極低。
其實早在今年初季詩傑被女友斬傷後，建制派已開始關注青年軍嘅私人生活，並叮囑各人小心管理facebook，唔好亂放相片同亂留言。
長毛嘅助理發動聯署要踢任亮憲出黨，毓民轟長毛「仲有乜資格爭取正義呀」！


滾友與國父相比
季霆剛：離晒大譜！上星期任亮憲現身維園，民建聯青年黨員季霆剛忽然出擊，手指指直斥佢係「情場禮義廉」，頓時搶晒鏡頭，其後惹來一批憤青追佢喊打。
季霆剛未被嚇倒，準備繼續狙擊賤男。早幾日佢在《明報》睇到一篇文章，睇嚟係疑似社民連人馬所寫，其中一段為賤男開脫，令佢怒火中燒，準備發炮轟擊。該段文字指，「孫中山和馬丁路德金，當年也是赫赫有名的滾友賤男……每有媒體踢爆緋聞，只要不犯法，同志們就算不出面保護，也會三緘其口，令大事化小。」
小季怒斥，個作者有冇搞錯呀，竟然將任亮憲呢條友同國父及民權領袖相比，仲將兩位偉人列為「賤男」，實在太過分啦！佢認為對呢類極端歪理應該大力打擊，唔好令國父同民權領袖被沾污。
季霆剛對國父被沾污十分憤怒。


公民黨主席位之爭
引發兩派火併政黨近排流行內鬥，公民黨亦唔例外。該黨主席關信基及黨魁余若薇將退位，下月八日改選，黨魁一職已內定由梁家傑執掌，大家都冇異議，但主席邊個做，就有兩派意見，一批年輕黨員對「大熱門」陳家洛不滿，更密謀捧鄭宇碩同佢爭位，鹿死誰手將有一番角力。
線人話，原任秘書長嘅陳家洛，自從出任「五區公投」旗手後，已擺出候任主席姿態，部分青年軍對此唔多順氣，剛好鄭宇碩有意捲土重來，雙方遂連成一線，目前看來，有四成機會撼低陳家洛。
不過鄭宇碩要取此位並不容易，因為佢過往在選戰中領導能力唔高，核心成員對佢能否擔大旗甚有保留。
陳家洛雖然贏面較大，但「反陳」勢力不弱，佢如果當選，可能引發一批年輕黨員及地區人馬反彈，分分鐘好似民主黨咁，拉隊退黨。

---